17–BOB
Yahudo xalqining gunohi va jazosi
1 Egamiz shunday deydi: “Ey Yahudo xalqi, sizlarning gunohingiz temir qalam bilan oʻyib yozilgan. Sizlarning gunohingiz tosh yuraklaringiz ustiga va qurbongohlaringiz shoxlariga olmos uchi bilan oʻyib bitilgan . 2 Hatto farzandlaringiz ham baland qirlardagi va sersoya daraxtlar ostidagi qurbongohlarga borib, Asheraning ustunlariga sajda qilishadi. 3 Butun yurtda qilgan gunohlaringiz evaziga Men Oʻz togʻimni , sizning hamma boyliklaringizni, xazinalaringizni va barcha sajdagohlaringizni dushmanga oʻlja qilib beraman. 4 Sizlarga Men mulk qilib bergan yurtdan oʻz aybingiz tufayli ayrilasizlar. Men sizlarni oʻzingiz bilmagan bir yurtga joʻnataman, dushmanlaringizga hammangizni qul qilib beraman. Sizlar Meni gʻazablantirdingiz, gʻazabim soʻnmas olov kabi yonmoqda.”
Hikmatli soʻzlar
5 Egamiz shunday demoqda:
“Umidini insonga bogʻlagan,
Foniy bandaning kuchiga ishongan,
Yuragi Mendan uzoqlashgan odam laʼnatidir.
6 Bunday odam sahrodagi butaday boʻladi,
Farovon hayot koʻrmaydi.
Choʻlning qaqroq joylarida,
Shoʻr bosgan boʻm–boʻsh yerlarda yashaydi.
7 Egasidan umid qilgan kishi baxtlidir,
Yolgʻiz Xudoga inongan zot saodatlidir!
8 Bunday kishi suv boʻyiga oʻtqazilgan daraxtga oʻxshaydi,
Oqar suvlar tomon ildiz otadi.
Kunning jaziramasidan qoʻrqmaydi,
Barglari doim yam–yashil boʻladi.
Qurgʻoqchilik kelganda ham bezovta boʻlmaydi,
Meva berishdan toʻxtamaydi.
9 Odamning yuragi shunchalik ayyorki,
Uning davosi yoʻq!
Uning ichidagini kim biladi?!
10 Ammo Men, Egangiz, odamning yuragini bilaman,
Uning oʻy–fikrlarini tekshiraman.
Qilmishiga yarasha jazolayman,
Qilgan ishiga yarasha taqdirlayman.”
11 Nohaqlik bilan boylik orttirgan kishi,
Oʻzi qoʻymagan tuxumlarni bosib yotgan kaklikka oʻxshaydi.
Bunday kishi umrining yarmida
Boyliklaridan mahrum boʻladi,
Hayoti oxirlab qolganda ahmoq ekanini biladi.
12 Muqaddas makonimiz
Azaldan yuksaltirilgan ulugʻvor taxtdir!
13 Ey Egamiz, Sen Isroilning yolgʻiz umidisan!
Seni tark etganlarning hammasi sharmanda boʻlar,
Sendan yuz oʻgirganlarning ismlari tuproqqa yozilar.
Ey Egamiz, ular Seni tark etdilar.
Ha, hayotbaxsh suv bulogʻidan voz kechdilar.
Yeremiyo Egamizdan madad soʻraydi
14 Ey Egam, menga shifo ber, sogʻayib ketay.
Meni qutqargin, najot topay.
Axir, yolgʻiz Seni olqishlayman.
15 Qara, bu odamlar ustimdan kulishyapti,
“Egamizning tahdidli soʻzlari qani?!
Aytganlari bajo boʻlsin–chi endi!” deb aytishyapti.
16 Men esa xalqingga choʻpon boʻldim,
Xizmat qilishdan bosh tortmadim.
Ofat kuni kelishini xohlamaganimni bilasan.
Ogʻzimdan chiqqan har bir soʻz Senga ayondir.
17 Meni vahimaga solmagin,
Kulfat kunida panohim Sensan.
18 Meni quvgʻin qilganlar sharmanda boʻlsin,
Meni esa sharmanda qilma.
Dushmanlarim sarosimaga tushsin,
Meni esa dovdiratib qoʻyma.
Ularning boshlariga kulfat keltir,
Jazosini ikki barobar ogʻirroq qilgin.
Shabbat kuniga rioya qilish haqida
19 Egamiz menga shunday dedi: “Yahudo shohlari kirib chiqadigan Xalq darvozasi oldiga borib tur, soʻng Quddusning boshqa darvozalari oldiga ham bor. 20 Borganingda xalqqa shunday deb ayt: «Ey Yahudo shohlari, ey Yahudo xalqi, bu darvozadan oʻtib yurgan butun Quddus aholisi, Egamizning soʻzini eshitinglar! 21 Egamiz shunday deb aytmoqda: Shabbat kuni yuk tashimanglar, Quddus darvozalaridan yukni koʻtarib kirmanglar. Hushyor boʻlinglar, tagʻin hayotingizga oʻzingiz zomin boʻlib qolmanglar. 22 Shabbat kuni uyingizdan biron yukni koʻtarib chiqmanglar, hech qanday ish qilmanglar. Men ota–bobolaringizga amr qilganimdek, Shabbat kunini muqaddas deb bilinglar. 23 Ota–bobolaringiz gaplarimga eʼtibor bermagan, Menga quloq solmagan edilar. Ular qaysarlik qilib, soʻzlarimni tinglamagandilar, gapimga kirmagandilar. 24 Bordi–yu, sizlar gaplarimga quloq solsangizlar, Shabbat kuni shahar darvozalaridan yuk tashimasangizlar, oʻsha muborak kunni muqaddas deb bilib, hech qanday ish qilmasangizlar, 25 Quddus taxtida doim Dovud naslidan boʻlgan shoh oʻtiradi. Jang aravalariyu otlarni minib olgan shohlar va aʼyonlar shahar darvozalaridan kirishadi. Yahudo xalqi va Quddus aholisi ular bilan birga kiradilar. Quddusdan to abad odam arimaydi. 26 Shunda Yahudo shaharlaridan, Quddus atrofidagi qishloqlardan, Benyamin hududidan, qirlardan, gʻarbdagi qir etaklaridan, Nagav choʻlidan odamlar keladi. Ular Egasining uyiga kuydiriladigan va boshqa qurbonliklarni, shukrona va don nazrlarini, xushboʻy tutatqilarni olib keladilar. 27 Bordi–yu, sizlar gapimga quloq solmasangizlar, Shabbat kunini muqaddas deb bilmay, yuk tashib, darvozalardan kirib chiqsangizlar, Men shahar darvozalarini yondirib yuboraman. Olov Quddus saroylarini yoʻq qiladi, bu olovni hech kim oʻchira olmaydi.»”
17–БОБ
Яҳудо халқининг гуноҳи ва жазоси
1 Эгамиз шундай дейди: “Эй Яҳудо халқи, сизларнинг гуноҳингиз темир қалам билан ўйиб ёзилган. Сизларнинг гуноҳингиз тош юракларингиз устига ва қурбонгоҳларингиз шохларига олмос учи билан ўйиб битилган . 2 Ҳатто фарзандларингиз ҳам баланд қирлардаги ва серсоя дарахтлар остидаги қурбонгоҳларга бориб, Ашеранинг устунларига сажда қилишади. 3 Бутун юртда қилган гуноҳларингиз эвазига Мен Ўз тоғимни , сизнинг ҳамма бойликларингизни, хазиналарингизни ва барча саждагоҳларингизни душманга ўлжа қилиб бераман. 4 Сизларга Мен мулк қилиб берган юртдан ўз айбингиз туфайли айриласизлар. Мен сизларни ўзингиз билмаган бир юртга жўнатаман, душманларингизга ҳаммангизни қул қилиб бераман. Сизлар Мени ғазаблантирдингиз, ғазабим сўнмас олов каби ёнмоқда.”
Ҳикматли сўзлар
5 Эгамиз шундай демоқда:
“Умидини инсонга боғлаган,
Фоний банданинг кучига ишонган,
Юраги Мендан узоқлашган одам лаънатидир.
6 Бундай одам саҳродаги бутадай бўлади,
Фаровон ҳаёт кўрмайди.
Чўлнинг қақроқ жойларида,
Шўр босган бўм–бўш ерларда яшайди.
7 Эгасидан умид қилган киши бахтлидир,
Ёлғиз Худога инонган зот саодатлидир!
8 Бундай киши сув бўйига ўтқазилган дарахтга ўхшайди,
Оқар сувлар томон илдиз отади.
Куннинг жазирамасидан қўрқмайди,
Барглари доим ям–яшил бўлади.
Қурғоқчилик келганда ҳам безовта бўлмайди,
Мева беришдан тўхтамайди.
9 Одамнинг юраги шунчалик айёрки,
Унинг давоси йўқ!
Унинг ичидагини ким билади?!
10 Аммо Мен, Эгангиз, одамнинг юрагини биламан,
Унинг ўй–фикрларини текшираман.
Қилмишига яраша жазолайман,
Қилган ишига яраша тақдирлайман.”
11 Ноҳақлик билан бойлик орттирган киши,
Ўзи қўймаган тухумларни босиб ётган какликка ўхшайди.
Бундай киши умрининг ярмида
Бойликларидан маҳрум бўлади,
Ҳаёти охирлаб қолганда аҳмоқ эканини билади.
12 Муқаддас маконимиз
Азалдан юксалтирилган улуғвор тахтдир!
13 Эй Эгамиз, Сен Исроилнинг ёлғиз умидисан!
Сени тарк этганларнинг ҳаммаси шарманда бўлар,
Сендан юз ўгирганларнинг исмлари тупроққа ёзилар.
Эй Эгамиз, улар Сени тарк этдилар.
Ҳа, ҳаётбахш сув булоғидан воз кечдилар.
Еремиё Эгамиздан мадад сўрайди
14 Эй Эгам, менга шифо бер, соғайиб кетай.
Мени қутқаргин, нажот топай.
Ахир, ёлғиз Сени олқишлайман.
15 Қара, бу одамлар устимдан кулишяпти,
“Эгамизнинг таҳдидли сўзлари қани?!
Айтганлари бажо бўлсин–чи энди!” деб айтишяпти.
16 Мен эса халқингга чўпон бўлдим,
Хизмат қилишдан бош тортмадим.
Офат куни келишини хоҳламаганимни биласан.
Оғзимдан чиққан ҳар бир сўз Сенга аёндир.
17 Мени ваҳимага солмагин,
Кулфат кунида паноҳим Сенсан.
18 Мени қувғин қилганлар шарманда бўлсин,
Мени эса шарманда қилма.
Душманларим саросимага тушсин,
Мени эса довдиратиб қўйма.
Уларнинг бошларига кулфат келтир,
Жазосини икки баробар оғирроқ қилгин.
Шаббат кунига риоя қилиш ҳақида
19 Эгамиз менга шундай деди: “Яҳудо шоҳлари кириб чиқадиган Халқ дарвозаси олдига бориб тур, сўнг Қуддуснинг бошқа дарвозалари олдига ҳам бор. 20 Борганингда халққа шундай деб айт: «Эй Яҳудо шоҳлари, эй Яҳудо халқи, бу дарвозадан ўтиб юрган бутун Қуддус аҳолиси, Эгамизнинг сўзини эшитинглар! 21 Эгамиз шундай деб айтмоқда: Шаббат куни юк ташиманглар, Қуддус дарвозаларидан юкни кўтариб кирманглар. Ҳушёр бўлинглар, тағин ҳаётингизга ўзингиз зомин бўлиб қолманглар. 22 Шаббат куни уйингиздан бирон юкни кўтариб чиқманглар, ҳеч қандай иш қилманглар. Мен ота–боболарингизга амр қилганимдек, Шаббат кунини муқаддас деб билинглар. 23 Ота–боболарингиз гапларимга эътибор бермаган, Менга қулоқ солмаган эдилар. Улар қайсарлик қилиб, сўзларимни тингламагандилар, гапимга кирмагандилар. 24 Борди–ю, сизлар гапларимга қулоқ солсангизлар, Шаббат куни шаҳар дарвозаларидан юк ташимасангизлар, ўша муборак кунни муқаддас деб билиб, ҳеч қандай иш қилмасангизлар, 25 Қуддус тахтида доим Довуд наслидан бўлган шоҳ ўтиради. Жанг араваларию отларни миниб олган шоҳлар ва аъёнлар шаҳар дарвозаларидан киришади. Яҳудо халқи ва Қуддус аҳолиси улар билан бирга кирадилар. Қуддусдан то абад одам аримайди. 26 Шунда Яҳудо шаҳарларидан, Қуддус атрофидаги қишлоқлардан, Бенямин ҳудудидан, қирлардан, ғарбдаги қир этакларидан, Нагав чўлидан одамлар келади. Улар Эгасининг уйига куйдириладиган ва бошқа қурбонликларни, шукрона ва дон назрларини, хушбўй тутатқиларни олиб келадилар. 27 Борди–ю, сизлар гапимга қулоқ солмасангизлар, Шаббат кунини муқаддас деб билмай, юк ташиб, дарвозалардан кириб чиқсангизлар, Мен шаҳар дарвозаларини ёндириб юбораман. Олов Қуддус саройларини йўқ қилади, бу оловни ҳеч ким ўчира олмайди.»”
