29–SANO
1 Dovud sanosi. Egamizning uyi bagʻishlangan paytda aytilgan qoʻshiq.
2 Ey Egam, Seni ulugʻlayman!
Qabr ogʻzidan meni qutqarding,
Dushmanlarim mening ustimdan kulishiga yoʻl qoʻymading.
3 Sendan madad soʻrab yolvordim, ey Egam Xudo,
Menga Sen berding shifo.
4 Ey Egam, oʻliklar diyoridan jonimni olib chiqding,
Qabrdan meni qutqarib qolding.
5 Ey Egamizning taqvodorlari!
Egamizga hamdu sano kuylanglar,
Uning muqaddas nomini olqishlang.
6 Egamizning gʻazabi bir lahza davom etadi,
Lutfu karami bir umr tugamasdir.
Shu bois qaygʻu–alam tun boʻyi davom etsa ham,
Tong bilan birga shodlik ham kirib keladi.
7 Ishlarim yurishganda,
“Aslo qoqilmasman!” der edim.
8 Ey Egam, lutfu karaming bilan
Meni togʻday mustahkam qilganding.
Ammo yuzingni oʻgirganingda,
Men dahshatga tushdim.
9 Ey Egam, men Senga iltijo qildim,
Shafqat soʻrab, ey Rabbiy, Senga yolvordim:
10 Agar men kirib ketsam qabrga,
Mening oʻlimimdan ne foyda Senga?!
Tuproq Senga hamdu sano aytarmi?!
Sening sodiqligingni u soʻylarmi?!
11 Eshit, ey Egam, menga rahm qilgin,
Ey Egam, menga madadkor boʻlgin!
12 Azamni Sen toʻyga aylantirding,
Aza libosini egnimdan olib tashlading,
Shodlikni menga kiygizding.
13 Qalbim sukut saqlamay, Seni kuylab sano oʻqisin,
Ey Egam Xudo, Senga to abad shukur aytaman.
29–САНО
1 Довуд саноси. Эгамизнинг уйи бағишланган пайтда айтилган қўшиқ.
2 Эй Эгам, Сени улуғлайман!
Қабр оғзидан мени қутқардинг,
Душманларим менинг устимдан кулишига йўл қўймадинг.
3 Сендан мадад сўраб ёлвордим, эй Эгам Худо,
Менга Сен бердинг шифо.
4 Эй Эгам, ўликлар диёридан жонимни олиб чиқдинг,
Қабрдан мени қутқариб қолдинг.
5 Эй Эгамизнинг тақводорлари!
Эгамизга ҳамду сано куйланглар,
Унинг муқаддас номини олқишланг.
6 Эгамизнинг ғазаби бир лаҳза давом этади,
Лутфу карами бир умр тугамасдир.
Шу боис қайғу–алам тун бўйи давом этса ҳам,
Тонг билан бирга шодлик ҳам кириб келади.
7 Ишларим юришганда,
“Асло қоқилмасман!” дер эдим.
8 Эй Эгам, лутфу караминг билан
Мени тоғдай мустаҳкам қилгандинг.
Аммо юзингни ўгирганингда,
Мен даҳшатга тушдим.
9 Эй Эгам, мен Сенга илтижо қилдим,
Шафқат сўраб, эй Раббий, Сенга ёлвордим:
10 Агар мен кириб кетсам қабрга,
Менинг ўлимимдан не фойда Сенга?!
Тупроқ Сенга ҳамду сано айтарми?!
Сенинг содиқлигингни у сўйларми?!
11 Эшит, эй Эгам, менга раҳм қилгин,
Эй Эгам, менга мададкор бўлгин!
12 Азамни Сен тўйга айлантирдинг,
Аза либосини эгнимдан олиб ташладинг,
Шодликни менга кийгиздинг.
13 Қалбим сукут сақламай, Сени куйлаб сано ўқисин,
Эй Эгам Худо, Сенга то абад шукур айтаман.
