46–BOB
Hukmdor va bayramlarga oid qonunlar
1 Egamiz Rabbiy menga dedi: “Ichki hovlining sharqiy darvozasi haftaning olti kuni davomida yopiq tursin, Shabbat kuni va yangi oy shodiyonasi kuni ochilsin. 2 Hukmdor tashqi hovlidan bu darvoza binosining dahliziga kirib, dahlizning eshigida tursin. Ruhoniy kuydiriladigan va tinchlik qurbonliklarini keltirayotganda, hukmdor dahliz ostonasida turib Xudoga sajda qilsin. Soʻng kelgan yoʻli bilan chiqib ketsin. Darvoza kechgacha ochiq tursin. 3 Har Shabbat va yangi oy shodiyonasi kuni Isroil xalqi bu darvoza oldida turib, Men, Egangizga sajda qilsin. 4 Har Shabbat kuni hukmdor kuydiriladigan qurbonlik uchun oltita nuqsonsiz qoʻzini va bitta nuqsonsiz qoʻchqorni Menga atab olib kelsin. 5 Qoʻchqor bilan birga bir togʻora donni nazr qilsin. Qurbonlik qilinadigan har bir qoʻzi bilan birga xohlagan miqdorda don nazr qilsin. Har bir togʻora don bilan birga sakkiz kosa zaytun moyini nazr qilsin. 6 Yangi oy shodiyonasi kuni bitta nuqsonsiz buzoq, oltita nuqsonsiz qoʻzini va bitta nuqsonsiz qoʻchqorni olib kelsin. 7 Menga atalgan har bir buzoq va qoʻchqor bilan birga bir togʻoradan don nazr qilsin. Qoʻzilar bilan birga esa xohlagan miqdorda don nazr qilsin. Har bir togʻora don bilan birga sakkiz kosa zaytun moyini nazr qilsin. 8 Hukmdor ichkariga kirganda, darvoza binosining dahlizi orqali kirsin va yana oʻsha yoʻl bilan qaytib chiqsin.
9 Belgilangan bayramlarda odamlar Men, Egangizga sajda qilgani keladilar. Shunda ular bir darvozadan kirib, qarshisidagi darvozadan chiqib ketishlari shart. Maʼbad hovlisiga shimoliy darvozadan kirganlar janubiy darvoza orqali chiqishsin. Janubiy darvozadan kirganlar shimoliy darvozadan chiqishsin. 10 Hukmdor xalq bilan birga kirib, xalq bilan birga chiqib ketsin.
11 Shunday qilib, bayramlarda va belgilangan tantanalarda qurbonlik qilinadigan har bir buzoq va qoʻchqor bilan birga bir togʻoradan don nazr qilinadi. Qurbonlik qilinadigan qoʻzilar bilan birga xohlagan miqdorda don nazr qilinishi mumkin. Har bir togʻora don bilan birga sakkiz kosa zaytun moyi nazr qilinadi. 12 Hukmdor koʻngildan chiqarib beradigan tinchlik yoki kuydiriladigan qurbonlikni Men, Egangizga keltirmoqchi boʻlganda, u uchun ichki hovlining sharqiy darvozasi ochilsin. Bu qurbonliklarini u Shabbat kunida keltiradigan qurbonliklarga oʻxshab taqdim qilsin, darvoza binosidan chiqib ketganidan soʻng darvoza berkitilsin.
Kundalik nazrlar
13 Har kuni ertalab nuqsonsiz bir yoshli qoʻzini Men, Egangizga qurbonlik qilib, kuydiringlar. 14 Bu bilan birga, har kuni ertalab don nazrini keltiringlar. Don nazri olti kosa sifatli undan va un bilan aralashtiriladigan uch kosa zaytun moyidan iborat boʻlsin. Kundalik qurbonlik va nazrlarga oid bu qoidaga doimiy ravishda rioya qilinglar. 15 Xullas, har kuni ertalab Menga qoʻzini, donni va zaytun moyini kuydiriladigan qurbonlik qilish uchun olib kelinglar. Bu sizlar uchun abadiy qoida boʻlsin.”
Hukmdorning yerlariga oid qonunlar
16 Egamiz Rabbiy menga dedi: “Agar hukmdor biror oʻgʻliga yerini sovgʻa qilsa, sovgʻa qilingan yer oʻsha oʻgʻlining abadiy merosi boʻlib qoladi. 17 Bordi–yu, hukmdor yerini biror xizmatkoriga sovgʻa qilsa, xizmatkor sovgʻa qilingan yerga Qutlugʻ yilgacha egalik qila oladi. Qutlugʻ yilda yer hukmdorga qaytadi. Hukmdor yerlarini faqatgina oʻz oʻgʻillariga meros qilib berishi mumkin. 18 Boshqa odamlarning yerlarini tortib olish unga taqiqlanadi. U oʻgʻillariga faqat oʻzining qaramogʻida boʻlgan yerlardan meros bersin, xalqimni oʻz yeridan mahrum qilmasin.”
Maʼbad oshxonasi
19 Soʻng oʻsha odam meni darvoza yonidagi yoʻl orqali shimol tomondagi ruhoniylarning muqaddas xonalari oldiga boshlab bordi . Oʻsha yerdan u menga gʻarbdagi, eng chetdagi bir joyni koʻrsatib, 20 dedi: “Anavi — oshxona. Ruhoniylar u yerda ayb va gunoh qurbonliklarining goʻshtini qaynatadilar, nazr qilingan donning unidan non yopadilar. Bu muqaddas nazrlarni tashqi hovliga olib chiqmaslik uchun va xalq muqaddas nazrlarga qoʻl tekkizmasligi uchun oshxona aynan shu yerda joylashgan.”
21 Soʻng u meni yana tashqi hovliga olib chiqib, hovlining toʻrt burchagida joylashgan oshxonalarni koʻrsatdi. 22 Usti ochiq bu toʻrtala oshxona bir xil: uzunligi 40 tirsak , eni 30 tirsak edi. 23 Oshxona devorlari boʻylab oʻchoqlar qurilgan edi. 24 Oʻsha odam menga shunday dedi: “Bu oshxonalar Maʼbadda xizmat qiladiganlar uchun moʻljallangan. Ular bu yerda xalq keltirgan qurbonliklar goʻshtini qaynatadilar.”
46–БОБ
Ҳукмдор ва байрамларга оид қонунлар
1 Эгамиз Раббий менга деди: “Ички ҳовлининг шарқий дарвозаси ҳафтанинг олти куни давомида ёпиқ турсин, Шаббат куни ва янги ой шодиёнаси куни очилсин. 2 Ҳукмдор ташқи ҳовлидан бу дарвоза биносининг даҳлизига кириб, даҳлизнинг эшигида турсин. Руҳоний куйдириладиган ва тинчлик қурбонликларини келтираётганда, ҳукмдор даҳлиз остонасида туриб Худога сажда қилсин. Сўнг келган йўли билан чиқиб кетсин. Дарвоза кечгача очиқ турсин. 3 Ҳар Шаббат ва янги ой шодиёнаси куни Исроил халқи бу дарвоза олдида туриб, Мен, Эгангизга сажда қилсин. 4 Ҳар Шаббат куни ҳукмдор куйдириладиган қурбонлик учун олтита нуқсонсиз қўзини ва битта нуқсонсиз қўчқорни Менга атаб олиб келсин. 5 Қўчқор билан бирга бир тоғора донни назр қилсин. Қурбонлик қилинадиган ҳар бир қўзи билан бирга хоҳлаган миқдорда дон назр қилсин. Ҳар бир тоғора дон билан бирга саккиз коса зайтун мойини назр қилсин. 6 Янги ой шодиёнаси куни битта нуқсонсиз бузоқ, олтита нуқсонсиз қўзини ва битта нуқсонсиз қўчқорни олиб келсин. 7 Менга аталган ҳар бир бузоқ ва қўчқор билан бирга бир тоғорадан дон назр қилсин. Қўзилар билан бирга эса хоҳлаган миқдорда дон назр қилсин. Ҳар бир тоғора дон билан бирга саккиз коса зайтун мойини назр қилсин. 8 Ҳукмдор ичкарига кирганда, дарвоза биносининг даҳлизи орқали кирсин ва яна ўша йўл билан қайтиб чиқсин.
9 Белгиланган байрамларда одамлар Мен, Эгангизга сажда қилгани келадилар. Шунда улар бир дарвозадан кириб, қаршисидаги дарвозадан чиқиб кетишлари шарт. Маъбад ҳовлисига шимолий дарвозадан кирганлар жанубий дарвоза орқали чиқишсин. Жанубий дарвозадан кирганлар шимолий дарвозадан чиқишсин. 10 Ҳукмдор халқ билан бирга кириб, халқ билан бирга чиқиб кетсин.
11 Шундай қилиб, байрамларда ва белгиланган тантаналарда қурбонлик қилинадиган ҳар бир бузоқ ва қўчқор билан бирга бир тоғорадан дон назр қилинади. Қурбонлик қилинадиган қўзилар билан бирга хоҳлаган миқдорда дон назр қилиниши мумкин. Ҳар бир тоғора дон билан бирга саккиз коса зайтун мойи назр қилинади. 12 Ҳукмдор кўнгилдан чиқариб берадиган тинчлик ёки куйдириладиган қурбонликни Мен, Эгангизга келтирмоқчи бўлганда, у учун ички ҳовлининг шарқий дарвозаси очилсин. Бу қурбонликларини у Шаббат кунида келтирадиган қурбонликларга ўхшаб тақдим қилсин, дарвоза биносидан чиқиб кетганидан сўнг дарвоза беркитилсин.
Кундалик назрлар
13 Ҳар куни эрталаб нуқсонсиз бир ёшли қўзини Мен, Эгангизга қурбонлик қилиб, куйдиринглар. 14 Бу билан бирга, ҳар куни эрталаб дон назрини келтиринглар. Дон назри олти коса сифатли ундан ва ун билан аралаштириладиган уч коса зайтун мойидан иборат бўлсин. Кундалик қурбонлик ва назрларга оид бу қоидага доимий равишда риоя қилинглар. 15 Хуллас, ҳар куни эрталаб Менга қўзини, донни ва зайтун мойини куйдириладиган қурбонлик қилиш учун олиб келинглар. Бу сизлар учун абадий қоида бўлсин.”
Ҳукмдорнинг ерларига оид қонунлар
16 Эгамиз Раббий менга деди: “Агар ҳукмдор бирор ўғлига ерини совға қилса, совға қилинган ер ўша ўғлининг абадий мероси бўлиб қолади. 17 Борди–ю, ҳукмдор ерини бирор хизматкорига совға қилса, хизматкор совға қилинган ерга Қутлуғ йилгача эгалик қила олади. Қутлуғ йилда ер ҳукмдорга қайтади. Ҳукмдор ерларини фақатгина ўз ўғилларига мерос қилиб бериши мумкин. 18 Бошқа одамларнинг ерларини тортиб олиш унга тақиқланади. У ўғилларига фақат ўзининг қарамоғида бўлган ерлардан мерос берсин, халқимни ўз еридан маҳрум қилмасин.”
Маъбад ошхонаси
19 Сўнг ўша одам мени дарвоза ёнидаги йўл орқали шимол томондаги руҳонийларнинг муқаддас хоналари олдига бошлаб борди . Ўша ердан у менга ғарбдаги, энг четдаги бир жойни кўрсатиб, 20 деди: “Анави — ошхона. Руҳонийлар у ерда айб ва гуноҳ қурбонликларининг гўштини қайнатадилар, назр қилинган доннинг унидан нон ёпадилар. Бу муқаддас назрларни ташқи ҳовлига олиб чиқмаслик учун ва халқ муқаддас назрларга қўл теккизмаслиги учун ошхона айнан шу ерда жойлашган.”
21 Сўнг у мени яна ташқи ҳовлига олиб чиқиб, ҳовлининг тўрт бурчагида жойлашган ошхоналарни кўрсатди. 22 Усти очиқ бу тўртала ошхона бир хил: узунлиги 40 тирсак , эни 30 тирсак эди. 23 Ошхона деворлари бўйлаб ўчоқлар қурилган эди. 24 Ўша одам менга шундай деди: “Бу ошхоналар Маъбадда хизмат қиладиганлар учун мўлжалланган. Улар бу ерда халқ келтирган қурбонликлар гўштини қайнатадилар.”
