7–BOB
Quddus qizlari:
1 Qaytgin, qaytib kelgin, ey Shulamlik qiz!
Qaytib kel, seni yana bir bor koʻraylik.
Yigit:
Nima uchun bu Shulamlik qizga qaraysizlar?!
U ikki qator qizlar orasida raqsga tushyaptimi?!
2 Ey malikaga oʻxshagan qiz!
Kafsh kiygan oyoqlaring qanday chiroyli!
Doʻmboq sonlaring javohirlarday,
Xuddi mohir ustaning qoʻli bilan ishlanganday!
3 Doimo xushboʻy sharobga toʻla boʻlgan,
Dum–dumaloq kosadaydir sening kindiging.
Yumaloq qorning esa nilufarlar bilan oʻralgan,
Tillarang bugʻdoy uyumi kabidir.
4 Koʻkraklaring egizak kiyiklardaydir.
5 Fil suyagidan qurilgan minoraday goʻzaldir boʻyning,
Batrabim darvozasi yonidagi
Xashbon buloqlariday yorqindir koʻzlaring.
Burning esa Damashq shahriga qaragan
Lubnon minorasiday tekisdir.
6 Boshing Karmil togʻiday baland turadi,
Soching kimxobday goʻzal,
Hatto shoh ham unga asirdir.
7 Qanday goʻzal va xushroʻysan,
Huzurbaxsh sevgilim mening.
8 Palma daraxtiday savlatlisan,
Koʻkraklaring uning mevalariday toʻliqdir.
9 Men shunday dedim: “Palma daraxtiga chiqib,
Mevalaridan ushlayman.”
Koʻkraklaring men uchun uzumday mazali,
Nafasing esa olmalarday shirin boʻlsin.
10 Oʻpichlaring eng aʼlo sharobday shirindir,
Bunday sharob lab va tishlar orasidan tekis oʻtadi .
Qiz:
11 Men sevgilimnikiman,
U faqat meni qoʻmsaydi.
12 Kelgin, sevgilim, dalalarga boraylik.
Xina gullari orasida yotib qolaylik.
13 Vaqtli turib, uzumzorlarga kiraylik.
Ular gulga kirdimikin?!
Toklaru anorlar gullaganmikin?!
Oʻsha yerda men senga oʻz sevgimni toʻla koʻrsataman.
14 Mehrigiyolar hid taratib turibdi.
Eshigimiz tepasiga har xil mevalardan osib,
Sen uchun saqlab qoʻydim, sevgilim.
7–БОБ
Қуддус қизлари:
1 Қайтгин, қайтиб келгин, эй Шуламлик қиз!
Қайтиб кел, сени яна бир бор кўрайлик.
Йигит:
Нима учун бу Шуламлик қизга қарайсизлар?!
У икки қатор қизлар орасида рақсга тушяптими?!
2 Эй маликага ўхшаган қиз!
Кафш кийган оёқларинг қандай чиройли!
Дўмбоқ сонларинг жавоҳирлардай,
Худди моҳир устанинг қўли билан ишлангандай!
3 Доимо хушбўй шаробга тўла бўлган,
Дум–думалоқ косадайдир сенинг киндигинг.
Юмалоқ қорнинг эса нилуфарлар билан ўралган,
Тилларанг буғдой уюми кабидир.
4 Кўкракларинг эгизак кийиклардайдир.
5 Фил суягидан қурилган минорадай гўзалдир бўйнинг,
Батрабим дарвозаси ёнидаги
Хашбон булоқларидай ёрқиндир кўзларинг.
Бурнинг эса Дамашқ шаҳрига қараган
Лубнон минорасидай текисдир.
6 Бошинг Кармил тоғидай баланд туради,
Сочинг кимхобдай гўзал,
Ҳатто шоҳ ҳам унга асирдир.
7 Қандай гўзал ва хушрўйсан,
Ҳузурбахш севгилим менинг.
8 Пальма дарахтидай савлатлисан,
Кўкракларинг унинг меваларидай тўлиқдир.
9 Мен шундай дедим: “Пальма дарахтига чиқиб,
Меваларидан ушлайман.”
Кўкракларинг мен учун узумдай мазали,
Нафасинг эса олмалардай ширин бўлсин.
10 Ўпичларинг энг аъло шаробдай шириндир,
Бундай шароб лаб ва тишлар орасидан текис ўтади .
Қиз:
11 Мен севгилимникиман,
У фақат мени қўмсайди.
12 Келгин, севгилим, далаларга борайлик.
Хина гуллари орасида ётиб қолайлик.
13 Вақтли туриб, узумзорларга кирайлик.
Улар гулга кирдимикин?!
Токлару анорлар гуллаганмикин?!
Ўша ерда мен сенга ўз севгимни тўла кўрсатаман.
14 Меҳригиёлар ҳид таратиб турибди.
Эшигимиз тепасига ҳар хил мевалардан осиб,
Сен учун сақлаб қўйдим, севгилим.
