28–BOB
Doimiy nazrlar
1 Egamiz Musoga aytdi: 2 “Isroil xalqiga shunday deb buyur: ular taom nazrlarini Menga har doim belgilangan vaqtda keltirishsin. Kuydiriladigan bu nazrlardan Menga yoqimli hid keladi.” 3 Egamiz davom etib, Isroil xalqiga olovda kuydiriladigan nazrlar toʻgʻrisida quyidagi qonunlarni yetkaz, deb Musoga amr berdi: “Har kuni ikkita nuqsonsiz bir yoshli qoʻchqor qoʻzini Egamizga kunda kuydiriladigan qurbonlik qilinglar. 4 Bitta qoʻzini ertalab, ikkinchisini kechqurun qurbonlik qilinglar. 5 Har bir qoʻziga qoʻshib, ikki kosa toza zaytun moyi aralashtirilgan toʻrt kosa sifatli unni don nazri qilib keltiringlar. 6 Egamizga yoqimli hid borishi uchun olovda kunda kuydiriladigan qurbonliklar ilk bor Sinayda joriy qilingan edi. 7 Har bir qoʻziga qoʻshib ikki kosa sharob nazrini ham keltiringlar. Sharobni Egamizga atab Muqaddas chodirda nazr qilib quyinglar. 8 Ikkinchi qoʻzini kechqurun qurbonlik qilinglar. Ertalabki qurbonlik singari, bu qurbonlikka qoʻshib, belgilangan miqdorda don bilan sharob nazri qilinglar. Olovda kuydiriladigan bu qurbonliklardan Egamizga yoqimli hid boradi.
Shabbat kunida qilinadigan nazrlar
9 Shabbat kuni esa ikkita bir yoshli nuqsonsiz qoʻchqor qoʻzini qurbonlik qilinglar. Bu qurbonliklar bilan birga belgilangan miqdorda sharob nazrini va zaytun moyi aralashtirilgan sakkiz kosa sifatli unni don nazri qilib keltiringlar. 10 Bu kuydiriladigan qurbonliklarni har Shabbatda kunda kuydiriladigan qurbonliklardan va unga qoʻshib qilinadigan sharob nazridan tashqari keltiringlar.
Oyning birinchi kunida qilinadigan nazr
11 Har oyning boshida ikkita buqani, bitta qoʻchqorni va yettita bir yoshli qoʻchqor qoʻzini Egamizga atab kuydiriladigan qurbonlik qilinglar. Hamma jonivorlar nuqsonsiz boʻlsin. 12 Bu qurbonliklarga qoʻshib quyidagi miqdorda zaytun moyi aralashtirilgan sifatli unni don nazri qilib keltiringlar: har bir buqa bilan oʻn ikki kosa un, qoʻchqor bilan sakkiz kosa un, 13 har bir qoʻchqor qoʻzi bilan toʻrt kosa un. Olovda kuydiriladigan bu qurbonliklardan Egamizga yoqimli hid boradi. 14 Har bir buqa bilan toʻrt kosa sharob, har bir qoʻchqor bilan uch kosa sharob, har bir qoʻchqor qoʻzi bilan esa ikki kosa sharobni nazr qilinglar. Bu kuydiriladigan nazrlarni har oyning birinchi kunida ado etinglar. 15 Bundan tashqari, bitta takani Egamizga gunoh qurbonligi qilinglar. Bu hamma qurbonligu nazrlarni kunda kuydiriladigan qurbonliklar va ularga qoʻshib qilinadigan sharob nazridan tashqari keltiringlar.
Fisih ziyofati va Xamirturushsiz non bayramida qilinadigan nazrlar
16 Birinchi oyning oʻn toʻrtinchi kuni Egamizga bagʻishlangan Fisih ziyofatini nishonlanglar. 17 Oʻn beshinchi kuni esa yetti kunlik bayram boshlanadi, sizlar yetti kun davomida xamirturushsiz non yeyishlaringiz lozim. 18 Bayramning birinchi kuni butun xalq muqaddas yigʻinga kelsin. Har kungi ishlaringiz bilan mashgʻul boʻlmanglar. 19 Egamizga atab ikkita buqani, bitta qoʻchqorni va yettita bir yoshli qoʻchqor qoʻzini olovda kuydiriladigan qurbonlik qilinglar. Hamma jonivorlar nuqsonsiz boʻlsin. 20 Bu qurbonliklarga qoʻshib quyidagi miqdorda zaytun moyi aralashtirilgan sifatli unni don nazri qilib keltiringlar: har bir buqa bilan oʻn ikki kosa un, qoʻchqor bilan sakkiz kosa un, 21 har bir qoʻchqor qoʻzi bilan toʻrt kosa un. 22 Oʻzlaringizni gunohdan poklash uchun takani gunoh qurbonligi qilinglar. 23-24 Bu nazrlarni kunda ertalab kuydiriladigan qurbonlikdan tashqari, yetti kun davomida keltiringlar. Bu taom nazrlarini Egamizga yoqimli hid boʻlishi uchun olovda kuydiringlar. Bular kunda kuydiriladigan qurbonliklar va ularga qoʻshib qilinadigan sharob nazridan tashqari keltirilsin. 25 Bayramning yettinchi kuni ham muqaddas yigʻin oʻtkazinglar. Har kungi ishlaringiz bilan mashgʻul boʻlmanglar.
Hosil bayramida qilinadigan nazrlar
26 Hosil bayramining birinchi kuni, Egamizga yangi hosilingizning donini nazr qilganingizda, butun xalq muqaddas yigʻinga kelsin. Har kungi ishlaringiz bilan mashgʻul boʻlmanglar. 27 Egamizga yoqimli hid borishi uchun ikkita buqa, bitta qoʻchqor, yettita bir yoshli qoʻchqor qoʻzini kuydiriladigan qurbonlik qilinglar. 28 Bu qurbonliklarga qoʻshib quyidagi miqdorda zaytun moyi aralashtirilgan sifatli unni don nazri qilib keltiringlar: har bir buqa bilan oʻn ikki kosa un, qoʻchqor bilan sakkiz kosa un, 29 har bir qoʻchqor qoʻzi bilan toʻrt kosa un. 30 Oʻzlaringizni gunohdan poklash uchun bitta takani qurbonlik qilinglar. 31 Bu nazrlarni va ularga qoʻshib qilinadigan sharob nazrini kunda kuydiriladigan qurbonliklardan va ularga qoʻshib qilinadigan don nazridan tashqari keltiringlar. Qurbonlik qilinadigan hamma jonivorlaringiz nuqsonsiz boʻlsin.
28–БОБ
Доимий назрлар
1 Эгамиз Мусога айтди: 2 “Исроил халқига шундай деб буюр: улар таом назрларини Менга ҳар доим белгиланган вақтда келтиришсин. Куйдириладиган бу назрлардан Менга ёқимли ҳид келади.” 3 Эгамиз давом этиб, Исроил халқига оловда куйдириладиган назрлар тўғрисида қуйидаги қонунларни етказ, деб Мусога амр берди: “Ҳар куни иккита нуқсонсиз бир ёшли қўчқор қўзини Эгамизга кунда куйдириладиган қурбонлик қилинглар. 4 Битта қўзини эрталаб, иккинчисини кечқурун қурбонлик қилинглар. 5 Ҳар бир қўзига қўшиб, икки коса тоза зайтун мойи аралаштирилган тўрт коса сифатли унни дон назри қилиб келтиринглар. 6 Эгамизга ёқимли ҳид бориши учун оловда кунда куйдириладиган қурбонликлар илк бор Синайда жорий қилинган эди. 7 Ҳар бир қўзига қўшиб икки коса шароб назрини ҳам келтиринглар. Шаробни Эгамизга атаб Муқаддас чодирда назр қилиб қуйинглар. 8 Иккинчи қўзини кечқурун қурбонлик қилинглар. Эрталабки қурбонлик сингари, бу қурбонликка қўшиб, белгиланган миқдорда дон билан шароб назри қилинглар. Оловда куйдириладиган бу қурбонликлардан Эгамизга ёқимли ҳид боради.
Шаббат кунида қилинадиган назрлар
9 Шаббат куни эса иккита бир ёшли нуқсонсиз қўчқор қўзини қурбонлик қилинглар. Бу қурбонликлар билан бирга белгиланган миқдорда шароб назрини ва зайтун мойи аралаштирилган саккиз коса сифатли унни дон назри қилиб келтиринглар. 10 Бу куйдириладиган қурбонликларни ҳар Шаббатда кунда куйдириладиган қурбонликлардан ва унга қўшиб қилинадиган шароб назридан ташқари келтиринглар.
Ойнинг биринчи кунида қилинадиган назр
11 Ҳар ойнинг бошида иккита буқани, битта қўчқорни ва еттита бир ёшли қўчқор қўзини Эгамизга атаб куйдириладиган қурбонлик қилинглар. Ҳамма жониворлар нуқсонсиз бўлсин. 12 Бу қурбонликларга қўшиб қуйидаги миқдорда зайтун мойи аралаштирилган сифатли унни дон назри қилиб келтиринглар: ҳар бир буқа билан ўн икки коса ун, қўчқор билан саккиз коса ун, 13 ҳар бир қўчқор қўзи билан тўрт коса ун. Оловда куйдириладиган бу қурбонликлардан Эгамизга ёқимли ҳид боради. 14 Ҳар бир буқа билан тўрт коса шароб, ҳар бир қўчқор билан уч коса шароб, ҳар бир қўчқор қўзи билан эса икки коса шаробни назр қилинглар. Бу куйдириладиган назрларни ҳар ойнинг биринчи кунида адо этинглар. 15 Бундан ташқари, битта такани Эгамизга гуноҳ қурбонлиги қилинглар. Бу ҳамма қурбонлигу назрларни кунда куйдириладиган қурбонликлар ва уларга қўшиб қилинадиган шароб назридан ташқари келтиринглар.
Фисиҳ зиёфати ва Хамиртурушсиз нон байрамида қилинадиган назрлар
16 Биринчи ойнинг ўн тўртинчи куни Эгамизга бағишланган Фисиҳ зиёфатини нишонланглар. 17 Ўн бешинчи куни эса етти кунлик байрам бошланади, сизлар етти кун давомида хамиртурушсиз нон ейишларингиз лозим. 18 Байрамнинг биринчи куни бутун халқ муқаддас йиғинга келсин. Ҳар кунги ишларингиз билан машғул бўлманглар. 19 Эгамизга атаб иккита буқани, битта қўчқорни ва еттита бир ёшли қўчқор қўзини оловда куйдириладиган қурбонлик қилинглар. Ҳамма жониворлар нуқсонсиз бўлсин. 20 Бу қурбонликларга қўшиб қуйидаги миқдорда зайтун мойи аралаштирилган сифатли унни дон назри қилиб келтиринглар: ҳар бир буқа билан ўн икки коса ун, қўчқор билан саккиз коса ун, 21 ҳар бир қўчқор қўзи билан тўрт коса ун. 22 Ўзларингизни гуноҳдан поклаш учун такани гуноҳ қурбонлиги қилинглар. 23-24 Бу назрларни кунда эрталаб куйдириладиган қурбонликдан ташқари, етти кун давомида келтиринглар. Бу таом назрларини Эгамизга ёқимли ҳид бўлиши учун оловда куйдиринглар. Булар кунда куйдириладиган қурбонликлар ва уларга қўшиб қилинадиган шароб назридан ташқари келтирилсин. 25 Байрамнинг еттинчи куни ҳам муқаддас йиғин ўтказинглар. Ҳар кунги ишларингиз билан машғул бўлманглар.
Ҳосил байрамида қилинадиган назрлар
26 Ҳосил байрамининг биринчи куни, Эгамизга янги ҳосилингизнинг донини назр қилганингизда, бутун халқ муқаддас йиғинга келсин. Ҳар кунги ишларингиз билан машғул бўлманглар. 27 Эгамизга ёқимли ҳид бориши учун иккита буқа, битта қўчқор, еттита бир ёшли қўчқор қўзини куйдириладиган қурбонлик қилинглар. 28 Бу қурбонликларга қўшиб қуйидаги миқдорда зайтун мойи аралаштирилган сифатли унни дон назри қилиб келтиринглар: ҳар бир буқа билан ўн икки коса ун, қўчқор билан саккиз коса ун, 29 ҳар бир қўчқор қўзи билан тўрт коса ун. 30 Ўзларингизни гуноҳдан поклаш учун битта такани қурбонлик қилинглар. 31 Бу назрларни ва уларга қўшиб қилинадиган шароб назрини кунда куйдириладиган қурбонликлардан ва уларга қўшиб қилинадиган дон назридан ташқари келтиринглар. Қурбонлик қилинадиган ҳамма жониворларингиз нуқсонсиз бўлсин.
