4–BOB
Beshinchi vahiy: chiroqpoya va ikkita zaytun daraxti
1 Men bilan gaplashgan farishta qaytib kelib, xuddi meni uyqudan uygʻotganday qilib turgʻizdi. 2 U mendan:
— Nima koʻryapsan? — deb soʻradi. Men shunday javob berdim:
— Tilladan yasalgan bir chiroqpoyani koʻryapman, uning ustida moy uchun bir tovoq turibdi. Chiroqpoyada esa yettita moychiroq turibdi. U moychiroqlarning har birida yettitadan joʻmragi bor. 3 Chiroqpoyaning oldida ikkita zaytun daraxti bor. Bu daraxtlarning biri chiroqpoyaning oʻng tomonida, ikkinchisi esa chap tomonida turibdi.
4 Men bilan gaplashgan farishtadan soʻradim:
— Bular nima, ey toʻram?
5 U mendan:
— Nimaligini bilmaysanmi? — deb soʻradi. Men:
— Yoʻq, toʻram, — deb javob berdim.
6 U menga shunday dedi:
— Quyidagilar Egamizning Zarubabelga bergan xabaridir: “Qudrat bilan emas, kuch bilan emas, Mening Ruhim ila muvaffaqiyatga erishasan, — deydi Sarvari Olam. 7 — Ey baland togʻ , sen nima boʻlibsan?! Zarubabel oldida sen tekislik boʻlasan. Zarubabel Mening uyimni qayta quradi, uning eng oxirgi toshini qoʻyadi. Shundan keyin butun xalq: «Xudo marhamat qilsin!» deb hayqiradi.”
8 Yana Egamiz menga quyidagi soʻzini ayon qildi: 9 “Zarubabel oʻz qoʻllari bilan uyimning poydevorini yotqizdi. Qurilishni ham oʻzi tugatadi. Ana shunda Men, Sarvari Olam, seni yuborganimni xalq anglab oladi. 10 Qurilishning boshlanishi arzimasday koʻrinsa ham, koʻnglingiz choʻkmasin! Zero, Mening koʻzlarim, yaʼni Egangizning yettita koʻzi Zarubabelning qoʻlidagi yozuv oʻyilgan toshga xursandchilik bilan qaraydi.”
Shunda Farishta menga dedi:
— Sen koʻrgan yettita moychiroq butun yer yuziga qarab turuvchi Egamizning yettita koʻzidir.
11 Men farishtadan soʻradim:
— Chiroqpoyaning oʻng va chap tomonida turgan zaytun daraxtlarining maʼnosi nima? 12 Oltin novlari orqali tillasimon moy oqayotgan zaytun daraxtlarining ikki shoxi nimani bildiradi?
13 U mendan:
— Bilmaysanmi? — deb soʻradi. Men:
— Yoʻq, toʻram, — deb javob berdim. 14 U shunday dedi:
— Bular boshiga moy surtib tanlangan, butun olamning Rabbiysi oldida xizmat qiladigan ikki zotdir .
4–БОБ
Бешинчи ваҳий: чироқпоя ва иккита зайтун дарахти
1 Мен билан гаплашган фаришта қайтиб келиб, худди мени уйқудан уйғотгандай қилиб турғизди. 2 У мендан:
— Нима кўряпсан? — деб сўради. Мен шундай жавоб бердим:
— Тилладан ясалган бир чироқпояни кўряпман, унинг устида мой учун бир товоқ турибди. Чироқпояда эса еттита мойчироқ турибди. У мойчироқларнинг ҳар бирида еттитадан жўмраги бор. 3 Чироқпоянинг олдида иккита зайтун дарахти бор. Бу дарахтларнинг бири чироқпоянинг ўнг томонида, иккинчиси эса чап томонида турибди.
4 Мен билан гаплашган фариштадан сўрадим:
— Булар нима, эй тўрам?
5 У мендан:
— Нималигини билмайсанми? — деб сўради. Мен:
— Йўқ, тўрам, — деб жавоб бердим.
6 У менга шундай деди:
— Қуйидагилар Эгамизнинг Зарубабелга берган хабаридир: “Қудрат билан эмас, куч билан эмас, Менинг Руҳим ила муваффақиятга эришасан, — дейди Сарвари Олам. 7 — Эй баланд тоғ , сен нима бўлибсан?! Зарубабел олдида сен текислик бўласан. Зарубабел Менинг уйимни қайта қуради, унинг энг охирги тошини қўяди. Шундан кейин бутун халқ: «Худо марҳамат қилсин!» деб ҳайқиради.”
8 Яна Эгамиз менга қуйидаги сўзини аён қилди: 9 “Зарубабел ўз қўллари билан уйимнинг пойдеворини ётқизди. Қурилишни ҳам ўзи тугатади. Ана шунда Мен, Сарвари Олам, сени юборганимни халқ англаб олади. 10 Қурилишнинг бошланиши арзимасдай кўринса ҳам, кўнглингиз чўкмасин! Зеро, Менинг кўзларим, яъни Эгангизнинг еттита кўзи Зарубабелнинг қўлидаги ёзув ўйилган тошга хурсандчилик билан қарайди.”
Шунда Фаришта менга деди:
— Сен кўрган еттита мойчироқ бутун ер юзига қараб турувчи Эгамизнинг еттита кўзидир.
11 Мен фариштадан сўрадим:
— Чироқпоянинг ўнг ва чап томонида турган зайтун дарахтларининг маъноси нима? 12 Олтин новлари орқали тилласимон мой оқаётган зайтун дарахтларининг икки шохи нимани билдиради?
13 У мендан:
— Билмайсанми? — деб сўради. Мен:
— Йўқ, тўрам, — деб жавоб бердим. 14 У шундай деди:
— Булар бошига мой суртиб танланган, бутун оламнинг Раббийси олдида хизмат қиладиган икки зотдир .
