3–BOB
Xudoning sadoqati
1 Xoʻsh, yahudiylarning qanday ustunligi bor? Yoki sunnatning nima foydasi bor? 2 Yahudiylar har jihatdan katta ustunlikka egadirlar. Bu ustunlik, eng avvalo, shundan iboratki, Xudoning kalomi ularga ishonib topshirilgan. 3 Ularning baʼzilari ishonmagan boʻlsa, nima boʻpti? Ularning ishonmaganligi Xudoning sadoqatini bekor qiladimi? 4 Yoʻq, aslo! Axir, har bir inson yolgʻonchi boʻlsa ham, Xudo haqdir. Muqaddas bitiklarda Xudo haqida shunday yozilgan–ku:
“Shu bois hukm qilganingda Sen barhaqsan,
Aybimni fosh etganingda doimo toʻgʻri boʻlib chiqasan.”
5 Insoniy fikr yuritib aytayin: agar bizning qabihligimiz Xudoning odilligini yanada ochiqroq koʻrsatsa, nima ham derdik? Boshimizga qahr–gʻazab yogʻdirgani uchun Xudo adolatsizmi? 6 Yoʻq, aslo! Xudo odildir. Xudo adolatsiz boʻlganda edi, qanday qilib dunyoni hukm qila olardi?! 7 Mening yolgʻonchiligim Xudoning haqligiga urgʻu berib, Unga yanada koʻproq shon–shuhrat keltirar ekan, nima uchun men gunohkor sifatida mahkum qilinishim kerak? 8 Shunday ekan, “Yaxshilik keltirsin deb, yomonlik qilaveraylikmi?” deyishimiz kerakmi?! Baʼzilar bizga tuhmat qilib, Pavlus oʻshanday taʼlim beryapti, deb aytmoqdalar. Bunday tuhmat qilganlar jazoga loyiqdir.
Hamma gunohkordir
9 Xoʻsh, biz, yahudiylar, boshqalardan ustunmizmi? Yoʻq, aslo! Yuqorida isbotlab oʻtganimday, xoh yahudiy boʻlsin, xoh gʻayriyahudiy boʻlsin, har bir inson gunohning hokimiyati ostidadir. 10 Axir, Muqaddas bitiklarda quyidagiday yozilgan–ku:
“Hech bir solih kimsa yoʻqdir,
Hatto bironta ham yoʻq!
11 Bironta ham idrokli zot yoʻq,
Hech kim Xudoga yuz burmaydi.
12 Hammasi yoʻldan ozgan, birday buzilgan,
Yaxshilik qiluvchi bir kimsa yoʻqdir,
Hatto bironta ham yoʻq!
13 Ochiq qabr kabidir ogʻizlari,
Ular yolgʻon gapiradi.
Tillaridan ilon zahri tomadi .
14 Ularning ogʻzidan achchiq soʻzlar, laʼnat chiqadi .
15 Ularning oyoqlari qon toʻkishga shoshiladi,
16 Qadamidan halokatu vayrona keladi.
17 Ular tinchlik yoʻllarini bilmaydi ,
18 Ular Xudodan qoʻrqmaydi.”
19 Biz bilamizki, qonun neki buyurgan boʻlsa, qonunga qaram boʻlganlarga buyurgan, toki har bir ogʻiz yumilsin va butun dunyo Xudo oldida javobgar boʻlsin. 20 Zotan, qonunga amal qilish orqali hech kim Xudoning oldida oqlana olmaydi, chunki qonun insonga gunohkorligini yanada aniqroq koʻrsatadi.
Gunohkorni oqlash — Xudoning ishi
21 Mana endi qonunga aloqasiz ravishda oqlanish yoʻlini Xudoning Oʻzi aniq koʻrsatdi. Buni Tavrot va Paygʻambarlar bitiklari tasdiqlaydi. 22 Biz Iso Masihga boʻlgan imonimiz orqali Xudoning oldida oqlanamiz. Odamlar orasida hech bir farq yoʻq. 23 Axir, hamma gunoh qilgan va Xudoning ulugʻvorligidan mahrumdir. 24 Lekin gunohkorlar Iso Masih orqali gunohlaridan ozod boʻladilar. Ular oqlanishga loyiq boʻlmasalar–da, Xudoning inoyati bilan oqlanadilar. 25-26 Xudo Iso Masihni bu dunyoga yubordi. Masihga ishonganlarning hammasi Uning toʻkilgan qoni orqali Xudo bilan yarashdi . Shunday qilib, Xudo Oʻzining adolatini namoyon qildi. U oʻtmishda sabr–toqat qilib, ilgari qilingan gunohlarni jazosiz qoldirgan edi, endi esa Iso Masihga ishonganlarni oqlab, Oʻzining haq ekanligini koʻrsatmoqda.
27 Endi maqtanishga arzigulik narsamiz qoldimi? Yoʻq, maqtovga oʻrin yoʻq. Nima sababga koʻra? Amrlarni bajo keltirishni talab qiluvchi qonunga koʻrami? Yoʻq, insonlar imon orqali oqlanganda maqtanishga hech oʻrin qolmaydi. 28 Axir, inson qonun talablarini bajo qilish orqali emas, balki imon orqali oqlanadi, biz bunga qanoat hosil qildik. 29 Nahotki Xudo faqat yahudiylarning Xudosi boʻlsa?! U boshqa xalqlarning ham Xudosi emasmi? Albatta, U boshqa xalqlarning ham Xudosidir. 30 Axir, Xudo yagona–ku! Sunnatlilarni ham, sunnatsizlarni ham Xudo imon orqali oqlaydi. 31 Demak, biz bu imon bilan qonunni bekor qilyapmizmi? Yoʻq, aslo! Aksincha, qonunni tasdiqlayapmiz.
3–БОБ
Худонинг садоқати
1 Хўш, яҳудийларнинг қандай устунлиги бор? Ёки суннатнинг нима фойдаси бор? 2 Яҳудийлар ҳар жиҳатдан катта устунликка эгадирлар. Бу устунлик, энг аввало, шундан иборатки, Худонинг каломи уларга ишониб топширилган. 3 Уларнинг баъзилари ишонмаган бўлса, нима бўпти? Уларнинг ишонмаганлиги Худонинг садоқатини бекор қиладими? 4 Йўқ, асло! Ахир, ҳар бир инсон ёлғончи бўлса ҳам, Худо ҳақдир. Муқаддас битикларда Худо ҳақида шундай ёзилган–ку:
“Шу боис ҳукм қилганингда Сен барҳақсан,
Айбимни фош этганингда доимо тўғри бўлиб чиқасан.”
5 Инсоний фикр юритиб айтайин: агар бизнинг қабиҳлигимиз Худонинг одиллигини янада очиқроқ кўрсатса, нима ҳам дердик? Бошимизга қаҳр–ғазаб ёғдиргани учун Худо адолатсизми? 6 Йўқ, асло! Худо одилдир. Худо адолатсиз бўлганда эди, қандай қилиб дунёни ҳукм қила оларди?! 7 Менинг ёлғончилигим Худонинг ҳақлигига урғу бериб, Унга янада кўпроқ шон–шуҳрат келтирар экан, нима учун мен гуноҳкор сифатида маҳкум қилинишим керак? 8 Шундай экан, “Яхшилик келтирсин деб, ёмонлик қилаверайликми?” дейишимиз керакми?! Баъзилар бизга туҳмат қилиб, Павлус ўшандай таълим беряпти, деб айтмоқдалар. Бундай туҳмат қилганлар жазога лойиқдир.
Ҳамма гуноҳкордир
9 Хўш, биз, яҳудийлар, бошқалардан устунмизми? Йўқ, асло! Юқорида исботлаб ўтганимдай, хоҳ яҳудий бўлсин, хоҳ ғайрияҳудий бўлсин, ҳар бир инсон гуноҳнинг ҳокимияти остидадир. 10 Ахир, Муқаддас битикларда қуйидагидай ёзилган–ку:
“Ҳеч бир солиҳ кимса йўқдир,
Ҳатто биронта ҳам йўқ!
11 Биронта ҳам идрокли зот йўқ,
Ҳеч ким Худога юз бурмайди.
12 Ҳаммаси йўлдан озган, бирдай бузилган,
Яхшилик қилувчи бир кимса йўқдир,
Ҳатто биронта ҳам йўқ!
13 Очиқ қабр кабидир оғизлари,
Улар ёлғон гапиради.
Тилларидан илон заҳри томади .
14 Уларнинг оғзидан аччиқ сўзлар, лаънат чиқади .
15 Уларнинг оёқлари қон тўкишга шошилади,
16 Қадамидан ҳалокату вайрона келади.
17 Улар тинчлик йўлларини билмайди ,
18 Улар Худодан қўрқмайди.”
19 Биз биламизки, қонун неки буюрган бўлса, қонунга қарам бўлганларга буюрган, токи ҳар бир оғиз юмилсин ва бутун дунё Худо олдида жавобгар бўлсин. 20 Зотан, қонунга амал қилиш орқали ҳеч ким Худонинг олдида оқлана олмайди, чунки қонун инсонга гуноҳкорлигини янада аниқроқ кўрсатади.
Гуноҳкорни оқлаш — Худонинг иши
21 Мана энди қонунга алоқасиз равишда оқланиш йўлини Худонинг Ўзи аниқ кўрсатди. Буни Таврот ва Пайғамбарлар битиклари тасдиқлайди. 22 Биз Исо Масиҳга бўлган имонимиз орқали Худонинг олдида оқланамиз. Одамлар орасида ҳеч бир фарқ йўқ. 23 Ахир, ҳамма гуноҳ қилган ва Худонинг улуғворлигидан маҳрумдир. 24 Лекин гуноҳкорлар Исо Масиҳ орқали гуноҳларидан озод бўладилар. Улар оқланишга лойиқ бўлмасалар–да, Худонинг инояти билан оқланадилар. 25-26 Худо Исо Масиҳни бу дунёга юборди. Масиҳга ишонганларнинг ҳаммаси Унинг тўкилган қони орқали Худо билан ярашди . Шундай қилиб, Худо Ўзининг адолатини намоён қилди. У ўтмишда сабр–тоқат қилиб, илгари қилинган гуноҳларни жазосиз қолдирган эди, энди эса Исо Масиҳга ишонганларни оқлаб, Ўзининг ҳақ эканлигини кўрсатмоқда.
27 Энди мақтанишга арзигулик нарсамиз қолдими? Йўқ, мақтовга ўрин йўқ. Нима сабабга кўра? Амрларни бажо келтиришни талаб қилувчи қонунга кўрами? Йўқ, инсонлар имон орқали оқланганда мақтанишга ҳеч ўрин қолмайди. 28 Ахир, инсон қонун талабларини бажо қилиш орқали эмас, балки имон орқали оқланади, биз бунга қаноат ҳосил қилдик. 29 Наҳотки Худо фақат яҳудийларнинг Худоси бўлса?! У бошқа халқларнинг ҳам Худоси эмасми? Албатта, У бошқа халқларнинг ҳам Худосидир. 30 Ахир, Худо ягона–ку! Суннатлиларни ҳам, суннатсизларни ҳам Худо имон орқали оқлайди. 31 Демак, биз бу имон билан қонунни бекор қиляпмизми? Йўқ, асло! Аксинча, қонунни тасдиқлаяпмиз.
