54–BOB
Xudoning Oʻz xalqiga boʻlgan sevgisi
1 Egam aytar: “Ey bola koʻrmagan bepusht ayol!
Shodlikdan hayqir!
Ey toʻlgʻoq ogʻrigʻini bilmagan ayol!
Sevinchdan hayqir!
Axir, tashlab ketilgan ayolning bolalari
Eri bor xotinnikidan ham koʻproq boʻladi.
2 Chodiring joyini kengaytirgin,
Chodiring pardalarini keng choʻzdirgin!
Hech narsani ayama!
Arqonlaringni uzun tashlagin,
Qoziqlaringni mahkam qoqqin!
3 Axir, mulking oʻngu soʻlga kengayib ketadi.
Avloding xalqlarni mulk qilib oladi,
Ular tashlandiq shaharlarni toʻldiradi.
4 Qoʻrqma, uyatga qolmaysan,
Uyalma, sharmanda boʻlmaysan!
Axir, sen yoshligingdagi sharmandalikni unutasan,
Bevaligingdagi sharmandalikni boshqa eslamaysan.
5 Zotan, Men, Yaratuvching, sening ering boʻlaman.
Mening nomim Sarvari Olamdir!
Men, Isroil xalqining Muqaddas Xudosi, qutqaruvchingman,
Men butun yer yuzining Xudosi deb atalaman.
6 Ey Isroil! Sen tashlab ketilgan,
Ruhi azoblangan ayoldaysan.
Rad etilgan, yosh juvondaysan.
Ammo Men, Egang, seni chaqirib olaman,
— demoqda Xudoying. —
7 Qisqa vaqtga Men seni tark etgandim,
Buyuk shafqat ila seni qaytarib olaman.
8 Qattiq gʻazabda sendan bir lahzaga yuz oʻgirgandim,
Endi tuganmas mehr bilan senga rahm qilaman,
— demoqda qutqaruvching — Egamiz. —
9 Ha, Men uchun bu Nuh davri kabidir.
Endi yer yuzini Nuh toʻfoni kabi,
Hech qachon suv bosmaydi, deb ont ichganman.
Xuddi shunday qilib, yana ont ichaman:
«Hech qachon sendan gʻazablanmayman,
Senga jahl qilmayman!»
10 Togʻlar oʻrnidan qoʻzgʻalsa ham,
Tepaliklar tebransa ham,
Mening sodiq sevgim sendan ketmaydi,
Mening tinchlik ahdim oʻzgarmaydi.”
Seni sevuvchi Egamizning kalomi shudir.
Boʻlajak Quddus
11 Egam aytar: “Ey mazlum shahar!
Boʻronlarda qolding, ammo hech kim seni yupatmadi!
Mana, Men firuza toshlar ishlatib, seni qayta quraman.
Zangori yoqut toshlardan senga poydevor qoʻyaman.
12 Minoralaringni yoqutlardan quraman,
Darvozalaringni gavharlardan qilaman,
Barcha devorlaringni qimmatbaho toshlardan quraman.
13 Hamma bolalaringga Men, Egang, taʼlim beraman,
Farzandlaringning tinchligi buyuk boʻladi.
14 Men seni dushmanlaringdan xalos qilganimda
Sen bexatar boʻlasan.
Zulm sendan uzoqda boʻladi,
Halokatdan qoʻrqmaysan,
Chunki u senga yaqinlashmaydi.
15 Agar kimdir senga hujum qilsa,
Bilginki, uni Men qilmagan boʻlaman.
Senga hujum qilgan har kim magʻlub boʻladi.
16 Temirchiga qara!
U toshkoʻmir choʻgʻini puflaydi,
Qotillik uchun qurol yasaydi.
Uni Men yaratganman.
Vayron qilsin deb,
Bosqinchini ham Men yaratdim.
17 Senga qarshi yasalgan
Hech qanday qurol senga bas kela olmaydi.
Sen bilan daʼvolashgan har bir odamning
Daʼvolarini sen yoʻqqa chiqarasan.
Mening qullarimga ana shular nasib qiladi,
Oʻzim ularga gʻalaba ato qilaman.”
Egamizning kalomi shudir.
54–БОБ
Худонинг Ўз халқига бўлган севгиси
1 Эгам айтар: “Эй бола кўрмаган бепушт аёл!
Шодликдан ҳайқир!
Эй тўлғоқ оғриғини билмаган аёл!
Севинчдан ҳайқир!
Ахир, ташлаб кетилган аёлнинг болалари
Эри бор хотинникидан ҳам кўпроқ бўлади.
2 Чодиринг жойини кенгайтиргин,
Чодиринг пардаларини кенг чўздиргин!
Ҳеч нарсани аяма!
Арқонларингни узун ташлагин,
Қозиқларингни маҳкам қоққин!
3 Ахир, мулкинг ўнгу сўлга кенгайиб кетади.
Авлодинг халқларни мулк қилиб олади,
Улар ташландиқ шаҳарларни тўлдиради.
4 Қўрқма, уятга қолмайсан,
Уялма, шарманда бўлмайсан!
Ахир, сен ёшлигингдаги шармандаликни унутасан,
Бевалигингдаги шармандаликни бошқа эсламайсан.
5 Зотан, Мен, Яратувчинг, сенинг эринг бўламан.
Менинг номим Сарвари Оламдир!
Мен, Исроил халқининг Муқаддас Худоси, қутқарувчингман,
Мен бутун ер юзининг Худоси деб аталаман.
6 Эй Исроил! Сен ташлаб кетилган,
Руҳи азобланган аёлдайсан.
Рад этилган, ёш жувондайсан.
Аммо Мен, Эганг, сени чақириб оламан,
— демоқда Худойинг. —
7 Қисқа вақтга Мен сени тарк этгандим,
Буюк шафқат ила сени қайтариб оламан.
8 Қаттиқ ғазабда сендан бир лаҳзага юз ўгиргандим,
Энди туганмас меҳр билан сенга раҳм қиламан,
— демоқда қутқарувчинг — Эгамиз. —
9 Ҳа, Мен учун бу Нуҳ даври кабидир.
Энди ер юзини Нуҳ тўфони каби,
Ҳеч қачон сув босмайди, деб онт ичганман.
Худди шундай қилиб, яна онт ичаман:
«Ҳеч қачон сендан ғазабланмайман,
Сенга жаҳл қилмайман!»
10 Тоғлар ўрнидан қўзғалса ҳам,
Тепаликлар тебранса ҳам,
Менинг содиқ севгим сендан кетмайди,
Менинг тинчлик аҳдим ўзгармайди.”
Сени севувчи Эгамизнинг каломи шудир.
Бўлажак Қуддус
11 Эгам айтар: “Эй мазлум шаҳар!
Бўронларда қолдинг, аммо ҳеч ким сени юпатмади!
Мана, Мен фируза тошлар ишлатиб, сени қайта қураман.
Зангори ёқут тошлардан сенга пойдевор қўяман.
12 Минораларингни ёқутлардан қураман,
Дарвозаларингни гавҳарлардан қиламан,
Барча деворларингни қимматбаҳо тошлардан қураман.
13 Ҳамма болаларингга Мен, Эганг, таълим бераман,
Фарзандларингнинг тинчлиги буюк бўлади.
14 Мен сени душманларингдан халос қилганимда
Сен бехатар бўласан.
Зулм сендан узоқда бўлади,
Ҳалокатдан қўрқмайсан,
Чунки у сенга яқинлашмайди.
15 Агар кимдир сенга ҳужум қилса,
Билгинки, уни Мен қилмаган бўламан.
Сенга ҳужум қилган ҳар ким мағлуб бўлади.
16 Темирчига қара!
У тошкўмир чўғини пуфлайди,
Қотиллик учун қурол ясайди.
Уни Мен яратганман.
Вайрон қилсин деб,
Босқинчини ҳам Мен яратдим.
17 Сенга қарши ясалган
Ҳеч қандай қурол сенга бас кела олмайди.
Сен билан даъволашган ҳар бир одамнинг
Даъволарини сен йўққа чиқарасан.
Менинг қулларимга ана шулар насиб қилади,
Ўзим уларга ғалаба ато қиламан.”
Эгамизнинг каломи шудир.
