18–BOB
Yatro Musoni ziyorat qiladi
1 Midiyon yurtining ruhoniysi Yatro Musoning qaynatasi edi. Xudo Musoga va Oʻz xalqi Isroilga hamma qilganlarini, Egamiz Isroil xalqini Misrdan qanday qilib olib chiqqanini u eshitdi. 2 Muso xotinini otasi yoniga joʻnatib yuborganda , Yatro Musoning xotini Zippura bilan 3 ikkala oʻgʻlini yoniga olgan edi. Muso: “Men begona yurtda musofir boʻlib qoldim”, deb toʻngʻich oʻgʻliga Gershom deb ism qoʻygan edi. 4 Soʻngra: “Ota–bobolarimning Xudosi menga madad berdi, meni firʼavnning qilichidan qutqardi ”, deb ikkinchi oʻgʻliga Eliazar deb ism qoʻygandi.
5 Qaynatasi Musoning xotini va oʻgʻillarini Xudoning muqaddas togʻi etagiga — sahroda Muso tikkan chodirga boshlab keldi. 6 Yatro Musoga: “Men, qaynatang Yatro, xotining va ikkala oʻgʻling bilan birga sening yoningga boryapmiz”, deb xabar berdi. 7 Muso qaynatasini kutib olgani chiqdi va unga taʼzim qilib, oʻpdi. Ikkovlari bir–biridan hol–ahvol soʻrab, chodirga kirishdi. 8 Egamiz Isroil xalqi uchun firʼavnni va Misr xalqini nimalar qilganini, Isroil xalqi yoʻlda chekkan azob–uqubatlarni, Egamiz ularni qanday qutqarganini Muso qaynatasiga aytib berdi. 9 Egamiz Isroil xalqiga qilgan yaxshiliklari uchun, ularni Misrliklarning qoʻlidan qutqargani uchun Yatro sevinib, shunday dedi:
10 — Sizlarni Misrliklarning va firʼavnning qoʻlidan qutqargan Egamizga hamdu sanolar boʻlsin! Isroil xalqini Misrliklarning zulmidan U qutqardi. 11 Egamiz boshqa hamma xudolardan ulugʻ ekanini endi bilaman. Egamiz Oʻz xalqini takabbur Misrliklarning qoʻlidan xalos qildi.
12 Soʻngra Musoning qaynatasi Yatro Xudoga kuydiriladigan qurbonlik va boshqa qurbonliklar keltirdi. Horun va barcha Isroil oqsoqollari Musoning qaynatasi bilan Xudoning huzurida muqaddas taom yegani kelishdi.
Yatroning maslahati
13 Ertasi kuni Muso hukm kursisiga oʻtirib, xalqning janjallarini ajrim qila boshladi. Xalq Musoning atrofida ertalabdan kechgacha tik turdi. 14 Qaynatasi Musoning xalq uchun qilayotgan hamma ishlarini koʻrgach, aytdi:
— Nimaga shuncha ishni bir oʻzing qilyapsan? Odamlar sendan yordam soʻrash uchun kun boʻyi tik turishdi.
15 Shunda Muso qaynatasiga aytdi:
— Odamlar Xudoning hukmini bilish uchun mening oldimga kelishadi. 16 Qachon bir janjalli ish boʻlsa ham mening oldimga kelishadi. Men esa ikkala tomon oʻrtasida qaror chiqarib, Xudoning qonun–qoidalarini ularga aytaman.
17 — Bu yoʻl yaxshi emas, — dedi qaynatasi Musoga. 18 — Ham oʻzingni, ham yoningdagi xalqni qiynayapsan. Bu ish juda ogʻir yuk, bir oʻzing bajara olmaysan. 19 Gapimga quloq sol, senga bir maslahat berayin: Xudo senga yor boʻlsin. Xudoning huzurida xalq uchun sen vositachi boʻlishing kerak. Xalqning bahs–munozaralarini Xudoga sen yetkazishing lozim. 20 Xudoning qarorini xalqqa sen ayt, Xudoning qonun–qoidalarini oʻrgat, ular qanday qilib toʻgʻri hayot kechirishlari kerakligini koʻrsat. 21 Ammo bularga qoʻshimcha qilib, sen Xudodan qoʻrqqan, diyonatli, tamadan nafratlanadigan, layoqatli odamlarni tanlab ol. Ularni xalq tepasiga mingboshi, yuzboshi, ellikboshi, oʻnboshi qilib tayinla. 22 Bu odamlar hamma haq masalalar ustidan qaror qilib, xalqqa xizmat qilishsin. Juda muhim yoki juda qiyin masalalarni esa senga olib kelishlari mumkin. Kichikroq ishlarni oʻzlari koʻrib chiqaversin. Ular sen uchun ishni osonroq qilib, ogʻirlikni koʻtarishda senga yordam beradilar. 23 Agar Xudo shu maslahatlarimni yuragingga solsa, sen tazyiqlarga bardosh bera olasan. Hamma tinchgina oʻz joyiga ketadi.
24 Muso qaynatasining gapiga quloq soldi. U nima aytgan boʻlsa, hammasini qildi. 25 Isroil xalqi orasidan layoqatli odamlarni tanlab oldi. Oʻsha odamlarni mingboshi, yuzboshi, ellikboshi, oʻnboshi qilib tayinladi. 26 Ular hamma masalalarni adolatli hal qilardilar. Qiyin masalalarni Musoga olib kelishar, kichikroq ishlarni esa oʻzlari qarab chiqishardi. 27 Shundan keyin Muso qaynatasiga ijozat berdi. Yatro oʻz yurtiga qaytib ketdi.
18–БОБ
Ятро Мусони зиёрат қилади
1 Мидиён юртининг руҳонийси Ятро Мусонинг қайнатаси эди. Худо Мусога ва Ўз халқи Исроилга ҳамма қилганларини, Эгамиз Исроил халқини Мисрдан қандай қилиб олиб чиққанини у эшитди. 2 Мусо хотинини отаси ёнига жўнатиб юборганда , Ятро Мусонинг хотини Зиппура билан 3 иккала ўғлини ёнига олган эди. Мусо: “Мен бегона юртда мусофир бўлиб қолдим”, деб тўнғич ўғлига Гершом деб исм қўйган эди. 4 Сўнгра: “Ота–боболаримнинг Худоси менга мадад берди, мени фиръавннинг қиличидан қутқарди ”, деб иккинчи ўғлига Элиазар деб исм қўйганди.
5 Қайнатаси Мусонинг хотини ва ўғилларини Худонинг муқаддас тоғи этагига — саҳрода Мусо тиккан чодирга бошлаб келди. 6 Ятро Мусога: “Мен, қайнатанг Ятро, хотининг ва иккала ўғлинг билан бирга сенинг ёнингга боряпмиз”, деб хабар берди. 7 Мусо қайнатасини кутиб олгани чиқди ва унга таъзим қилиб, ўпди. Икковлари бир–биридан ҳол–аҳвол сўраб, чодирга киришди. 8 Эгамиз Исроил халқи учун фиръавнни ва Миср халқини нималар қилганини, Исроил халқи йўлда чеккан азоб–уқубатларни, Эгамиз уларни қандай қутқарганини Мусо қайнатасига айтиб берди. 9 Эгамиз Исроил халқига қилган яхшиликлари учун, уларни Мисрликларнинг қўлидан қутқаргани учун Ятро севиниб, шундай деди:
10 — Сизларни Мисрликларнинг ва фиръавннинг қўлидан қутқарган Эгамизга ҳамду санолар бўлсин! Исроил халқини Мисрликларнинг зулмидан У қутқарди. 11 Эгамиз бошқа ҳамма худолардан улуғ эканини энди биламан. Эгамиз Ўз халқини такаббур Мисрликларнинг қўлидан халос қилди.
12 Сўнгра Мусонинг қайнатаси Ятро Худога куйдириладиган қурбонлик ва бошқа қурбонликлар келтирди. Ҳорун ва барча Исроил оқсоқоллари Мусонинг қайнатаси билан Худонинг ҳузурида муқаддас таом егани келишди.
Ятронинг маслаҳати
13 Эртаси куни Мусо ҳукм курсисига ўтириб, халқнинг жанжалларини ажрим қила бошлади. Халқ Мусонинг атрофида эрталабдан кечгача тик турди. 14 Қайнатаси Мусонинг халқ учун қилаётган ҳамма ишларини кўргач, айтди:
— Нимага шунча ишни бир ўзинг қиляпсан? Одамлар сендан ёрдам сўраш учун кун бўйи тик туришди.
15 Шунда Мусо қайнатасига айтди:
— Одамлар Худонинг ҳукмини билиш учун менинг олдимга келишади. 16 Қачон бир жанжалли иш бўлса ҳам менинг олдимга келишади. Мен эса иккала томон ўртасида қарор чиқариб, Худонинг қонун–қоидаларини уларга айтаман.
17 — Бу йўл яхши эмас, — деди қайнатаси Мусога. 18 — Ҳам ўзингни, ҳам ёнингдаги халқни қийнаяпсан. Бу иш жуда оғир юк, бир ўзинг бажара олмайсан. 19 Гапимга қулоқ сол, сенга бир маслаҳат берайин: Худо сенга ёр бўлсин. Худонинг ҳузурида халқ учун сен воситачи бўлишинг керак. Халқнинг баҳс–мунозараларини Худога сен етказишинг лозим. 20 Худонинг қарорини халққа сен айт, Худонинг қонун–қоидаларини ўргат, улар қандай қилиб тўғри ҳаёт кечиришлари кераклигини кўрсат. 21 Аммо буларга қўшимча қилиб, сен Худодан қўрққан, диёнатли, тамадан нафратланадиган, лаёқатли одамларни танлаб ол. Уларни халқ тепасига мингбоши, юзбоши, элликбоши, ўнбоши қилиб тайинла. 22 Бу одамлар ҳамма ҳақ масалалар устидан қарор қилиб, халққа хизмат қилишсин. Жуда муҳим ёки жуда қийин масалаларни эса сенга олиб келишлари мумкин. Кичикроқ ишларни ўзлари кўриб чиқаверсин. Улар сен учун ишни осонроқ қилиб, оғирликни кўтаришда сенга ёрдам берадилар. 23 Агар Худо шу маслаҳатларимни юрагингга солса, сен тазйиқларга бардош бера оласан. Ҳамма тинчгина ўз жойига кетади.
24 Мусо қайнатасининг гапига қулоқ солди. У нима айтган бўлса, ҳаммасини қилди. 25 Исроил халқи орасидан лаёқатли одамларни танлаб олди. Ўша одамларни мингбоши, юзбоши, элликбоши, ўнбоши қилиб тайинлади. 26 Улар ҳамма масалаларни адолатли ҳал қилардилар. Қийин масалаларни Мусога олиб келишар, кичикроқ ишларни эса ўзлари қараб чиқишарди. 27 Шундан кейин Мусо қайнатасига ижозат берди. Ятро ўз юртига қайтиб кетди.
