93–SANO
1 Ey Egam, Sen qasoskor Xudosan,
Ey qasoskor Xudo, nuringni soch!
2 Qani, boʻl, ey yer yuzini hukm etguvchi,
Magʻrurlarning jazosini ber.
3 Qachongacha fosiqlar tantana qilar?
Ey Egam, qachongacha?
4 Ogʻizlaridan balandparvoz soʻzlar otilib chiqyapti–ku!
Hamma badkirdorlar maqtanyapti–ku!
5 Ey Egam, ular xalqingni ezyapti,
Oʻzing tanlagan elatingga zulm qilyapti.
6 Beva, musofirni ular oʻldiryapti,
Yetimlarni yoʻq qilyapti.
7 Ular aytyapti: “Egamiz koʻrmas,
Yoqubning Xudosi eʼtibor bermas.”
8 Tushunib oling, ey xalq orasidagi tentaklar.
Qachon sizlarga aql kirar, ey ahmoqlar?!
9 Quloqni yaratgan eshitmaydimi?!
Koʻzni ato etgan koʻrmaydimi?!
10 Xalqlarga tanbeh beruvchi jazolamaydimi?!
Uning Oʻzi insonga oʻrgatadi–ku!
11 Egamiz insonning niyatini anglaydi,
Niyatlarimiz behudaligini biladi.
12 Ey Egam, baxtlidir Sening tanbehingni olganlar,
Baxtlidir Sening qonuningdan oʻrganuvchilar.
13 Yomon kunlardan ularni Sen omon saqlaysan.
Fosiq uchun chuqur qazilguncha ular omon boʻladilar.
14 Ey Egam, Oʻz xalqingni tark etmaysan,
Oʻzing tanlagan elatingni tashlab qoʻymaysan.
15 Hukmning asosi yana adolat boʻladi,
Jamiki pokdillar adolatni qoʻllab–quvatlaydi.
16 Fosiqlardan kim meni himoya qiladi?
Badkirdorlarga qarshi kim men tomon boʻladi?
17 Ey Egam, agarda Sen menga yordam bermaganingda,
Mening jonim tezda oʻlim sukunatiga choʻkardi.
18 “Oyoqlarim qoqiladi”, deb oʻylaganimda,
Ey Egam, sodiq sevging meni qoʻlladi.
19 Ichim xavotirga toʻlib ketganda,
Sen bergan tasalli menga quvonch keltirdi.
20 Zolim hukmdorlar Xudoga sherik boʻlarmi?!
Axir, ular farmonlari bilan kulfat keltiradi–ku!
21 Ular solihlarga qarshi birlashadi,
Gunohsizlarni oʻlimga mahkum etadi.
22 Ammo Egam mening qalʼamdir,
Mening panoh qoyam Xudodir.
23 Fosiqligi uchun Egamiz ularni qirib tashlaydi,
Gunohlari uchun jazosini beradi.
Ha, Egamiz Xudo ularni ildizidan quritadi.
93–САНО
1 Эй Эгам, Сен қасоскор Худосан,
Эй қасоскор Худо, нурингни соч!
2 Қани, бўл, эй ер юзини ҳукм этгувчи,
Мағрурларнинг жазосини бер.
3 Қачонгача фосиқлар тантана қилар?
Эй Эгам, қачонгача?
4 Оғизларидан баландпарвоз сўзлар отилиб чиқяпти–ку!
Ҳамма бадкирдорлар мақтаняпти–ку!
5 Эй Эгам, улар халқингни эзяпти,
Ўзинг танлаган элатингга зулм қиляпти.
6 Бева, мусофирни улар ўлдиряпти,
Етимларни йўқ қиляпти.
7 Улар айтяпти: “Эгамиз кўрмас,
Ёқубнинг Худоси эътибор бермас.”
8 Тушуниб олинг, эй халқ орасидаги тентаклар.
Қачон сизларга ақл кирар, эй аҳмоқлар?!
9 Қулоқни яратган эшитмайдими?!
Кўзни ато этган кўрмайдими?!
10 Халқларга танбеҳ берувчи жазоламайдими?!
Унинг Ўзи инсонга ўргатади–ку!
11 Эгамиз инсоннинг ниятини англайди,
Ниятларимиз беҳудалигини билади.
12 Эй Эгам, бахтлидир Сенинг танбеҳингни олганлар,
Бахтлидир Сенинг қонунингдан ўрганувчилар.
13 Ёмон кунлардан уларни Сен омон сақлайсан.
Фосиқ учун чуқур қазилгунча улар омон бўладилар.
14 Эй Эгам, Ўз халқингни тарк этмайсан,
Ўзинг танлаган элатингни ташлаб қўймайсан.
15 Ҳукмнинг асоси яна адолат бўлади,
Жамики покдиллар адолатни қўллаб–қуватлайди.
16 Фосиқлардан ким мени ҳимоя қилади?
Бадкирдорларга қарши ким мен томон бўлади?
17 Эй Эгам, агарда Сен менга ёрдам бермаганингда,
Менинг жоним тезда ўлим сукунатига чўкарди.
18 “Оёқларим қоқилади”, деб ўйлаганимда,
Эй Эгам, содиқ севгинг мени қўллади.
19 Ичим хавотирга тўлиб кетганда,
Сен берган тасалли менга қувонч келтирди.
20 Золим ҳукмдорлар Худога шерик бўларми?!
Ахир, улар фармонлари билан кулфат келтиради–ку!
21 Улар солиҳларга қарши бирлашади,
Гуноҳсизларни ўлимга маҳкум этади.
22 Аммо Эгам менинг қалъамдир,
Менинг паноҳ қоям Худодир.
23 Фосиқлиги учун Эгамиз уларни қириб ташлайди,
Гуноҳлари учун жазосини беради.
Ҳа, Эгамиз Худо уларни илдизидан қуритади.
