10–BOB
Najot hamma uchun
1 Birodarlarim, men oʻz xalqim Isroilning najot topishini chin dildan istayman va bu uchun Xudoga iltijo qilaman. 2 Axir, oʻzim guvohman: ular jon–jahdlari bilan Xudoga berilganlar, ammo haqiqiy tushunchaga ega emaslar. 3 Xudoning insonlarni oqlash yoʻlini tushunmasdan, oʻzlarini oqlash niyatida, ular Xudoning haq yoʻliga boʻysunmadilar. 4 Iso Masih esa qonunning maqsadini amalga oshirdi, shu tariqa hamma imon orqali oqlanadi.
5 Qonun orqali oqlanish haqida Muso quyidagicha yozgan edi: “Xudoning qonun–qoidalariga rioya qilgan odam hayotdan bahramand boʻladi.” 6-7 Imon orqali oqlanish haqida esa Muqaddas bitiklarda nima deb yozilgan? “Yuragingizda: «Kim osmonga chiqadi? Kim tubsiz chuqurlikka tushadi?» deya soʻramanglar”, deb yozilgan . Demak, Masihni yerga tushirish uchun hech kim osmonga chiqishi shart emas, Masihni tiriltirish uchun ham hech kim oʻliklar diyoriga tushishi shart emas. 8 Axir, Muqaddas bitiklarda yana shunday yozilgan: “Bu kalom sizning yaqiningizdadir, ogʻzingizda va yuragingizdadir.” Biz vaʼz qilayotgan imon haqidagi kalom ana shudir. 9 Agar oʻz ogʻzingiz bilan Isoni Rabbim deb eʼtirof etib, Xudo Uni oʻlikdan tiriltirganiga chin yurakdan ishonsangiz, najot topasiz. 10 Chunki inson qalbidan ishonib oqlanadi va ogʻzi bilan eʼtirof etib najot topadi. 11 Muqaddas bitiklarda yozilganday: “Unga ishongan hech bir inson uyatga qolmaydi.” 12 Yahudiylar bilan gʻayriyahudiylar orasida aslo farq yoʻq. Ularning Rabbiysi bir boʻlib, Unga iltijo qilganlarning birontasidan U Oʻz mehr–shafqatini ayamaydi. 13 Axir, “Rabbimizga iltijo qilgan har bir inson qutqariladi” , deb yozilgan–ku.
14 Ammo Rabbimiz Isoga ishonmaganlar qanday qilib Unga iltijo qiladilar?! U haqda eshitmagan boʻlsalar, qanday qilib Unga ishonadilar?! Hech kim ularga Xushxabarni eʼlon qilmasa, qanday qilib eshitadilar?! 15 Ularni hech kim yubormasa, qanday qilib Xushxabarni eʼlon qiladilar?! Muqaddas bitiklarda quyidagicha yozilgan–ku: “Xushxabarni eʼlon qilgan xabarchining qadamlari naqadar goʻzal!” 16 Ammo Xushxabarga hamma ham ishonmadi. Ishayo ham shunday degan–ku: “Ey Egam, bizning xabarimizga kim ishondi?”
17 Demak, imon tinglashdan, yaʼni Masih haqidagi Xushxabarni eshitishdan kelib chiqadi. 18 Mening bir savolim bor. Xoʻsh, ular eshitmaganmidi? Albatta eshitganlar, chunki “xabarchilarning ovozlari har tomonga tarqaldi, xabarlari olamning chetigacha yetib bordi” , deb yozilgan–ku. 19 Bundan yana bir savol kelib chiqadi. Xoʻsh, Isroil xalqi xabarni tushunmadimi? Muso orqali Xudo shunday degandi:
“Men ham xalq boʻlmaganlar bilan ularning rashkini keltiraman,
Aqlsiz bir xalq bilan gʻazabini qoʻzgʻataman.”
20 Ishayo ham Xudoning soʻzlarini jasorat bilan yetkazgan:
“Meni izlamaganlar topdi,
Meni soʻramaganlarga koʻrindim.”
21 Isroil xalqi haqida esa shunday deydi:
“Itoatsiz va oʻjar xalqni
Kun boʻyi quchoq ochib kutdim.”
10–БОБ
Нажот ҳамма учун
1 Биродарларим, мен ўз халқим Исроилнинг нажот топишини чин дилдан истайман ва бу учун Худога илтижо қиламан. 2 Ахир, ўзим гувоҳман: улар жон–жаҳдлари билан Худога берилганлар, аммо ҳақиқий тушунчага эга эмаслар. 3 Худонинг инсонларни оқлаш йўлини тушунмасдан, ўзларини оқлаш ниятида, улар Худонинг ҳақ йўлига бўйсунмадилар. 4 Исо Масиҳ эса қонуннинг мақсадини амалга оширди, шу тариқа ҳамма имон орқали оқланади.
5 Қонун орқали оқланиш ҳақида Мусо қуйидагича ёзган эди: “Худонинг қонун–қоидаларига риоя қилган одам ҳаётдан баҳраманд бўлади.” 6-7 Имон орқали оқланиш ҳақида эса Муқаддас битикларда нима деб ёзилган? “Юрагингизда: «Ким осмонга чиқади? Ким тубсиз чуқурликка тушади?» дея сўраманглар”, деб ёзилган . Демак, Масиҳни ерга тушириш учун ҳеч ким осмонга чиқиши шарт эмас, Масиҳни тирилтириш учун ҳам ҳеч ким ўликлар диёрига тушиши шарт эмас. 8 Ахир, Муқаддас битикларда яна шундай ёзилган: “Бу калом сизнинг яқинингиздадир, оғзингизда ва юрагингиздадир.” Биз ваъз қилаётган имон ҳақидаги калом ана шудир. 9 Агар ўз оғзингиз билан Исони Раббим деб эътироф этиб, Худо Уни ўликдан тирилтирганига чин юракдан ишонсангиз, нажот топасиз. 10 Чунки инсон қалбидан ишониб оқланади ва оғзи билан эътироф этиб нажот топади. 11 Муқаддас битикларда ёзилгандай: “Унга ишонган ҳеч бир инсон уятга қолмайди.” 12 Яҳудийлар билан ғайрияҳудийлар орасида асло фарқ йўқ. Уларнинг Раббийси бир бўлиб, Унга илтижо қилганларнинг биронтасидан У Ўз меҳр–шафқатини аямайди. 13 Ахир, “Раббимизга илтижо қилган ҳар бир инсон қутқарилади” , деб ёзилган–ку.
14 Аммо Раббимиз Исога ишонмаганлар қандай қилиб Унга илтижо қиладилар?! У ҳақда эшитмаган бўлсалар, қандай қилиб Унга ишонадилар?! Ҳеч ким уларга Хушхабарни эълон қилмаса, қандай қилиб эшитадилар?! 15 Уларни ҳеч ким юбормаса, қандай қилиб Хушхабарни эълон қиладилар?! Муқаддас битикларда қуйидагича ёзилган–ку: “Хушхабарни эълон қилган хабарчининг қадамлари нақадар гўзал!” 16 Аммо Хушхабарга ҳамма ҳам ишонмади. Ишаё ҳам шундай деган–ку: “Эй Эгам, бизнинг хабаримизга ким ишонди?”
17 Демак, имон тинглашдан, яъни Масиҳ ҳақидаги Хушхабарни эшитишдан келиб чиқади. 18 Менинг бир саволим бор. Хўш, улар эшитмаганмиди? Албатта эшитганлар, чунки “хабарчиларнинг овозлари ҳар томонга тарқалди, хабарлари оламнинг четигача етиб борди” , деб ёзилган–ку. 19 Бундан яна бир савол келиб чиқади. Хўш, Исроил халқи хабарни тушунмадими? Мусо орқали Худо шундай деганди:
“Мен ҳам халқ бўлмаганлар билан уларнинг рашкини келтираман,
Ақлсиз бир халқ билан ғазабини қўзғатаман.”
20 Ишаё ҳам Худонинг сўзларини жасорат билан етказган:
“Мени изламаганлар топди,
Мени сўрамаганларга кўриндим.”
21 Исроил халқи ҳақида эса шундай дейди:
“Итоатсиз ва ўжар халқни
Кун бўйи қучоқ очиб кутдим.”
