6–BOB
Quddus qizlari:
1 Sevgiling qayerga ketdi,
Ey goʻzallarning goʻzali?
Ayt–chi, qaysi tomonga yoʻl oldi?
Biz sen bilan uni qidiraylik.
Qiz:
2 Sevgilim oʻz bogʻiga,
Xushboʻy ziravorlar bogʻiga ketdi.
U nilufar gullar terib,
Oʻz bogʻidan zavq olgani ketdi.
3 Men sevgilimniki, sevgilim esa menikidir!
U nilufarlar terib, oʻz bogʻidan zavq oladi.
Beshinchi qoʻshiq
Yigit:
4 Sen Tirza shahriday goʻzaldirsan, sevgilim,
Quddus shahriday xushroʻydirsan,
Bayroqlari koʻtarilgan qoʻshinday savlatlisan.
5 Koʻzlaringni olib qoch mendan,
Ular meni maftun qilganlar.
Gilad qirlaridan yoyilib tushayotgan
Qop–qora qoʻylardaydir sening sochlaring.
6 Yuvib–taralgan oppoq
Echkilardaydir sening tishlaring.
Har birining egizi bor,
Oʻrni hech boʻsh qolmagan.
7 Chachvoning ortidagi yonoqlaring esa
Anorlarday qip–qizil.
8 Ana, oltmishta malika, saksonta kanizak,
Son–sanoqsiz qizlar!
9 Ammo mening kabutarim,
Komil sevgilim oʻzgachadir.
Onasining erkasi,
Tuqqan onasining yagonasidir.
Qizlar uni koʻrib, u baxtlidir, deyishadi,
Malikayu kanizaklar uni koʻrib, maqtashadi.
10 Mahbubamning nigohlari tongdaydir.
Oʻzi esa toʻlin oyday goʻzal, quyoshday yorqin,
Bayroqlari koʻtarilgan qoʻshinday savlatlidir.
11 Men bodomzorga,
Vodiy chechaklarini koʻrishga bordim.
Toklaru anorlar gullaganmikin, deya bordim.
12 Shohona aravada oʻtirganday,
Hayajondan titrar edim.
6–БОБ
Қуддус қизлари:
1 Севгилинг қаерга кетди,
Эй гўзалларнинг гўзали?
Айт–чи, қайси томонга йўл олди?
Биз сен билан уни қидирайлик.
Қиз:
2 Севгилим ўз боғига,
Хушбўй зираворлар боғига кетди.
У нилуфар гуллар териб,
Ўз боғидан завқ олгани кетди.
3 Мен севгилимники, севгилим эса меникидир!
У нилуфарлар териб, ўз боғидан завқ олади.
Бешинчи қўшиқ
Йигит:
4 Сен Тирза шаҳридай гўзалдирсан, севгилим,
Қуддус шаҳридай хушрўйдирсан,
Байроқлари кўтарилган қўшиндай савлатлисан.
5 Кўзларингни олиб қоч мендан,
Улар мени мафтун қилганлар.
Гилад қирларидан ёйилиб тушаётган
Қоп–қора қўйлардайдир сенинг сочларинг.
6 Ювиб–таралган оппоқ
Эчкилардайдир сенинг тишларинг.
Ҳар бирининг эгизи бор,
Ўрни ҳеч бўш қолмаган.
7 Чачвонинг ортидаги ёноқларинг эса
Анорлардай қип–қизил.
8 Ана, олтмишта малика, саксонта канизак,
Сон–саноқсиз қизлар!
9 Аммо менинг кабутарим,
Комил севгилим ўзгачадир.
Онасининг эркаси,
Туққан онасининг ягонасидир.
Қизлар уни кўриб, у бахтлидир, дейишади,
Маликаю канизаклар уни кўриб, мақташади.
10 Маҳбубамнинг нигоҳлари тонгдайдир.
Ўзи эса тўлин ойдай гўзал, қуёшдай ёрқин,
Байроқлари кўтарилган қўшиндай савлатлидир.
11 Мен бодомзорга,
Водий чечакларини кўришга бордим.
Токлару анорлар гуллаганмикин, дея бордим.
12 Шоҳона аравада ўтиргандай,
Ҳаяжондан титрар эдим.
