24–BOB
Ayub: “Nima uchun fosiqlar jazolanmaydi?” deb soʻraydi
1 Nima uchun Qodir Xudo hukm vaqtini belgilamaydi?
Nima uchun Xudoni bilganlar bekorga Uni kutadilar?
2 Fosiqlar chegaralarni buzadilar ,
Oʻgʻirlangan podalarni yaylovlarda boqadilar.
3 Yetimlarning eshaklarini haydab ketadilar.
Bevaning hoʻkizini kafillik sifatida olib qoʻyadilar.
4 Kambagʻallarni yoʻldan chetga chiqarib tashlaydilar.
Qashshoqlarni yashirinishga majbur qiladilar.
5 Qashshoqlar yovvoyi eshaklarday choʻlda ovqat izlashadi,
Ularning farzandlari uchun dashtdan boshqa yerda yegulik yoʻq.
6 Begonalarning dalalarida somon yigʻishadi,
Fosiqlarning uzumzorlarida qolgan–qutganini terishadi.
7 Tunni kiyim–kechaksiz, yalangʻoch oʻtkazadi,
Sovuqda ularning yopinadigan narsasi yoʻq.
8 Togʻ yomgʻirlari ularni shalabbo qiladi,
Boshpanalari yoʻqligidan ular
Qoyaning oldida qaltiraydilar.
9 Fosiqlar bevaning farzandini
Onasining quchogʻidan yulib oladi,
Kambagʻalning chaqalogʻini garovga oladi.
10 Kiyimlari yoʻqligidan kambagʻallar yalangʻoch yurishadi.
Bugʻdoy bogʻlamlarini koʻtarib yursalar–da, qorinlari och qoladi.
11 Qator–qator zaytun daraxtlari orasida
Zaytunni ezib moy chiqaradilar.
Uzum siqib sharob qiladilar,
Ammo chanqoqlari bosilmaydi.
12 Shaharda jon berayotganlarning nolalari eshitiladi,
Jarohatlanganlar madad soʻrab faryod qiladi.
Shunda ham Xudo hech kimni bu nohaqlik uchun javobgar qilmaydi.
13 Nurga qarshi bosh koʻtarganlar bor.
Ular nur yoʻlidan yurmaydilar,
Nur yoʻli olib boradigan joyga bormaydilar.
14 Qotil erta tongda turadi,
Kambagʻalu bechorani oʻldiradi,
Kechasi esa oʻgʻrilik qiladi.
15 Zinokor kech boʻlishini kutadi,
«Oʻshanda meni hech kim koʻrmaydi», deb oʻylaydi.
Niqob bilan yuzini berkitadi.
16 Oʻgʻrilar kechasi uylarni talab,
Kunduz kuni yashirinadi.
Ular nur nimaligini bilmaydi.
17 Barcha oʻgʻrilarning tongi zulmatdir.
Ha, zulmat dahshatlari ularning doʻstidir.
18 Ammo oʻsha fosiqlar daryo suvlari ustidagi koʻpikday oʻtkinchidir.
Ularning yerlari laʼnatlangan,
Ularning uzumzorlariga hech kim qadam bosmaydi.
19 Issiq havo va qurgʻoqchilik qorni eritib yoʻq qilganday,
Oʻliklar diyori ham gunohkorni oʻz ogʻushiga oladi.
20 Qurtlar esa uni maza qilib kemiradi.
Gunohkorni hatto oʻz onasi unutadi,
Hech kim uni esga olmaydi.
Fosiqlar daraxtlarday sindirib tashlanadi.
21 Fosiqlar farzandsiz ayolga zulm oʻtkazadi,
Bevalarga mehr–shafqat koʻrsatmaydi.
22 Ammo Xudo Oʻz qudrati bilan kuchlilarni halok qiladi.
Ular baland koʻtarilishi mumkin,
Ammo ularning hayoti uchun kafolat yoʻq.
23 Ular osoyishta yashashlariga Xudo yoʻl qoʻyadi,
Ammo Oʻzi ularning yoʻllarini doim kuzatib turadi.
24 Hozircha ular buyuk boʻlsa ham, keyinroq yoʻq boʻladi.
Ular yerga uriladi, xuddi boshqalarday oʻlib ketadi.
Don boshoqlariday qurib qoladi.
25 Qani, kim gaplarimni yolgʻon, deb ayta oladi?
Kim mening gaplarimni puchga chiqara biladi?”
24–БОБ
Аюб: “Нима учун фосиқлар жазоланмайди?” деб сўрайди
1 Нима учун Қодир Худо ҳукм вақтини белгиламайди?
Нима учун Худони билганлар бекорга Уни кутадилар?
2 Фосиқлар чегараларни бузадилар ,
Ўғирланган подаларни яйловларда боқадилар.
3 Етимларнинг эшакларини ҳайдаб кетадилар.
Беванинг ҳўкизини кафиллик сифатида олиб қўядилар.
4 Камбағалларни йўлдан четга чиқариб ташлайдилар.
Қашшоқларни яширинишга мажбур қиладилар.
5 Қашшоқлар ёввойи эшаклардай чўлда овқат излашади,
Уларнинг фарзандлари учун даштдан бошқа ерда егулик йўқ.
6 Бегоналарнинг далаларида сомон йиғишади,
Фосиқларнинг узумзорларида қолган–қутганини теришади.
7 Тунни кийим–кечаксиз, яланғоч ўтказади,
Совуқда уларнинг ёпинадиган нарсаси йўқ.
8 Тоғ ёмғирлари уларни шалаббо қилади,
Бошпаналари йўқлигидан улар
Қоянинг олдида қалтирайдилар.
9 Фосиқлар беванинг фарзандини
Онасининг қучоғидан юлиб олади,
Камбағалнинг чақалоғини гаровга олади.
10 Кийимлари йўқлигидан камбағаллар яланғоч юришади.
Буғдой боғламларини кўтариб юрсалар–да, қоринлари оч қолади.
11 Қатор–қатор зайтун дарахтлари орасида
Зайтунни эзиб мой чиқарадилар.
Узум сиқиб шароб қиладилар,
Аммо чанқоқлари босилмайди.
12 Шаҳарда жон бераётганларнинг нолалари эшитилади,
Жароҳатланганлар мадад сўраб фарёд қилади.
Шунда ҳам Худо ҳеч кимни бу ноҳақлик учун жавобгар қилмайди.
13 Нурга қарши бош кўтарганлар бор.
Улар нур йўлидан юрмайдилар,
Нур йўли олиб борадиган жойга бормайдилар.
14 Қотил эрта тонгда туради,
Камбағалу бечорани ўлдиради,
Кечаси эса ўғрилик қилади.
15 Зинокор кеч бўлишини кутади,
«Ўшанда мени ҳеч ким кўрмайди», деб ўйлайди.
Ниқоб билан юзини беркитади.
16 Ўғрилар кечаси уйларни талаб,
Кундуз куни яширинади.
Улар нур нималигини билмайди.
17 Барча ўғриларнинг тонги зулматдир.
Ҳа, зулмат даҳшатлари уларнинг дўстидир.
18 Аммо ўша фосиқлар дарё сувлари устидаги кўпикдай ўткинчидир.
Уларнинг ерлари лаънатланган,
Уларнинг узумзорларига ҳеч ким қадам босмайди.
19 Иссиқ ҳаво ва қурғоқчилик қорни эритиб йўқ қилгандай,
Ўликлар диёри ҳам гуноҳкорни ўз оғушига олади.
20 Қуртлар эса уни маза қилиб кемиради.
Гуноҳкорни ҳатто ўз онаси унутади,
Ҳеч ким уни эсга олмайди.
Фосиқлар дарахтлардай синдириб ташланади.
21 Фосиқлар фарзандсиз аёлга зулм ўтказади,
Беваларга меҳр–шафқат кўрсатмайди.
22 Аммо Худо Ўз қудрати билан кучлиларни ҳалок қилади.
Улар баланд кўтарилиши мумкин,
Аммо уларнинг ҳаёти учун кафолат йўқ.
23 Улар осойишта яшашларига Худо йўл қўяди,
Аммо Ўзи уларнинг йўлларини доим кузатиб туради.
24 Ҳозирча улар буюк бўлса ҳам, кейинроқ йўқ бўлади.
Улар ерга урилади, худди бошқалардай ўлиб кетади.
Дон бошоқларидай қуриб қолади.
25 Қани, ким гапларимни ёлғон, деб айта олади?
Ким менинг гапларимни пучга чиқара билади?”
