45–BOB
Shoh Kurush — Egamizning tanlagani
1 Egam aytar: “Men shoh Kurushni oʻng qoʻlidan tutib turibman.
Xalqlarni unga itoat ettiray deya,
Shohlarni qurolsizlantiraman.
Uning oldida eshiklar ochiq turadi,
Darvozalar yopilmaydi.”
Egamiz Oʻzining tanlagani — Kurushga shunday aytmoqda:
2 “Men Oʻzim Sening oldingda boraman,
Togʻlarni tekislikka aylantiraman,
Bronza eshiklarni parchalayman,
Temir tambalarni sindiraman.
3 Men Egang ekanligimni bilib olgin,
Sening ismingni aytib chaqirayotgan Men
Isroil xalqining Xudosi ekanligimni anglagin deb,
Yashirib qoʻyilgan boyliklarni,
Zulmatdagi xazinani senga beraman.
4 Qulim Yoqub haqi,
Oʻzim tanlagan Isroil haqi,
Sening ismingni aytib chaqirdim.
Senga nom ato qildim,
Ammo sen Meni bilmaysan.
5 Men Egangman, boshqasi yoʻq,
Mendan oʻzga xudo yoʻq!
Senga madad beraman,
Ammo Meni bilmaysan.
6 Mendan boshqasi yoʻqligini
Sharqu gʻarbda hamma bilsin, dedim.
Men Egangman, boshqasi yoʻq!
7 Men yorugʻlik yarataman, zulmat bino qilaman,
Farovonlik yuboraman, kulfat yogʻdiraman.
Men Egangman!
Bularning hammasini Men qilaman!
8 Ey samolar, yuqoridan solihlik yogʻdiring,
Ha, solihlik bulutlardan quyilsin.
Yerdan najot unib chiqsin,
Solihlik bilan birga yashnasin.
Men Egangizman! Men uni yaratganman.”
9 Holingizga voy!
Ey Yaratuvchi bilan bahslashadiganlar!
Tuproqdan yasalgan koʻzayu xumlar!
Axir, loy kulolga: “Nima qilyapsan?” deydimi?!
“Qoʻlingdan ish kelmas ekan!” deb aytadimi?!
10 Tugʻilmagan homila otasiga:
“Nima tugʻdiryapsiz oʻzi?” deb aytadimi?!
Onasiga: “Nimaga meni tugʻyapsiz oʻzi?” deydimi?!
Sizlarning holingizga voy!
11 Isroil xalqining Muqaddas Xudosi,
Uning Yaratuvchisi — Egamiz shunday aytmoqda:
“Xoʻsh, endi Oʻz farzandlarimning
Taqdiri haqida Meni soʻroqqa tutasizmi?!
Oʻz qoʻllarim ijodi toʻgʻrisida
Menga koʻrsatmalar berasizmi?!
12 Zaminni barpo qilgan,
Yer yuzida insonni yaratgan Menman.
Men Oʻz qoʻlim bilan osmonni yoydim,
Barcha samoviy jismlarga Men buyruq berdim.
13 Men Oʻzim Kurushni qoʻzgʻatib,
Unga gʻalaba beraman.
Uning barcha yoʻllarini tekislayman.
U Mening shahrimni quradi.
Porayu mukofot olmasdan
Mening asirlarimni qoʻyib yuboradi.”
Sarvari Olam shunday dedi.
Egamiz tanho Xudo va najotkordir
14 Egamiz aytmoqda: “Misrning boyliklari,
Habashistonning xazinalari seniki boʻladi!
Savo yurtining baland boʻyli odamlari senga keladi.
Ular senga ergashadi.
Zanjirband boʻlib, senga taʼzim qiladi.
Yolvorib: «Ha, Xudo sizning orangizda!
Undan boshqa Xudo yoʻq!» deydi.”
15 Ey Isroil xalqining Xudosi — qutqaruvchi!
Haqiqatan ham, Sen Oʻzini yashiradigan Xudosan.
16 But yasaydiganlar birgalikda uyatga qoldi.
Hammasi sharmandayu sharmisor boʻldi.
17 Isroilni esa Egamiz qutqardi,
To abad najot berdi!
Ey Isroil xalqi, sizlar sharmanda boʻlmaysiz,
To abad uyatga qolmaysiz!
18 Egamiz Samolarni yaratgan,
U Xudodir!
U yerni barpo qilgan, mustahkamlagan.
Yerni boʻsh qilib emas,
Yashashga loyiq qilib yaratgan.
U shunday deb aytmoqda:
“Men Egangizman, boshqasi yoʻq.
19 Men sizlarga yashirin joyda,
Zimziyo yurtda gapirmadim.
Men Yoqub nasliga: «Boʻsh joylardan
Meni qidiring!» deb aytmadim.
Men Egangizman.
Haqiqatni aytaman,
Toʻgʻrisini eʼlon qilaman.
20 Ey xalqlarning omon qolganlari,
Yigʻilinglar, yaqinlashib, birga kelinglar!
Yogʻoch butlarini olib yuradiganlar,
Qutqarmaydigan xudoga ibodat qiladiganlar
Hech narsani anglab yetmaydilar.
21 Gapiring, isbot keltiring.
Oʻzaro maslahatlashing.
Bu toʻgʻrida kim qadimdan xabar berdi?
Azaldan kim aytib bergan edi?
Men Egangiz emasmi?!
Mendan boshqa Xudo yoʻq!
Men odil Xudoman, qutqaruvchiman!
Mendan boshqasi yoʻq.
22 Menga yuz buring, najot topasiz,
Ey zaminning barcha chetlari!
Ha, Men Xudoman, boshqasi yoʻq.
23 Oʻzim haqim ont ichdim ,
Ogʻzimdan toʻgʻri soʻz chiqdi, behuda ketmas:
Mening oldimda har bir odam tiz choʻkadi,
Har bir til Menga sadoqat qasamini ichadi.
24 Men haqimda: «Faqatgina Egamizda adolat, qudrat bor», deb aytadilar.
Mendan gʻazablanganlarning hammasi
Menga keladilar, ular uyalib qoladilar.
25 Ammo butun Isroil nasli
Men — Egasi tufayli najot topadi.
Ular maqtovga sazovor boʻladi.”
45–БОБ
Шоҳ Куруш — Эгамизнинг танлагани
1 Эгам айтар: “Мен шоҳ Курушни ўнг қўлидан тутиб турибман.
Халқларни унга итоат эттирай дея,
Шоҳларни қуролсизлантираман.
Унинг олдида эшиклар очиқ туради,
Дарвозалар ёпилмайди.”
Эгамиз Ўзининг танлагани — Курушга шундай айтмоқда:
2 “Мен Ўзим Сенинг олдингда бораман,
Тоғларни текисликка айлантираман,
Бронза эшикларни парчалайман,
Темир тамбаларни синдираман.
3 Мен Эганг эканлигимни билиб олгин,
Сенинг исмингни айтиб чақираётган Мен
Исроил халқининг Худоси эканлигимни англагин деб,
Яшириб қўйилган бойликларни,
Зулматдаги хазинани сенга бераман.
4 Қулим Ёқуб ҳақи,
Ўзим танлаган Исроил ҳақи,
Сенинг исмингни айтиб чақирдим.
Сенга ном ато қилдим,
Аммо сен Мени билмайсан.
5 Мен Эгангман, бошқаси йўқ,
Мендан ўзга худо йўқ!
Сенга мадад бераман,
Аммо Мени билмайсан.
6 Мендан бошқаси йўқлигини
Шарқу ғарбда ҳамма билсин, дедим.
Мен Эгангман, бошқаси йўқ!
7 Мен ёруғлик яратаман, зулмат бино қиламан,
Фаровонлик юбораман, кулфат ёғдираман.
Мен Эгангман!
Буларнинг ҳаммасини Мен қиламан!
8 Эй самолар, юқоридан солиҳлик ёғдиринг,
Ҳа, солиҳлик булутлардан қуйилсин.
Ердан нажот униб чиқсин,
Солиҳлик билан бирга яшнасин.
Мен Эгангизман! Мен уни яратганман.”
9 Ҳолингизга вой!
Эй Яратувчи билан баҳслашадиганлар!
Тупроқдан ясалган кўзаю хумлар!
Ахир, лой кулолга: “Нима қиляпсан?” дейдими?!
“Қўлингдан иш келмас экан!” деб айтадими?!
10 Туғилмаган ҳомила отасига:
“Нима туғдиряпсиз ўзи?” деб айтадими?!
Онасига: “Нимага мени туғяпсиз ўзи?” дейдими?!
Сизларнинг ҳолингизга вой!
11 Исроил халқининг Муқаддас Худоси,
Унинг Яратувчиси — Эгамиз шундай айтмоқда:
“Хўш, энди Ўз фарзандларимнинг
Тақдири ҳақида Мени сўроққа тутасизми?!
Ўз қўлларим ижоди тўғрисида
Менга кўрсатмалар берасизми?!
12 Заминни барпо қилган,
Ер юзида инсонни яратган Менман.
Мен Ўз қўлим билан осмонни ёйдим,
Барча самовий жисмларга Мен буйруқ бердим.
13 Мен Ўзим Курушни қўзғатиб,
Унга ғалаба бераман.
Унинг барча йўлларини текислайман.
У Менинг шаҳримни қуради.
Пораю мукофот олмасдан
Менинг асирларимни қўйиб юборади.”
Сарвари Олам шундай деди.
Эгамиз танҳо Худо ва нажоткордир
14 Эгамиз айтмоқда: “Мисрнинг бойликлари,
Ҳабашистоннинг хазиналари сеники бўлади!
Саво юртининг баланд бўйли одамлари сенга келади.
Улар сенга эргашади.
Занжирбанд бўлиб, сенга таъзим қилади.
Ёлвориб: «Ҳа, Худо сизнинг орангизда!
Ундан бошқа Худо йўқ!» дейди.”
15 Эй Исроил халқининг Худоси — қутқарувчи!
Ҳақиқатан ҳам, Сен Ўзини яширадиган Худосан.
16 Бут ясайдиганлар биргаликда уятга қолди.
Ҳаммаси шармандаю шармисор бўлди.
17 Исроилни эса Эгамиз қутқарди,
То абад нажот берди!
Эй Исроил халқи, сизлар шарманда бўлмайсиз,
То абад уятга қолмайсиз!
18 Эгамиз Самоларни яратган,
У Худодир!
У ерни барпо қилган, мустаҳкамлаган.
Ерни бўш қилиб эмас,
Яшашга лойиқ қилиб яратган.
У шундай деб айтмоқда:
“Мен Эгангизман, бошқаси йўқ.
19 Мен сизларга яширин жойда,
Зимзиё юртда гапирмадим.
Мен Ёқуб наслига: «Бўш жойлардан
Мени қидиринг!» деб айтмадим.
Мен Эгангизман.
Ҳақиқатни айтаман,
Тўғрисини эълон қиламан.
20 Эй халқларнинг омон қолганлари,
Йиғилинглар, яқинлашиб, бирга келинглар!
Ёғоч бутларини олиб юрадиганлар,
Қутқармайдиган худога ибодат қиладиганлар
Ҳеч нарсани англаб етмайдилар.
21 Гапиринг, исбот келтиринг.
Ўзаро маслаҳатлашинг.
Бу тўғрида ким қадимдан хабар берди?
Азалдан ким айтиб берган эди?
Мен Эгангиз эмасми?!
Мендан бошқа Худо йўқ!
Мен одил Худоман, қутқарувчиман!
Мендан бошқаси йўқ.
22 Менга юз буринг, нажот топасиз,
Эй заминнинг барча четлари!
Ҳа, Мен Худоман, бошқаси йўқ.
23 Ўзим ҳақим онт ичдим ,
Оғзимдан тўғри сўз чиқди, беҳуда кетмас:
Менинг олдимда ҳар бир одам тиз чўкади,
Ҳар бир тил Менга садоқат қасамини ичади.
24 Мен ҳақимда: «Фақатгина Эгамизда адолат, қудрат бор», деб айтадилар.
Мендан ғазабланганларнинг ҳаммаси
Менга келадилар, улар уялиб қоладилар.
25 Аммо бутун Исроил насли
Мен — Эгаси туфайли нажот топади.
Улар мақтовга сазовор бўлади.”
