5–SANO
1 Ijrochilar rahbariga. Nay joʻrligida aytiladigan Dovud sanosi.
2 Soʻzlarimga quloq tut, ey Egam!
Diqqat qilgin nolalarimga.
3 Eshitgin, madad soʻrab iltijo etaman,
Sen ham Shohimsan, ham Xudoyimsan!
Shu bois Senga ibodat qilaman.
4 Ey Egam! Tong chogʻi ovozimni eshitasan,
Subhidamda Senga yolvoraman,
Sendan javob kutaman.
5 Qabihlikdan mamnun boʻlmaydigan Xudosan Sen,
Senga mehmon boʻlolmas gunohkor inson.
6 Takabburlar huzuringda tura olmaydilar,
Hamma badkirdorlarni Sen yomon koʻrasan.
7 Yolgʻon gapiradiganlarni Sen qirib tashlaysan,
Ey Egam, qonxoʻr, yolgʻonchilardan Sen jirkanasan.
8 Men esa sodiq sevgingning moʻlligi sabab
Sening uyingga kiraman.
Muqaddas Maʼbadingda taʼzim qilaman,
Qoʻrquv ila Senga sajda qilaman.
9 Naqadar dushmanlarim koʻp, ey Egam,
Odilliging bilan meni soʻqmogʻingdan yetakla,
Oʻz yoʻllaringni menga ravshan qil.
10 Dushmanlarim ogʻzidan haqiqat chiqmaydi,
Ularning yuraklari baloyu ofatdir.
Ochiq qabr kabidir ogʻizlari,
Tillari xushomad qiladi.
11 Ey Xudo, ularni jazolagin!
Yomon niyatlari oʻzlarining boshiga yetsin.
Ular Senga qarshi isyon qilganlar.
Gunohlari koʻpligi uchun ularni haydab yuborgin.
12 Senda panoh topganlarning hammasi sevinsin,
To abad shodlikdan ular kuylasin.
Ularni Sen himoya qilganing uchun,
Seni sevganlar sevinch ila joʻshsin.
13 Ey Egam! Sen solih kishilarga baraka berasan,
Sening himmating ularni qalqonday himoya qiladi.
5–САНО
1 Ижрочилар раҳбарига. Най жўрлигида айтиладиган Довуд саноси.
2 Сўзларимга қулоқ тут, эй Эгам!
Диққат қилгин нолаларимга.
3 Эшитгин, мадад сўраб илтижо этаман,
Сен ҳам Шоҳимсан, ҳам Худойимсан!
Шу боис Сенга ибодат қиламан.
4 Эй Эгам! Тонг чоғи овозимни эшитасан,
Субҳидамда Сенга ёлвораман,
Сендан жавоб кутаман.
5 Қабиҳликдан мамнун бўлмайдиган Худосан Сен,
Сенга меҳмон бўлолмас гуноҳкор инсон.
6 Такаббурлар ҳузурингда тура олмайдилар,
Ҳамма бадкирдорларни Сен ёмон кўрасан.
7 Ёлғон гапирадиганларни Сен қириб ташлайсан,
Эй Эгам, қонхўр, ёлғончилардан Сен жирканасан.
8 Мен эса содиқ севгингнинг мўллиги сабаб
Сенинг уйингга кираман.
Муқаддас Маъбадингда таъзим қиламан,
Қўрқув ила Сенга сажда қиламан.
9 Нақадар душманларим кўп, эй Эгам,
Одиллигинг билан мени сўқмоғингдан етакла,
Ўз йўлларингни менга равшан қил.
10 Душманларим оғзидан ҳақиқат чиқмайди,
Уларнинг юраклари балою офатдир.
Очиқ қабр кабидир оғизлари,
Тиллари хушомад қилади.
11 Эй Худо, уларни жазолагин!
Ёмон ниятлари ўзларининг бошига етсин.
Улар Сенга қарши исён қилганлар.
Гуноҳлари кўплиги учун уларни ҳайдаб юборгин.
12 Сенда паноҳ топганларнинг ҳаммаси севинсин,
То абад шодликдан улар куйласин.
Уларни Сен ҳимоя қилганинг учун,
Сени севганлар севинч ила жўшсин.
13 Эй Эгам! Сен солиҳ кишиларга барака берасан,
Сенинг ҳимматинг уларни қалқондай ҳимоя қилади.
