80–SANO
1 Ijrochilar rahbariga. Soz joʻrligida aytiladigan Osif sanosi.
2 Xudoga, qudratimiz manbaiga
Sevinch bilan kuylang!
Yoqubning Xudosiga shodlik ila hayqiring!
3 Qoʻshiq kuylang, doira cherting,
Xushovoz lira, arfa chaling.
4 Burgʻu chaling yangi oy shodiyonasida,
Oy toʻlganda, bayram kunimizda .
5 Isroil uchun bu qonundir,
Yoqub Xudosining farmonidir.
6 Misr yurti ustiga bostirib borganda,
Xudo buni Isroilga qonun qilib berdi.
Men notanish bir ovozni eshitdim:
7 “Yukni oldim yelkangizdan,
— deydi U. —
Qoʻllaringiz savatdan ozod boʻldi .
8 Kulfatda Menga faryod qildingiz, sizni qutqardim,
Bulutlar orasidan sizlarga javob berdim,
Mariva suvlari boʻyida sizlarni sinadim.
9 Eshiting, ey xalqim, tanbeh beraman sizga,
Ey Isroil, koshkiydi quloq solsangiz Menga!
10 Orangizda begona xudolar boʻlmasin,
Boshqa xudolarga sajda qilmanglar.
11 Men sizlarning Egangiz Xudoman,
Sizlarni Misr yurtidan Men olib chiqqanman,
Ogʻzingizni katta oching, Men uni toʻldiraman.
12 Ey xalqim, siz esa ovozimga quloq solmadingiz,
Ey Isroil, Menga itoat etishni rad etdingiz.
13 Oʻz bilganingizcha yashang, deya
Yuraklaringizni oʻjarligicha qoldirdim.
14 Eh, qaniydi siz Menga quloq solsangiz,
Ey Isroil, Mening yoʻllarimdan yursangiz!
15 Tezda dushmanlaringizni boʻysundirardim,
Sizning gʻanimlaringizga zarba berardim.
16 Men, Egangizdan nafratlanganlar
Qoʻrquvdan titrab, tiz choʻkkan boʻlardi,
Ularning halokati to abad davom etardi.
17 Sizlarni bugʻdoyning eng yaxshisi bilan boqardim,
Qoyadan asal chiqarib, sizlarni toʻydirardim.”
80–САНО
1 Ижрочилар раҳбарига. Соз жўрлигида айтиладиган Осиф саноси.
2 Худога, қудратимиз манбаига
Севинч билан куйланг!
Ёқубнинг Худосига шодлик ила ҳайқиринг!
3 Қўшиқ куйланг, доира чертинг,
Хушовоз лира, арфа чалинг.
4 Бурғу чалинг янги ой шодиёнасида,
Ой тўлганда, байрам кунимизда .
5 Исроил учун бу қонундир,
Ёқуб Худосининг фармонидир.
6 Миср юрти устига бостириб борганда,
Худо буни Исроилга қонун қилиб берди.
Мен нотаниш бир овозни эшитдим:
7 “Юкни олдим елкангиздан,
— дейди У. —
Қўлларингиз саватдан озод бўлди .
8 Кулфатда Менга фарёд қилдингиз, сизни қутқардим,
Булутлар орасидан сизларга жавоб бердим,
Марива сувлари бўйида сизларни синадим.
9 Эшитинг, эй халқим, танбеҳ бераман сизга,
Эй Исроил, кошкийди қулоқ солсангиз Менга!
10 Орангизда бегона худолар бўлмасин,
Бошқа худоларга сажда қилманглар.
11 Мен сизларнинг Эгангиз Худоман,
Сизларни Миср юртидан Мен олиб чиққанман,
Оғзингизни катта очинг, Мен уни тўлдираман.
12 Эй халқим, сиз эса овозимга қулоқ солмадингиз,
Эй Исроил, Менга итоат этишни рад этдингиз.
13 Ўз билганингизча яшанг, дея
Юракларингизни ўжарлигича қолдирдим.
14 Эҳ, қанийди сиз Менга қулоқ солсангиз,
Эй Исроил, Менинг йўлларимдан юрсангиз!
15 Тезда душманларингизни бўйсундирардим,
Сизнинг ғанимларингизга зарба берардим.
16 Мен, Эгангиздан нафратланганлар
Қўрқувдан титраб, тиз чўккан бўларди,
Уларнинг ҳалокати то абад давом этарди.
17 Сизларни буғдойнинг энг яхшиси билан боқардим,
Қоядан асал чиқариб, сизларни тўйдирардим.”
