11–BOB
Tinchliksevar shohlik haqida bashorat
1 Essayning tomiridan novda oʻsib chiqadi,
Ha, uning ildizidan koʻchat yoyiladi.
2 Uning ustida boʻladi Egamizning Ruhi.
Bu donolik hamda aql–idrok,
Nasihat va kuch–qudrat Ruhidir,
Egamizni bilish va Undan qoʻrqish Ruhidir.
3 Oʻsha Essay farzandi
Egamizdan qoʻrqishdan zavq olar,
Hukm qilmas koʻzlari koʻrgani ila,
Ajrim qilmas eshitganlari ila.
4 U adolat ila bechorani hukm qiladi,
Toʻgʻrilik ila yer yuzi mazlumlarini ajrim qiladi.
Bir ogʻiz soʻzi bilan zolimni jazolaydi,
Nafasi ila fosiqni oʻldiradi.
5 Adolat uning belidagi kamar boʻladi,
Haqqoniyat uning belidagi belbogʻ boʻladi.
6 Shunda boʻri qoʻzi bilan yashar,
Sirtlon bilan uloqcha birga yotar,
Buzoq, sher, boʻrdoqi birgadir,
Yosh bola ularni yetaklab yurar.
7 Sigir bilan ayiq birga oʻtlaydi,
Bolalari ham birga yotadi,
Sher hoʻkizga oʻxshab somon yeydi.
8 Goʻdak qora ilon uyasi ustida oʻynar,
Yosh bola qoʻlini ilon iniga suqar.
9 Muqaddas togʻimning gir atrofida
Ular zarar keltirmas yo chaqmas.
Ha, suvlar toʻldirganiday dengizni,
Yer yuzi toʻliq bilib oladi Egamizni.
10 Mana, Essayning tomiridan chiqqan shoh oʻsha kuni xalqlar uchun baland koʻtarilgan bayroq kabi boʻladi. Elatlar maslahat soʻragani uning huzuriga keladi, Uning maskani ulugʻvorlikka toʻladi.
11 Oʻsha kuni Rabbiy qoʻlini ikkinchi marta uzatadi. U Oʻz xalqidan qolganlarini qutqaradi. Ularni Ossuriyadan, Misrning shimoliy va janubiy hududlaridan , Habashistondan yigʻib keladi. Elamdan , Bobildan , Xomatdan va dengiz sohillaridan olib keladi.
12 Elatlarga U belgisini koʻrsatib,
Isroilning quvilganlarini toʻplaydi.
Yer yuzining toʻrt burchagidan yigʻadi
Yahudoning tarqalib ketganlarini.
13 Efrayimning hasadgoʻyligini qirqadi,
Yahudoning xusumatini toʻxtatadi,
Efrayim Yahudoga hasad qilmas,
Yahudo Efrayimga xusumat qilmas.
14 Gʻarbda ular Filistlarga changal soladi,
Birgalikda Sharq xalqini talaydi,
Edom, Moʻab ularga boʻyin egadi,
Ommon xalqi tiz choʻkadi.
15 Egamiz tamomila qirib yuborar
Qizil dengizning qoʻltigʻini .
Furot daryosiga qarshi qoʻl koʻtaradi.
Garmsel keltirib, jizgʻanak qilib,
Daryoni yetti sayoz irmoqqa boʻlib tashlaydi,
Irmoqlardan bir–bir hatlab oʻtsa boʻladi.
16 Ha, Isroil Misrdan chiqqanda,
Ularga yoʻl ochilganiday
Egamizning xalqidan qolganlarga
Ossuriyadan katta yoʻl ochiladi.
11–БОБ
Тинчликсевар шоҳлик ҳақида башорат
1 Эссайнинг томиридан новда ўсиб чиқади,
Ҳа, унинг илдизидан кўчат ёйилади.
2 Унинг устида бўлади Эгамизнинг Руҳи.
Бу донолик ҳамда ақл–идрок,
Насиҳат ва куч–қудрат Руҳидир,
Эгамизни билиш ва Ундан қўрқиш Руҳидир.
3 Ўша Эссай фарзанди
Эгамиздан қўрқишдан завқ олар,
Ҳукм қилмас кўзлари кўргани ила,
Ажрим қилмас эшитганлари ила.
4 У адолат ила бечорани ҳукм қилади,
Тўғрилик ила ер юзи мазлумларини ажрим қилади.
Бир оғиз сўзи билан золимни жазолайди,
Нафаси ила фосиқни ўлдиради.
5 Адолат унинг белидаги камар бўлади,
Ҳаққоният унинг белидаги белбоғ бўлади.
6 Шунда бўри қўзи билан яшар,
Сиртлон билан улоқча бирга ётар,
Бузоқ, шер, бўрдоқи биргадир,
Ёш бола уларни етаклаб юрар.
7 Сигир билан айиқ бирга ўтлайди,
Болалари ҳам бирга ётади,
Шер ҳўкизга ўхшаб сомон ейди.
8 Гўдак қора илон уяси устида ўйнар,
Ёш бола қўлини илон инига суқар.
9 Муқаддас тоғимнинг гир атрофида
Улар зарар келтирмас ё чақмас.
Ҳа, сувлар тўлдирганидай денгизни,
Ер юзи тўлиқ билиб олади Эгамизни.
10 Мана, Эссайнинг томиридан чиққан шоҳ ўша куни халқлар учун баланд кўтарилган байроқ каби бўлади. Элатлар маслаҳат сўрагани унинг ҳузурига келади, Унинг маскани улуғворликка тўлади.
11 Ўша куни Раббий қўлини иккинчи марта узатади. У Ўз халқидан қолганларини қутқаради. Уларни Оссуриядан, Мисрнинг шимолий ва жанубий ҳудудларидан , Ҳабашистондан йиғиб келади. Эламдан , Бобилдан , Хоматдан ва денгиз соҳилларидан олиб келади.
12 Элатларга У белгисини кўрсатиб,
Исроилнинг қувилганларини тўплайди.
Ер юзининг тўрт бурчагидан йиғади
Яҳудонинг тарқалиб кетганларини.
13 Эфрайимнинг ҳасадгўйлигини қирқади,
Яҳудонинг хусуматини тўхтатади,
Эфрайим Яҳудога ҳасад қилмас,
Яҳудо Эфрайимга хусумат қилмас.
14 Ғарбда улар Филистларга чангал солади,
Биргаликда Шарқ халқини талайди,
Эдом, Мўаб уларга бўйин эгади,
Оммон халқи тиз чўкади.
15 Эгамиз тамомила қириб юборар
Қизил денгизнинг қўлтиғини .
Фурот дарёсига қарши қўл кўтаради.
Гармсел келтириб, жизғанак қилиб,
Дарёни етти саёз ирмоққа бўлиб ташлайди,
Ирмоқлардан бир–бир ҳатлаб ўтса бўлади.
16 Ҳа, Исроил Мисрдан чиққанда,
Уларга йўл очилганидай
Эгамизнинг халқидан қолганларга
Оссуриядан катта йўл очилади.
