3–BOB
Xudo xalqlarni hukm qiladi
1 Egamiz shunday deydi: “Oʻsha kunlarda Men Yahudo va Quddusning oldingi mavqeini tiklayman. 2 Soʻng barcha xalqlarni yigʻib, Hukm vodiysiga olib tushaman. U yerda xalqim Isroil haqi ular bilan daʼvolashaman, chunki ular Mening xalqimni turli ellarga tarqatib yubordilar. Yurtimni esa oʻzaro boʻlishib oldilar. 3 Ular xalqim uchun qurʼa tashlab, oʻgʻil–qizlarimni sotib yubordilar. Tushgan pulga fohishabozligu aysh–ishrat qildilar.
4 Ey Tir, Sidon va butun Filist xalqi, Menda nima qasdingiz bor?! Sizlar hali Mendan oʻch olmoqchimisiz?! Bordi–yu, niyatingiz shu boʻlsa, Men oʻsha zahotiyoq qilmishingizga yarasha jazoingizni beraman. 5 Sizlar oltinu kumushlarimni tortib oldingiz, qimmatbaho xazinalarimni sajdagohlaringizga olib ketdingiz. 6 Yahudo va Quddus xalqini yunonlarga sotib, oʻz vatanidan yiroq qildingiz. 7 Endi Men Yahudo va Quddus xalqini sizlar sotgan yurtlardan olib chiqaman. Qilmishingizga yarasha jazoingizni beraman. 8 Oʻgʻil–qizlaringizni Yahudo xalqiga sotaman, ular esa farzandlaringizni olisdagi bir xalqqa — Savoliklarga sotishadi.” Zotan, bu soʻzlarni Egamiz aytdi.
9 Xalqlar orasida shunday deb eʼlon qiling:
“Jangga tayyorlanib, jangchilarni safarbar qiling!
Sipohlaringiz hujum qilsin!
10 Omochlaringizdan yasang qilichlar,
Oʻroqlaringizdan qiling nayzalar.
Zaiflar ham qoʻliga qurol tutsin.
11 Ey tevarakdagi xalqlar, shoshiling ,
Qani, hammangiz vodiyda toʻplaning.”
Oʻz sipohlaringni, ey Egam, chaqir!
12 Egamiz shunday deydi:
“Barcha xalqlar boʻlsin safarbar,
Hukm vodiysiga kelishsin ular.
Men u yerda oʻtirarman,
Hamma xalqlar ustidan hukm chiqararman.
13 Qani, kelinglar,
Yetilgan bugʻdoyni oʻrganday ularni oʻringlar,
Pishgan uzumni ezganday , bosib yoʻq qilinglar,
Xumlar toʻlgan,
Ularning qabihliklari bilan toʻlib–toshgan.”
14 Ming–minglab olomon toʻplangan
Hukm vodiysida!
Zotan, yaqinlashgandir
Egamizning kuni Hukm vodiysiga.
15 Quyosh ham, oy ham qoraygan,
Yulduzlar nuri soʻngan.
16 Egam Quddusdan turib hayqirar,
Siondan gulduros ovozi yangrar,
Yeru osmon larzaga kelar.
Ammo Egam Oʻz xalqini panohiga olar,
U Isroil xalqining qoʻrgʻoni boʻlar.
Xudo Oʻz xalqini barakalaydi
17 Egamiz shunday deydi:
“Ey xalqim, shunda sizlar
Egangiz Xudo Men ekanligimni bilasizlar.
Men muqaddas togʻim Sionda qurganman maskan.
Tabarruk bir shahar boʻladi Quddus,
Bosqinchilar endi aslo unga qilmas tajovuz.
18 Oʻsha kuni sut oqar qirlardan,
Uzum sharbati kelar togʻlardan,
Yahudodagi oʻzanlar suvga toʻlar,
Mening uyimdan buloq otilib chiqar,
Akas daraxtlari oʻsadigan qaqroq soylikni sugʻorar.
19 Misr huvullab, Edom boʻm–boʻsh sahroga aylanar.
Oh, Yahudo xalqiga zulm oʻtkazdi ular,
Begunoh odamlarning qonin toʻkdilar.
20-21 Men albatta jazolayman ularni!
Aslo oqlamayman jinoyatchilarni!
Yahudo esa abadiy yashar,
Quddus avlodlar osha barqaror boʻlar.
Men, Egangiz, Sionda qurganman maskan.”
3–БОБ
Худо халқларни ҳукм қилади
1 Эгамиз шундай дейди: “Ўша кунларда Мен Яҳудо ва Қуддуснинг олдинги мавқеини тиклайман. 2 Сўнг барча халқларни йиғиб, Ҳукм водийсига олиб тушаман. У ерда халқим Исроил ҳақи улар билан даъволашаман, чунки улар Менинг халқимни турли элларга тарқатиб юбордилар. Юртимни эса ўзаро бўлишиб олдилар. 3 Улар халқим учун қуръа ташлаб, ўғил–қизларимни сотиб юбордилар. Тушган пулга фоҳишабозлигу айш–ишрат қилдилар.
4 Эй Тир, Сидон ва бутун Филист халқи, Менда нима қасдингиз бор?! Сизлар ҳали Мендан ўч олмоқчимисиз?! Борди–ю, ниятингиз шу бўлса, Мен ўша заҳотиёқ қилмишингизга яраша жазоингизни бераман. 5 Сизлар олтину кумушларимни тортиб олдингиз, қимматбаҳо хазиналаримни саждагоҳларингизга олиб кетдингиз. 6 Яҳудо ва Қуддус халқини юнонларга сотиб, ўз ватанидан йироқ қилдингиз. 7 Энди Мен Яҳудо ва Қуддус халқини сизлар сотган юртлардан олиб чиқаман. Қилмишингизга яраша жазоингизни бераман. 8 Ўғил–қизларингизни Яҳудо халқига сотаман, улар эса фарзандларингизни олисдаги бир халққа — Саволикларга сотишади.” Зотан, бу сўзларни Эгамиз айтди.
9 Халқлар орасида шундай деб эълон қилинг:
“Жангга тайёрланиб, жангчиларни сафарбар қилинг!
Сипоҳларингиз ҳужум қилсин!
10 Омочларингиздан ясанг қиличлар,
Ўроқларингиздан қилинг найзалар.
Заифлар ҳам қўлига қурол тутсин.
11 Эй теваракдаги халқлар, шошилинг ,
Қани, ҳаммангиз водийда тўпланинг.”
Ўз сипоҳларингни, эй Эгам, чақир!
12 Эгамиз шундай дейди:
“Барча халқлар бўлсин сафарбар,
Ҳукм водийсига келишсин улар.
Мен у ерда ўтирарман,
Ҳамма халқлар устидан ҳукм чиқарарман.
13 Қани, келинглар,
Етилган буғдойни ўргандай уларни ўринглар,
Пишган узумни эзгандай , босиб йўқ қилинглар,
Хумлар тўлган,
Уларнинг қабиҳликлари билан тўлиб–тошган.”
14 Минг–минглаб оломон тўпланган
Ҳукм водийсида!
Зотан, яқинлашгандир
Эгамизнинг куни Ҳукм водийсига.
15 Қуёш ҳам, ой ҳам қорайган,
Юлдузлар нури сўнган.
16 Эгам Қуддусдан туриб ҳайқирар,
Сиондан гулдурос овози янграр,
Еру осмон ларзага келар.
Аммо Эгам Ўз халқини паноҳига олар,
У Исроил халқининг қўрғони бўлар.
Худо Ўз халқини баракалайди
17 Эгамиз шундай дейди:
“Эй халқим, шунда сизлар
Эгангиз Худо Мен эканлигимни биласизлар.
Мен муқаддас тоғим Сионда қурганман маскан.
Табаррук бир шаҳар бўлади Қуддус,
Босқинчилар энди асло унга қилмас тажовуз.
18 Ўша куни сут оқар қирлардан,
Узум шарбати келар тоғлардан,
Яҳудодаги ўзанлар сувга тўлар,
Менинг уйимдан булоқ отилиб чиқар,
Акас дарахтлари ўсадиган қақроқ сойликни суғорар.
19 Миср ҳувиллаб, Эдом бўм–бўш саҳрога айланар.
Оҳ, Яҳудо халқига зулм ўтказди улар,
Бегуноҳ одамларнинг қонин тўкдилар.
20-21 Мен албатта жазолайман уларни!
Асло оқламайман жиноятчиларни!
Яҳудо эса абадий яшар,
Қуддус авлодлар оша барқарор бўлар.
Мен, Эгангиз, Сионда қурганман маскан.”
