9–BOB
Donolik va ahmoqlik
1 Donolik uy qurdi,
uyining yetti ustunini qoʻydi.
2 Qurbonlik keltirdi,
sharob tayyorlab, dasturxon yozdi.
3 Xizmatkorlarini shaharning eng baland joyiga yuborib,
ular orqali:
4 “Kim sodda boʻlsa, bu yoqqa kelsin”, — deb chaqirdi,
aqlsizlarga shunday dedi:
5 “Kelinglar, taomimdan yenglar.
Men tayyorlagan sharobdan ichinglar.
6 Gʻaflatdan voz kechinglar, shunda yashaysizlar,
idrok yoʻlidan yuringlar.”
7 Mazax qiluvchiga tanbeh bergan tahqirlanadi,
fosiqning xatosini aytgan haqoratlanadi.
8 Mazax qiluvchiga tanbeh berma,
aks holda, u sendan nafratlanadi.
Donoga tanbeh ber, shunda u seni sevadi.
9 Donoga oʻrgatsang, yanada donoroq boʻladi.
Solihni oʻqitsang, bilimini koʻpaytiradi.
10 Egamizdan qoʻrqish donolikning boshidir ,
Muqaddas Xudoni bilish idrokdir.
11 Chunki donolik tufayli umringga umr qoʻshiladi.
12 Dono boʻlsang oʻzingga foyda,
mazax qilsang oʻzing jabr tortasan.
13 Ahmoq ayol shallaqi va farosatsizdir,
u hech narsani bilmaydi.
14 Uyining eshigi oldida,
shaharning eng baland joyida oʻtirib,
15 yoʻlida toʻgʻri yurgan,
yonidan oʻtib ketayotganlarni:
16 “Kimki sodda boʻlsa, bu yoqqa kelsin”, — deb chaqiradi,
aqlsizlarga shunday deydi:
17 “Oʻgʻirlangan suv shirindir,
berkitib yeyilgan non mazali.”
18 Lekin u yerda arvohlar borligini,
uning mehmonlari oʻliklar diyorining qaʼrida ekanligini bilmaydilar.
9–БОБ
Донолик ва аҳмоқлик
1 Донолик уй қурди,
уйининг етти устунини қўйди.
2 Қурбонлик келтирди,
шароб тайёрлаб, дастурхон ёзди.
3 Хизматкорларини шаҳарнинг энг баланд жойига юбориб,
улар орқали:
4 “Ким содда бўлса, бу ёққа келсин”, — деб чақирди,
ақлсизларга шундай деди:
5 “Келинглар, таомимдан енглар.
Мен тайёрлаган шаробдан ичинглар.
6 Ғафлатдан воз кечинглар, шунда яшайсизлар,
идрок йўлидан юринглар.”
7 Мазах қилувчига танбеҳ берган таҳқирланади,
фосиқнинг хатосини айтган ҳақоратланади.
8 Мазах қилувчига танбеҳ берма,
акс ҳолда, у сендан нафратланади.
Донога танбеҳ бер, шунда у сени севади.
9 Донога ўргатсанг, янада донороқ бўлади.
Солиҳни ўқитсанг, билимини кўпайтиради.
10 Эгамиздан қўрқиш доноликнинг бошидир ,
Муқаддас Худони билиш идрокдир.
11 Чунки донолик туфайли умрингга умр қўшилади.
12 Доно бўлсанг ўзингга фойда,
мазах қилсанг ўзинг жабр тортасан.
13 Аҳмоқ аёл шаллақи ва фаросатсиздир,
у ҳеч нарсани билмайди.
14 Уйининг эшиги олдида,
шаҳарнинг энг баланд жойида ўтириб,
15 йўлида тўғри юрган,
ёнидан ўтиб кетаётганларни:
16 “Кимки содда бўлса, бу ёққа келсин”, — деб чақиради,
ақлсизларга шундай дейди:
17 “Ўғирланган сув шириндир,
беркитиб ейилган нон мазали.”
18 Лекин у ерда арвоҳлар борлигини,
унинг меҳмонлари ўликлар диёрининг қаърида эканлигини билмайдилар.
