60–SANO
1 Ijrochilar rahbariga. Torli asboblar joʻrligida aytiladigan Dovud sanosi.
2 Eshitgin, ey Xudo, ohu nolamni,
Tinglagin mening ibodatimni.
3 Yerning u chetidan Senga yolvoraman,
Yuragim qon boʻlganda, Seni chaqiraman.
Yetib boʻlmas baland qoyaga meni olib chiqqin.
4 Sen mening panohim boʻlgandirsan,
Dushmanimga qarshi mustahkam minorasan.
5 Chodiringda to abad maskan qilay,
Qanotlaring soyasida panoh topay.
6 Axir, ey Xudo, ontimni eshitgansan,
Nomingdan qoʻrqqanlarning mulkidan menga ato qilgansan.
7 Shohning umrini uzaytirgin,
Nasllar osha hayotini davom ettirgin.
8 Ey Xudo, u to abad huzuringda taxtda oʻtirsin,
Sevging, sadoqating ila uni himoya qilgin.
9 Shunda Senga har doim hamdu sano kuylayman,
Bergan ontimni har kuni ado etaman.
60–САНО
1 Ижрочилар раҳбарига. Торли асбоблар жўрлигида айтиладиган Довуд саноси.
2 Эшитгин, эй Худо, оҳу ноламни,
Тинглагин менинг ибодатимни.
3 Ернинг у четидан Сенга ёлвораман,
Юрагим қон бўлганда, Сени чақираман.
Етиб бўлмас баланд қояга мени олиб чиққин.
4 Сен менинг паноҳим бўлгандирсан,
Душманимга қарши мустаҳкам минорасан.
5 Чодирингда то абад маскан қилай,
Қанотларинг соясида паноҳ топай.
6 Ахир, эй Худо, онтимни эшитгансан,
Номингдан қўрққанларнинг мулкидан менга ато қилгансан.
7 Шоҳнинг умрини узайтиргин,
Насллар оша ҳаётини давом эттиргин.
8 Эй Худо, у то абад ҳузурингда тахтда ўтирсин,
Севгинг, садоқатинг ила уни ҳимоя қилгин.
9 Шунда Сенга ҳар доим ҳамду сано куйлайман,
Берган онтимни ҳар куни адо этаман.
