4–BOB
Xudo yoʻlida yashash
1 Masih bu dunyoda azob chekkani kabi, sizlar ham azob chekishga tayyor turinglar. Zotan, azob chekishga rozi boʻlgan kishi gunohdan yuz oʻgirgan boʻladi. 2 Bunday odam qolgan umrini nafsini qondirishga emas, Xudoning irodasini bajarishga bagʻishlaydi. 3 Sizlar oʻtmishda xudosizlarday yashaganingiz yetar. Oʻsha vaqtlarda axloqsizlik, shahvatparastlik, mayxoʻrlik, aysh–ishrat, kayf–safo, razil butparastlik bilan kun kechirardingizlar. 4 Endi esa atrofdagilar sizlarni koʻrib, hayron boʻlyaptilar. Ularning yaramas qilmishlariga qoʻshilmaganingiz uchun sizlarni haqorat qilyaptilar. 5 Ammo ular oʻz qilmishlari uchun Xudo oldida javob beradilar. Xudo tirigu oʻliklarni hukm etishga tayyor turibdi. 6 Xushxabar nima sababdan eʼlon qilinganini esingizda tutinglar. Toʻgʻri, Xushxabarni eshitgan koʻp odamlar olamdan koʻz yumdi, chunki oʻlim bu dunyoga gunoh natijasida kirib keldi. Ular ham, boshqa insonlar kabi, jisman oʻlimga mubtalo boʻlishdi. Biroq bir kun kelib, Xudo ularga ulugʻvor, yangi hayot ato qiladi .
7 Oxirzamon yaqinlashib qoldi. Aqlingizni yigʻib, doim hushyorlik bilan ibodat qilinglar. 8 Avvalambor, bir–biringizni chin yurakdan yaxshi koʻringlar. Chunki sevgi koʻp gunohlarni yuvadi. 9 Nolimay, ochiq chehra bilan bir–biringizni mehmon qilinglar. 10 Xudo sizlarga bergan inʼomlar bilan bir–biringizga xizmat qilinglar. Xudoning bu boy ehsonlaridan oqilona foydalaninglar. 11 Vaʼzxonmisiz? Shunday vaʼz qilingki, goʻyo siz orqali Xudoning Oʻzi gapirganday boʻlsin. Xizmatchimisiz? Xudoning bergan kuchiga muvofiq xizmat qiling. Toki Iso Masih orqali Xudo har bir ishingizda va har bir soʻzingizda ulugʻlansin. Qudratli Xudoga abadulabad shon–sharaflar boʻlsin. Omin.
Masih uchun azob chekish
12 Ey azizlarim, xuddi gʻayritabiiy hodisa yuz berganday, boshingizga tushgan ogʻir sinovlardan hayron boʻlmanglar. 13 Aksincha, Masihning azoblariga sherik boʻlganingizdan xursand boʻlinglar! Shunday qilsangiz, U oxiratda ulugʻvorlikka burkanib kelganda, qalbingiz yanada koʻproq quvonchga toʻladi. 14 Agar sizlarni Masihga tegishli boʻlganingiz uchun haqorat qilishsa, baxtlisizlar! Axir, Xudoning Ruhi sizlarga madad beradi. U sizlarni Xudoning ulugʻvorligidan bahramand qiladi . 15 Orangizda hech kim qotil, oʻgʻri, badkirdor yoki janjalkash odam sifatida azob chekmasin. 16 Ammo masihiy boʻlganingiz uchun azob cheksangiz, bundan uyalmang, aksincha, sizlarni bunday nomga sazovor qilgan Xudoni ulugʻlang.
17 Xudo dunyoni hukm qiladigan vaqt keldi. U hukmini Oʻz xonadonidan boshlaydi. Agar biz birinchi navbatda hukm qilinadigan boʻlsak, unda Xushxabarni rad etib, Xudoga itoat qilmaganlarning oxirati nima boʻladi? 18 Agar solih odam zoʻrgʻa qutulsa, betavfiqu gunohkorning holi ne kechadi?
19 Shunday ekan, Xudoning irodasiga koʻra, azob chekayotgan boʻlsangiz, yaxshilik qilishda davom etinglar, oʻzingizni sodiq Yaratuvchiga topshiringlar.
4–БОБ
Худо йўлида яшаш
1 Масиҳ бу дунёда азоб чеккани каби, сизлар ҳам азоб чекишга тайёр туринглар. Зотан, азоб чекишга рози бўлган киши гуноҳдан юз ўгирган бўлади. 2 Бундай одам қолган умрини нафсини қондиришга эмас, Худонинг иродасини бажаришга бағишлайди. 3 Сизлар ўтмишда худосизлардай яшаганингиз етар. Ўша вақтларда ахлоқсизлик, шаҳватпарастлик, майхўрлик, айш–ишрат, кайф–сафо, разил бутпарастлик билан кун кечирардингизлар. 4 Энди эса атрофдагилар сизларни кўриб, ҳайрон бўляптилар. Уларнинг ярамас қилмишларига қўшилмаганингиз учун сизларни ҳақорат қиляптилар. 5 Аммо улар ўз қилмишлари учун Худо олдида жавоб берадилар. Худо тиригу ўликларни ҳукм этишга тайёр турибди. 6 Хушхабар нима сабабдан эълон қилинганини эсингизда тутинглар. Тўғри, Хушхабарни эшитган кўп одамлар оламдан кўз юмди, чунки ўлим бу дунёга гуноҳ натижасида кириб келди. Улар ҳам, бошқа инсонлар каби, жисман ўлимга мубтало бўлишди. Бироқ бир кун келиб, Худо уларга улуғвор, янги ҳаёт ато қилади .
7 Охирзамон яқинлашиб қолди. Ақлингизни йиғиб, доим ҳушёрлик билан ибодат қилинглар. 8 Авваламбор, бир–бирингизни чин юракдан яхши кўринглар. Чунки севги кўп гуноҳларни ювади. 9 Нолимай, очиқ чеҳра билан бир–бирингизни меҳмон қилинглар. 10 Худо сизларга берган инъомлар билан бир–бирингизга хизмат қилинглар. Худонинг бу бой эҳсонларидан оқилона фойдаланинглар. 11 Ваъзхонмисиз? Шундай ваъз қилингки, гўё сиз орқали Худонинг Ўзи гапиргандай бўлсин. Хизматчимисиз? Худонинг берган кучига мувофиқ хизмат қилинг. Токи Исо Масиҳ орқали Худо ҳар бир ишингизда ва ҳар бир сўзингизда улуғлансин. Қудратли Худога абадулабад шон–шарафлар бўлсин. Омин.
Масиҳ учун азоб чекиш
12 Эй азизларим, худди ғайритабиий ҳодиса юз бергандай, бошингизга тушган оғир синовлардан ҳайрон бўлманглар. 13 Аксинча, Масиҳнинг азобларига шерик бўлганингиздан хурсанд бўлинглар! Шундай қилсангиз, У охиратда улуғворликка бурканиб келганда, қалбингиз янада кўпроқ қувончга тўлади. 14 Агар сизларни Масиҳга тегишли бўлганингиз учун ҳақорат қилишса, бахтлисизлар! Ахир, Худонинг Руҳи сизларга мадад беради. У сизларни Худонинг улуғворлигидан баҳраманд қилади . 15 Орангизда ҳеч ким қотил, ўғри, бадкирдор ёки жанжалкаш одам сифатида азоб чекмасин. 16 Аммо масиҳий бўлганингиз учун азоб чексангиз, бундан уялманг, аксинча, сизларни бундай номга сазовор қилган Худони улуғланг.
17 Худо дунёни ҳукм қиладиган вақт келди. У ҳукмини Ўз хонадонидан бошлайди. Агар биз биринчи навбатда ҳукм қилинадиган бўлсак, унда Хушхабарни рад этиб, Худога итоат қилмаганларнинг охирати нима бўлади? 18 Агар солиҳ одам зўрға қутулса, бетавфиқу гуноҳкорнинг ҳоли не кечади?
19 Шундай экан, Худонинг иродасига кўра, азоб чекаётган бўлсангиз, яхшилик қилишда давом этинглар, ўзингизни содиқ Яратувчига топширинглар.
