64–SANO
1 Ijrochilar rahbariga. Dovud sanosi. Qoʻshiq.
2 Ey Quddusdagi Xudo, Sen loyiqsan hamdu sanoga,
Senga bergan ontimizni bajo qilamiz.
3 Sensan ibodatlarga javob berguvchi,
Jamiki odamzod Senga keladi.
4 Gunoh ustimizdan tantana qilgan,
Sen esa kechirasan gunohlarimizni .
5 Qutlugʻ hovlimda yashasin deya,
Sen Oʻzing tanlab, olib kelgan inson
Naqadar baxtlidir!
Uyingning, muqaddas Maʼbadingning neʼmatlaridan
Biz bahramand boʻlamiz.
6 Gʻaroyib ishlar koʻrsatib,
Gʻalaba ila bizga javob berasan,
Ey najotkorimiz Xudo!
Yerning toʻrt tomonining,
Hamda eng uzoq dengizlarning umidi Sensan.
7 Kuch bilan Oʻzingni qurollantirgansan,
Qudrating ila togʻlarni joylashtirgansan.
8 Dengizlar hayqirigʻini bostirasan,
Toʻlqinlar shovqinini tinchitasan.
Xalqlar shovqin–suroniga barham berasan.
9 Dunyoning u chetida yashovchilar
Moʻjizalaringdan qoʻrquvga tushadi.
Sharqdan gʻarbgacha xalqlar
Sening ishlaringni sevinch ila kuylaydi.
10 Zaminni Sen sugʻorib parvarishlaysan,
Moʻl–koʻl qilib uni boyitasan.
Ey Xudo, daryolaring suvi limmo–limdir,
Insonlarni don–dun bilan taʼminlashni moʻljallagansan.
11 Egatlarini qondirib sugʻorasan,
Baland joylarini Oʻzing tekislaysan,
Yomgʻir bilan tuprogʻini yumshatasan,
Hosiliga baraka berasan.
12 Moʻl hosil bilan yilga toj kiygizasan,
Aravalaring yurgan yoʻllardan boylik oqadi.
13 Choʻl sersuv oʻtloqzorlarga aylanadi,
Tepaliklar sevinchga burkanadi.
14 Yaylovlar qoʻy suruvlari bilan qoplanadi,
Vodiylar donlarga toʻladi,
Ular sevinchdan hayqirib qoʻshiq aytadi.
64–САНО
1 Ижрочилар раҳбарига. Довуд саноси. Қўшиқ.
2 Эй Қуддусдаги Худо, Сен лойиқсан ҳамду санога,
Сенга берган онтимизни бажо қиламиз.
3 Сенсан ибодатларга жавоб бергувчи,
Жамики одамзод Сенга келади.
4 Гуноҳ устимиздан тантана қилган,
Сен эса кечирасан гуноҳларимизни .
5 Қутлуғ ҳовлимда яшасин дея,
Сен Ўзинг танлаб, олиб келган инсон
Нақадар бахтлидир!
Уйингнинг, муқаддас Маъбадингнинг неъматларидан
Биз баҳраманд бўламиз.
6 Ғаройиб ишлар кўрсатиб,
Ғалаба ила бизга жавоб берасан,
Эй нажоткоримиз Худо!
Ернинг тўрт томонининг,
Ҳамда энг узоқ денгизларнинг умиди Сенсан.
7 Куч билан Ўзингни қуроллантиргансан,
Қудратинг ила тоғларни жойлаштиргансан.
8 Денгизлар ҳайқириғини бостирасан,
Тўлқинлар шовқинини тинчитасан.
Халқлар шовқин–суронига барҳам берасан.
9 Дунёнинг у четида яшовчилар
Мўъжизаларингдан қўрқувга тушади.
Шарқдан ғарбгача халқлар
Сенинг ишларингни севинч ила куйлайди.
10 Заминни Сен суғориб парваришлайсан,
Мўл–кўл қилиб уни бойитасан.
Эй Худо, дарёларинг суви лиммо–лимдир,
Инсонларни дон–дун билан таъминлашни мўлжаллагансан.
11 Эгатларини қондириб суғорасан,
Баланд жойларини Ўзинг текислайсан,
Ёмғир билан тупроғини юмшатасан,
Ҳосилига барака берасан.
12 Мўл ҳосил билан йилга тож кийгизасан,
Араваларинг юрган йўллардан бойлик оқади.
13 Чўл серсув ўтлоқзорларга айланади,
Тепаликлар севинчга бурканади.
14 Яйловлар қўй сурувлари билан қопланади,
Водийлар донларга тўлади,
Улар севинчдан ҳайқириб қўшиқ айтади.
