97–SANO
Sano.
1 Yangi bir qoʻshiq ayting Egamizga!
Axir, U ajoyib ishlar qildi.
Oʻzining oʻng qoʻli, muqaddas bilagi bilan zafar qozondi.
2 Egamiz zafarining dongʻini taratdi,
Xalqlarga najotini namoyon qildi.
3 Isroil xalqiga boʻlgan sevgisiyu sadoqatini yodida tutdi.
Yerning toʻrt tomoni Xudoyimiz bergan najotni koʻrdi.
4 Ey zamin ahli, Egamizni olqishlab, xitob qiling,
Sevinchli kuy–qoʻshiqlar ila Unga xitob qiling.
5 Lira chalib, Egamizga hamdu sano kuylang,
Lira chalib, qoʻshiqlar ayting.
6 Karnayu burgʻularni chaling,
Shohni — Egamizni olqishlab, xitob qiling.
7 Joʻsh ursin dengizu undagi hamma jonzot,
Joʻsh ursin olamu unda yashovchi hamma maxluqot.
8 Egamiz oldida daryolar qarsak chalsin,
Qirlar birga shodlanib qoʻshiq aytsin.
9 Zotan, Egamiz yerda hukm etgani kelmoqda,
U olamni toʻgʻri hukm etadi,
Adolat ila xalqlarni hukm qiladi.
97–САНО
Сано.
1 Янги бир қўшиқ айтинг Эгамизга!
Ахир, У ажойиб ишлар қилди.
Ўзининг ўнг қўли, муқаддас билаги билан зафар қозонди.
2 Эгамиз зафарининг донғини таратди,
Халқларга нажотини намоён қилди.
3 Исроил халқига бўлган севгисию садоқатини ёдида тутди.
Ернинг тўрт томони Худойимиз берган нажотни кўрди.
4 Эй замин аҳли, Эгамизни олқишлаб, хитоб қилинг,
Севинчли куй–қўшиқлар ила Унга хитоб қилинг.
5 Лира чалиб, Эгамизга ҳамду сано куйланг,
Лира чалиб, қўшиқлар айтинг.
6 Карнайу бурғуларни чалинг,
Шоҳни — Эгамизни олқишлаб, хитоб қилинг.
7 Жўш урсин денгизу ундаги ҳамма жонзот,
Жўш урсин оламу унда яшовчи ҳамма махлуқот.
8 Эгамиз олдида дарёлар қарсак чалсин,
Қирлар бирга шодланиб қўшиқ айтсин.
9 Зотан, Эгамиз ерда ҳукм этгани келмоқда,
У оламни тўғри ҳукм этади,
Адолат ила халқларни ҳукм қилади.
