2–BOB
Masih tufayli azoblarga dosh berish haqida
1 Timoʻtiy oʻgʻlim, bardam boʻl. Buning uchun Iso Masih orqali koʻrsatilgan Xudoning inoyatiga tayangin. 2 Sen koʻp shohidlar huzurida Xushxabar haqida taʼlim berganimni eshitgansan. Endi bu taʼlimotni boshqalarga ham oʻrgatishga qobiliyati bor, ishonchli odamlarga topshirgin. 3 Iso Masihning yaxshi bir askari kabi, men bilan birga azob chekishga tayyor turgin. 4 Harbiy xizmatdagi askar tirikchilik ishlari bilan band boʻlmaydi, chunki qoʻmondonini mamnun qilishni istaydi. 5 Shuningdek, musobaqada qatnashgan kishi qoidaga rioya qilmasa, gʻalaba tojini kiymaydi. 6 Mehnat qilgan dehqon olgan hosilidan birinchi boʻlib bahramand boʻlishi lozim. 7 Aytganlarim haqida mulohaza qil, bularni tushunib olishingga Rabbimiz Iso senga yordam beradi.
8 Dovud naslidan boʻlgan Iso Masih oʻlikdan tirilganini doimo yodingda tut! Men targʻib qilayotgan Xushxabar shudir! 9 Ana shu Xushxabar uchun men azoblarga duchor boʻlyapman, hatto jinoyatchiday zanjirband qilindim . Ammo Xudoning kalomini zanjirlab boʻlmaydi! 10 Shunday ekan, Xudoning tanlagan odamlari Iso Masih bergan najotdan bahramand boʻlsinlar, abadiy ulugʻvorlikka erishsinlar deb, men hamma narsaga chidab kelyapman. 11 Quyidagi gap toʻgʻri va asoslidir:
“Agar biz Masih bilan birga oʻlgan boʻlsak,
U bilan birga ham yashaymiz.
12 Agar qiyinchiliklarga chidasak,
U bilan birga hukmronlik qilamiz.
Bordi–yu, Uni rad etsak,
U ham bizni rad etadi.
13 Sodiq boʻlmasak ham,
Masih sodiq boʻlib qolaveradi,
Axir, U Oʻz tabiatiga qarshi chiqa olmaydi.”
Haqiqatga sodiq qolish haqida
14 Bu gaplarni imonlilarga eslatib tur, ularga Xudoning nomidan qatʼiy buyur: mayda–chuyda gaplar yuzasidan bahslashmasinlar. Bunday bahslar befoyda, tinglovchilarga faqat zarar yetkazadi, xolos. 15 Xudoning oldida yorugʻ yuz bilan tura olishing uchun astoydil mehnat qil. Oʻz ishidan uyalmaydigan, haqiqat kalomini toʻgʻri oʻrgatadigan xizmatchi boʻlgin. 16 Xudodan uzoqlashtiradigan quruq gaplardan qoch. Bunday gaplarga berilgan odamlar tobora betavfiq boʻlib boradi. 17 Ularning bu taʼlimoti oʻlat kabi yoyiladi. Mana, Xumanayos bilan Filitus ham shunday odamlar jumlasidan. 18 Ular toʻgʻri yoʻldan ozganlar. Biz allaqachon oʻlikdan tirildik , deb baʼzilarni imonidan qaytaryaptilar. 19 Ammo Xudo asos solgan poydevor mustahkam turibdi. Bu poydevor ustiga shunday soʻzlar bitilgan: “Egamiz Oʻzinikilarni biladi” va “Egamizning nomini tilga olgan har bir odam yomonlikdan uzoqlashsin.”
20 Katta bir uyda nafaqat oltin va kumush idishlar, balki yogʻoch va sopol idishlar ham bor. Oltin va kumush idishlar xoʻjayinga sharaf keltiradi, qadrsiz idishlar esa uning obroʻyini toʻkadi. 21 Kim oʻzini men aytgan yomonliklardan poklasa, Egasi uchun sharaf keltiradigan idishday boʻladi. Bunday odam Egasiga xizmat qilishga bagʻishlangan, har bir yaxshi ish qilishga tayyor boʻladi.
22 Oʻgʻlim, yoshlik ehtiroslaridan qoch. Chin yurakdan Rabbimiz Isoga iltijo qilgan odamlar bilan birga solihlik, imon, mehr–muhabbat va tinchlik payida boʻlgin. 23 Ahmoqona, bemaʼni bahslardan uzoqlash. Oʻzing bilasan–ku, bular faqat janjal keltirib chiqaradi. 24 Rabbimiz Isoning quli esa janjalkash boʻlmasligi kerak. Aksincha, u hammaga mehribon, taʼlim berishga qobiliyatli, sabr–toqatli boʻlishi lozim. 25 U oʻz raqiblarini muloyimlik bilan yoʻlga solsin. Kim bilsin, balki Xudo ularni tavbaga olib kelar?! Shunda ular haqiqatni bilib, 26 oʻzlariga kelarlar, iblisning tuzogʻidan qutulib qolarlar. Axir, iblis ularni asir qilib, oʻziga tobe qilib olgan.
2–БОБ
Масиҳ туфайли азобларга дош бериш ҳақида
1 Тимўтий ўғлим, бардам бўл. Бунинг учун Исо Масиҳ орқали кўрсатилган Худонинг иноятига таянгин. 2 Сен кўп шоҳидлар ҳузурида Хушхабар ҳақида таълим берганимни эшитгансан. Энди бу таълимотни бошқаларга ҳам ўргатишга қобилияти бор, ишончли одамларга топширгин. 3 Исо Масиҳнинг яхши бир аскари каби, мен билан бирга азоб чекишга тайёр тургин. 4 Ҳарбий хизматдаги аскар тирикчилик ишлари билан банд бўлмайди, чунки қўмондонини мамнун қилишни истайди. 5 Шунингдек, мусобақада қатнашган киши қоидага риоя қилмаса, ғалаба тожини киймайди. 6 Меҳнат қилган деҳқон олган ҳосилидан биринчи бўлиб баҳраманд бўлиши лозим. 7 Айтганларим ҳақида мулоҳаза қил, буларни тушуниб олишингга Раббимиз Исо сенга ёрдам беради.
8 Довуд наслидан бўлган Исо Масиҳ ўликдан тирилганини доимо ёдингда тут! Мен тарғиб қилаётган Хушхабар шудир! 9 Ана шу Хушхабар учун мен азобларга дучор бўляпман, ҳатто жиноятчидай занжирбанд қилиндим . Аммо Худонинг каломини занжирлаб бўлмайди! 10 Шундай экан, Худонинг танлаган одамлари Исо Масиҳ берган нажотдан баҳраманд бўлсинлар, абадий улуғворликка эришсинлар деб, мен ҳамма нарсага чидаб келяпман. 11 Қуйидаги гап тўғри ва асослидир:
“Агар биз Масиҳ билан бирга ўлган бўлсак,
У билан бирга ҳам яшаймиз.
12 Агар қийинчиликларга чидасак,
У билан бирга ҳукмронлик қиламиз.
Борди–ю, Уни рад этсак,
У ҳам бизни рад этади.
13 Содиқ бўлмасак ҳам,
Масиҳ содиқ бўлиб қолаверади,
Ахир, У Ўз табиатига қарши чиқа олмайди.”
Ҳақиқатга содиқ қолиш ҳақида
14 Бу гапларни имонлиларга эслатиб тур, уларга Худонинг номидан қатъий буюр: майда–чуйда гаплар юзасидан баҳслашмасинлар. Бундай баҳслар бефойда, тингловчиларга фақат зарар етказади, холос. 15 Худонинг олдида ёруғ юз билан тура олишинг учун астойдил меҳнат қил. Ўз ишидан уялмайдиган, ҳақиқат каломини тўғри ўргатадиган хизматчи бўлгин. 16 Худодан узоқлаштирадиган қуруқ гаплардан қоч. Бундай гапларга берилган одамлар тобора бетавфиқ бўлиб боради. 17 Уларнинг бу таълимоти ўлат каби ёйилади. Мана, Хуманаёс билан Филитус ҳам шундай одамлар жумласидан. 18 Улар тўғри йўлдан озганлар. Биз аллақачон ўликдан тирилдик , деб баъзиларни имонидан қайтаряптилар. 19 Аммо Худо асос солган пойдевор мустаҳкам турибди. Бу пойдевор устига шундай сўзлар битилган: “Эгамиз Ўзиникиларни билади” ва “Эгамизнинг номини тилга олган ҳар бир одам ёмонликдан узоқлашсин.”
20 Катта бир уйда нафақат олтин ва кумуш идишлар, балки ёғоч ва сопол идишлар ҳам бор. Олтин ва кумуш идишлар хўжайинга шараф келтиради, қадрсиз идишлар эса унинг обрўйини тўкади. 21 Ким ўзини мен айтган ёмонликлардан покласа, Эгаси учун шараф келтирадиган идишдай бўлади. Бундай одам Эгасига хизмат қилишга бағишланган, ҳар бир яхши иш қилишга тайёр бўлади.
22 Ўғлим, ёшлик эҳтиросларидан қоч. Чин юракдан Раббимиз Исога илтижо қилган одамлар билан бирга солиҳлик, имон, меҳр–муҳаббат ва тинчлик пайида бўлгин. 23 Аҳмоқона, бемаъни баҳслардан узоқлаш. Ўзинг биласан–ку, булар фақат жанжал келтириб чиқаради. 24 Раббимиз Исонинг қули эса жанжалкаш бўлмаслиги керак. Аксинча, у ҳаммага меҳрибон, таълим беришга қобилиятли, сабр–тоқатли бўлиши лозим. 25 У ўз рақибларини мулойимлик билан йўлга солсин. Ким билсин, балки Худо уларни тавбага олиб келар?! Шунда улар ҳақиқатни билиб, 26 ўзларига келарлар, иблиснинг тузоғидан қутулиб қоларлар. Ахир, иблис уларни асир қилиб, ўзига тобе қилиб олган.
