6–BOB
Egamiz Isroil xalqini qutqarishga vaʼda beradi
1 Shundan soʻng Egamiz Musoga aytdi:
— Firʼavnni nima qilishimni endi koʻrasan. U qudratli kuchimni koʻrgandan keyin, xalqimning ketishiga ijozat beribgina qolmaydi, hatto xalqimni oʻz yurtidan quvib yuboradi.
2 Xudo Musoga yana dedi:
— Men Egangizman. 3 Ibrohimga, Isʼhoqqa va Yoqubga Men Qodir Xudo boʻlib Oʻzimni zohir qildim . Ammo ularga Men, ularning Egasi deb tanilmagan edim . 4 Ular Kanʼon yurtida musofir boʻlib yashagan edilar. Oʻsha yurtni sizlarga beraman, deb ular bilan ahd qildim . 5 Misrliklar qul qilgan Isroil xalqining faryodini aniq eshitdim. Men oʻsha ahdimni yodimda tutaman. 6 Shunday qilib, bu toʻgʻrida Isroil xalqiga Mening shu gapimni yetkaz: “Men Egangizman. Men sizlarni Misrliklarning zulmidan ozod qilaman, qullikdan olib chiqaman. Qudratli kuchim va hukmning buyuk ishlari bilan sizlarni qullikdan ozod qilaman. 7 Men sizlarni Oʻzimning xalqim qilaman, sizlarning Xudoyingiz boʻlaman. Sizlarni Misrliklarning zulmidan xalos qilgan Egangiz Xudo Men ekanligimni oʻshanda bilib olasizlar. 8 Men Ibrohimga, Isʼhoqqa va Yoqubga ont ichib, beraman degan yurtga sizlarni olib boraman. Oʻsha yurtni sizlarga mulk qilib beraman. Men Egangizman.”
9 Muso bu gaplarni Isroil xalqiga aytgan edi, ammo xalq uning gaplariga quloq solmadi. Chunki xalq ogʻir zulm ostida qolib, ruhan tushkunlikka tushgan edi. 10 Shundan keyin Egamiz Musoga aytdi:
11 — Misr firʼavni huzuriga borib ayt: Isroil xalqi Misrdan chiqib ketishiga ijozat bersin.
12 — Gapimga Isroil xalqi quloq solmadi–yu, firʼavn quloq solarmidi?! — dedi Muso. — Qolaversa, yaxshi gapira olmayman–ku!
13 Ammo Egamiz Muso bilan Horunga amr qildi: “Misr firʼavni oldiga qaytib boringlar. Isroil xalqi Misrdan ketishiga ijozat bering, deb talab qilinglar.”
Muso va Horunning nasl–nasabi
14 Baʼzi Isroil qabilalarining urugʻboshilari quyidagilardir:
Yoqubning toʻngʻich oʻgʻli Rubenning Xanoʻx, Palluv, Xazron va Karmi degan oʻgʻillari bor edi. Ulardan Ruben qabilasining urugʻlari kelib chiqqan.
15 Shimoʻnning Yamuvol, Yomin, Oxad, Yoxin, Zoʻxar va Kanʼonlik ayoldan tugʻilgan Shovul degan oʻgʻillari bor edi. Ulardan Shimoʻn qabilasining urugʻlari kelib chiqqan.
16 Levi 137 yil yashadi. Uning Gershon, Qohot va Marori degan oʻgʻillari bor edi. 17 Gershonning Lubnax va Shimax degan oʻgʻillari bor edi. 18 Qohot 133 yil yashadi. Uning Imrom, Izxor, Xevron va Uziyol degan oʻgʻillari bor edi. 19 Marorining Maxli va Mushi degan oʻgʻillari bor edi. Ularning hammasidan Levi qabilasining urugʻlari kelib chiqdi.
20 Imrom 137 yil yashadi. U oʻzining ammasi Yoʻxavadga uylandi. Yoʻxavad Imromga Horun va Musoni tugʻib berdi. 21 Izxorning Koʻrax, Nafax va Zixri degan oʻgʻillari bor edi. 22 Uziyolning Mishail, Elzafan va Sitri degan oʻgʻillari bor edi.
23 Horun Elishbaga uylandi. U Ominadavning qizi, Naxshoʻnning singlisidir. Elishba Horunga toʻrtta oʻgʻil: Nadov, Abihu, Elazar va Itamarni tugʻib berdi. 24 Koʻraxning Aser, Elqana va Abuasaf degan oʻgʻillari bor edi. Ulardan Koʻrax urugʻlari kelib chiqdi. 25 Horunning oʻgʻli Elazar Futiyolning qizlaridan biriga uylandi. Xotini Elazarga Finxazni tugʻib berdi.
Urugʻlari boʻyicha Levi qabilasining urugʻboshilari ana shulardir.
26 Yuqorida aytib oʻtilgan Horun va Musoga Egamiz: “Isroilning har bir oilasi va qabilasini Misrdan olib chiqinglar!” deb amr berdi. 27 Ular: “Isroil xalqini ozod qiling”, deb Misr firʼavniga buyruq berdilar.
Horun Musoning oʻrniga gapiradi
28 Shunday qilib, Egamiz Muso bilan Misrda gaplashganda, 29 unga: “Men Egangizman, senga aytganlarimning hammasini Misr firʼavniga yetkaz!” deb amr bergan edi. 30 Muso esa Egamizning oldida: “Men yaxshi gapira olmayman–ku! Firʼavn mening gapimga quloq solmaydi!” degan edi.
6–БОБ
Эгамиз Исроил халқини қутқаришга ваъда беради
1 Шундан сўнг Эгамиз Мусога айтди:
— Фиръавнни нима қилишимни энди кўрасан. У қудратли кучимни кўргандан кейин, халқимнинг кетишига ижозат берибгина қолмайди, ҳатто халқимни ўз юртидан қувиб юборади.
2 Худо Мусога яна деди:
— Мен Эгангизман. 3 Иброҳимга, Исҳоққа ва Ёқубга Мен Қодир Худо бўлиб Ўзимни зоҳир қилдим . Аммо уларга Мен, уларнинг Эгаси деб танилмаган эдим . 4 Улар Канъон юртида мусофир бўлиб яшаган эдилар. Ўша юртни сизларга бераман, деб улар билан аҳд қилдим . 5 Мисрликлар қул қилган Исроил халқининг фарёдини аниқ эшитдим. Мен ўша аҳдимни ёдимда тутаман. 6 Шундай қилиб, бу тўғрида Исроил халқига Менинг шу гапимни етказ: “Мен Эгангизман. Мен сизларни Мисрликларнинг зулмидан озод қиламан, қулликдан олиб чиқаман. Қудратли кучим ва ҳукмнинг буюк ишлари билан сизларни қулликдан озод қиламан. 7 Мен сизларни Ўзимнинг халқим қиламан, сизларнинг Худойингиз бўламан. Сизларни Мисрликларнинг зулмидан халос қилган Эгангиз Худо Мен эканлигимни ўшанда билиб оласизлар. 8 Мен Иброҳимга, Исҳоққа ва Ёқубга онт ичиб, бераман деган юртга сизларни олиб бораман. Ўша юртни сизларга мулк қилиб бераман. Мен Эгангизман.”
9 Мусо бу гапларни Исроил халқига айтган эди, аммо халқ унинг гапларига қулоқ солмади. Чунки халқ оғир зулм остида қолиб, руҳан тушкунликка тушган эди. 10 Шундан кейин Эгамиз Мусога айтди:
11 — Миср фиръавни ҳузурига бориб айт: Исроил халқи Мисрдан чиқиб кетишига ижозат берсин.
12 — Гапимга Исроил халқи қулоқ солмади–ю, фиръавн қулоқ солармиди?! — деди Мусо. — Қолаверса, яхши гапира олмайман–ку!
13 Аммо Эгамиз Мусо билан Ҳорунга амр қилди: “Миср фиръавни олдига қайтиб боринглар. Исроил халқи Мисрдан кетишига ижозат беринг, деб талаб қилинглар.”
Мусо ва Ҳоруннинг насл–насаби
14 Баъзи Исроил қабилаларининг уруғбошилари қуйидагилардир:
Ёқубнинг тўнғич ўғли Рубеннинг Ханўх, Паллув, Хазрон ва Карми деган ўғиллари бор эди. Улардан Рубен қабиласининг уруғлари келиб чиққан.
15 Шимўннинг Ямувол, Ёмин, Охад, Ёхин, Зўхар ва Канъонлик аёлдан туғилган Шовул деган ўғиллари бор эди. Улардан Шимўн қабиласининг уруғлари келиб чиққан.
16 Леви 137 йил яшади. Унинг Гершон, Қоҳот ва Марори деган ўғиллари бор эди. 17 Гершоннинг Лубнах ва Шимах деган ўғиллари бор эди. 18 Қоҳот 133 йил яшади. Унинг Имром, Изхор, Хеврон ва Узиёл деган ўғиллари бор эди. 19 Марорининг Махли ва Муши деган ўғиллари бор эди. Уларнинг ҳаммасидан Леви қабиласининг уруғлари келиб чиқди.
20 Имром 137 йил яшади. У ўзининг аммаси Йўхавадга уйланди. Йўхавад Имромга Ҳорун ва Мусони туғиб берди. 21 Изхорнинг Кўрах, Нафах ва Зихри деган ўғиллари бор эди. 22 Узиёлнинг Мишаил, Элзафан ва Ситри деган ўғиллари бор эди.
23 Ҳорун Элишбага уйланди. У Оминадавнинг қизи, Нахшўннинг синглисидир. Элишба Ҳорунга тўртта ўғил: Надов, Абиҳу, Элазар ва Итамарни туғиб берди. 24 Кўрахнинг Асер, Элқана ва Абуасаф деган ўғиллари бор эди. Улардан Кўрах уруғлари келиб чиқди. 25 Ҳоруннинг ўғли Элазар Футиёлнинг қизларидан бирига уйланди. Хотини Элазарга Финхазни туғиб берди.
Уруғлари бўйича Леви қабиласининг уруғбошилари ана шулардир.
26 Юқорида айтиб ўтилган Ҳорун ва Мусога Эгамиз: “Исроилнинг ҳар бир оиласи ва қабиласини Мисрдан олиб чиқинглар!” деб амр берди. 27 Улар: “Исроил халқини озод қилинг”, деб Миср фиръавнига буйруқ бердилар.
Ҳорун Мусонинг ўрнига гапиради
28 Шундай қилиб, Эгамиз Мусо билан Мисрда гаплашганда, 29 унга: “Мен Эгангизман, сенга айтганларимнинг ҳаммасини Миср фиръавнига етказ!” деб амр берган эди. 30 Мусо эса Эгамизнинг олдида: “Мен яхши гапира олмайман–ку! Фиръавн менинг гапимга қулоқ солмайди!” деган эди.
