4–BOB
Ibrohimning ibratli imoni
1 Xoʻsh, biz bobokalonimiz Ibrohim haqida nima deymiz? Ibrohim qanday qilib inoyat topdi? 2 Agar Ibrohim savob ishlari tufayli oqlanganda edi, uning maqtanishga haqi boʻlardi, ammo Xudoning oldida hech kim maqtana olmaydi. 3 Axir, Muqaddas bitiklarda nima deb yozilgan? “Ibrohim Xudoga ishondi, Xudo uni ishonchi uchun, solih deb bildi.” 4 Mehnatkashga toʻlanadigan maosh iltifot emas, xizmat haqidir. 5 Biroq qonunni bajarishga suyanmay, balki betavfiqni oqlovchi Xudoga ishongan kishi oʻz ishonchi tufayli oqlanadi. 6 Mana, qonun talablarini bajo qilgan–qilmaganidan qatʼi nazar, Xudo tomonidan oqlangan odamni Dovud ham baxtli deb aytadi:
7 “Itoatsizligi kechirilganlar baxtlidir,
Egamiz kimning gunohidan oʻtgan boʻlsa,
Oʻsha inson baxtlidir.
8 Egamiz kimning aybini yozmagan boʻlsa,
Oʻsha inson baxtlidir.”
9 Bu baxtiyorlik faqat sunnat qilinganlarga mansubmi yoki sunnatsizlarga ham tegishlimi? Aytib oʻtganimizday, Xudo Ibrohimni ishonchi uchun solih deb bildi. 10 Xoʻsh, bu qachon sodir boʻldi? Ibrohim sunnat boʻlishidan oldinmi yoki keyinmi? Sunnat boʻlishidan oldin! 11 U sunnatni imon orqali sazovor boʻlgan solihligining muhri sifatida qabul qildi. U sunnat qilinmasdan oldin oqlangandi. Shunday qilib, Ibrohim sunnatsiz holda imon keltirib oqlangan har bir insonning otasi boʻldi. 12 Ayni zamonda, Ibrohim sunnatlilarning ham otasi hisoblanadi. Ammo sharti shuki, sunnatlilarning imoni ham otamiz Ibrohim sunnat qilinmasdan oldin ega boʻlgan imonday boʻlishi kerak.
Xudo Oʻz vaʼdasida turadi
13 Xudo Ibrohimga va uning nasliga, sizlar yer yuzini mulk qilib olasizlar, deb vaʼda bergan edi. Ibrohim qonunga itoat qilgani uchun emas, balki Xudo uni ishonchi tufayli solih deb bilgani uchun Xudo bu vaʼdani berdi. 14 Agar qonunga suyanadiganlar yer yuzini mulk qilib oladigan boʻlsa edi, unda imon behuda, vaʼda esa quruq boʻlib qolar edi. 15 Axir, qonun Xudoning gʻazabini qoʻzgʻatadi, xolos. Qonun boʻlmasa, qonunbuzarlik ham boʻlmaydi. 16 Shu sababdan, Xudoning vaʼdasi Uning inoyatiga bogʻliq boʻlib, faqat imon bilan qabul qilinadi. Ibrohimning imoniday imonga ega boʻlganlarning hammasi qonunga amal qilib yashaydimi, yoʻqmi, uning zurriyoti hisoblanadi. Xudoning vaʼdasi albatta ularga ham daxldordir. Axir, Ibrohim hammamizning otamizdir. 17 Muqaddas bitiklarda quyidagicha yozilgan–ku: “Men seni koʻplab xalqlarning otasi qilaman.” Oʻliklarni tiriltiruvchi va mavjud boʻlmagan narsalarni vujudga keltiruvchi Xudoga ishonib, Ibrohim hammamizning otamiz boʻldi.
18 Xudo Ibrohimga yana: “Sening nasling son–sanoqsiz boʻladi” , degan edi. Ibrohim koʻp xalqlarning otasi boʻlishga hech bir umidi qolmaganiga qaramasdan, imoni tufayli umidvor edi. 19 Oʻzi yuz yoshga yaqinlashib, badani ancha zaiflashib qolganiga va xotini Soraning bepushtligiga qaramay, Ibrohimning imoni zaiflashmadi. 20 Ibrohim imonsizlik qilmadi, Xudoning vaʼdasidan shubhalanmadi, balki imonida mahkam turib, Xudoni ulugʻladi. 21 Xudo bergan vaʼdasini bajo keltirishga qodir, deb Ibrohim qatʼiy ishonar edi. 22 Mana shu ishonchi uchun Xudo Ibrohimni solih deb bildi. 23 Bu soʻzlar faqatgina Ibrohimga tegishli emas, 24 balki biz uchun ham aytilgan. Agar Rabbimiz Isoni oʻlikdan tiriltirgan Xudoga ishonsak, Xudo bizni ham oqlaydi. 25 Xudo bizning gunohlarimiz uchun Iso Masihni oʻlimga topshirdi va oqlanishimiz uchun Uni tiriltirdi.
4–БОБ
Иброҳимнинг ибратли имони
1 Хўш, биз бобокалонимиз Иброҳим ҳақида нима деймиз? Иброҳим қандай қилиб иноят топди? 2 Агар Иброҳим савоб ишлари туфайли оқланганда эди, унинг мақтанишга ҳақи бўларди, аммо Худонинг олдида ҳеч ким мақтана олмайди. 3 Ахир, Муқаддас битикларда нима деб ёзилган? “Иброҳим Худога ишонди, Худо уни ишончи учун, солиҳ деб билди.” 4 Меҳнаткашга тўланадиган маош илтифот эмас, хизмат ҳақидир. 5 Бироқ қонунни бажаришга суянмай, балки бетавфиқни оқловчи Худога ишонган киши ўз ишончи туфайли оқланади. 6 Мана, қонун талабларини бажо қилган–қилмаганидан қатъи назар, Худо томонидан оқланган одамни Довуд ҳам бахтли деб айтади:
7 “Итоатсизлиги кечирилганлар бахтлидир,
Эгамиз кимнинг гуноҳидан ўтган бўлса,
Ўша инсон бахтлидир.
8 Эгамиз кимнинг айбини ёзмаган бўлса,
Ўша инсон бахтлидир.”
9 Бу бахтиёрлик фақат суннат қилинганларга мансубми ёки суннатсизларга ҳам тегишлими? Айтиб ўтганимиздай, Худо Иброҳимни ишончи учун солиҳ деб билди. 10 Хўш, бу қачон содир бўлди? Иброҳим суннат бўлишидан олдинми ёки кейинми? Суннат бўлишидан олдин! 11 У суннатни имон орқали сазовор бўлган солиҳлигининг муҳри сифатида қабул қилди. У суннат қилинмасдан олдин оқланганди. Шундай қилиб, Иброҳим суннатсиз ҳолда имон келтириб оқланган ҳар бир инсоннинг отаси бўлди. 12 Айни замонда, Иброҳим суннатлиларнинг ҳам отаси ҳисобланади. Аммо шарти шуки, суннатлиларнинг имони ҳам отамиз Иброҳим суннат қилинмасдан олдин эга бўлган имондай бўлиши керак.
Худо Ўз ваъдасида туради
13 Худо Иброҳимга ва унинг наслига, сизлар ер юзини мулк қилиб оласизлар, деб ваъда берган эди. Иброҳим қонунга итоат қилгани учун эмас, балки Худо уни ишончи туфайли солиҳ деб билгани учун Худо бу ваъдани берди. 14 Агар қонунга суянадиганлар ер юзини мулк қилиб оладиган бўлса эди, унда имон беҳуда, ваъда эса қуруқ бўлиб қолар эди. 15 Ахир, қонун Худонинг ғазабини қўзғатади, холос. Қонун бўлмаса, қонунбузарлик ҳам бўлмайди. 16 Шу сабабдан, Худонинг ваъдаси Унинг иноятига боғлиқ бўлиб, фақат имон билан қабул қилинади. Иброҳимнинг имонидай имонга эга бўлганларнинг ҳаммаси қонунга амал қилиб яшайдими, йўқми, унинг зурриёти ҳисобланади. Худонинг ваъдаси албатта уларга ҳам дахлдордир. Ахир, Иброҳим ҳаммамизнинг отамиздир. 17 Муқаддас битикларда қуйидагича ёзилган–ку: “Мен сени кўплаб халқларнинг отаси қиламан.” Ўликларни тирилтирувчи ва мавжуд бўлмаган нарсаларни вужудга келтирувчи Худога ишониб, Иброҳим ҳаммамизнинг отамиз бўлди.
18 Худо Иброҳимга яна: “Сенинг наслинг сон–саноқсиз бўлади” , деган эди. Иброҳим кўп халқларнинг отаси бўлишга ҳеч бир умиди қолмаганига қарамасдан, имони туфайли умидвор эди. 19 Ўзи юз ёшга яқинлашиб, бадани анча заифлашиб қолганига ва хотини Соранинг бепуштлигига қарамай, Иброҳимнинг имони заифлашмади. 20 Иброҳим имонсизлик қилмади, Худонинг ваъдасидан шубҳаланмади, балки имонида маҳкам туриб, Худони улуғлади. 21 Худо берган ваъдасини бажо келтиришга қодир, деб Иброҳим қатъий ишонар эди. 22 Мана шу ишончи учун Худо Иброҳимни солиҳ деб билди. 23 Бу сўзлар фақатгина Иброҳимга тегишли эмас, 24 балки биз учун ҳам айтилган. Агар Раббимиз Исони ўликдан тирилтирган Худога ишонсак, Худо бизни ҳам оқлайди. 25 Худо бизнинг гуноҳларимиз учун Исо Масиҳни ўлимга топширди ва оқланишимиз учун Уни тирилтирди.
