28–SANO
Dovud sanosi.
1 Egamizga hamdlar ayting, ey ilohiy zotlar ,
Egamizning qudratiyu shuhratiga hamdlar oʻqing.
2 Egamizning sharafiga hamdlar oʻqing,
Muqaddas ulugʻvorlikka burkangan Egamizga sajda qiling!
3 Egamizning ovozi suvlar uzra eshitiladi,
Ulugʻvor Xudo guldirab sado beradi.
Ha, azim suvlar uzra
Egamiz guldirab sado beradi.
4 Egamizning ovozi qudratlidir,
Egamizning ovozi haybatlidir.
5 Egamizning ovozi sadr daraxtlarini qulatadi,
Hatto Lubnondagi sadr daraxtlarini parchalab tashlaydi.
6 Lubnon togʻlarini Egamiz buqaday sakratadi,
Ha, Xermon togʻini yovvoyi buzoqday sakratadi.
7 Egamizning ovozi chaqmoq chaqtiradi,
8 Egamizning ovozi sahroni titratadi,
Egamiz Kadesh sahrosini larzaga soladi.
9 Egamizning ovozi ulkan daraxtlarni egib yuboradi ,
Oʻrmonlarni yalangʻochlab, shilib yuboradi,
“Egamiz ulugʻvordir”, deb Maʼbadida hamma kuylaydi.
10 Egamiz toʻfonni jilovladi,
U to abad Shoh boʻlib taxtda oʻtiradi.
11 Egamiz Oʻz xalqiga kuch ato etsin,
Oʻz xalqiga tinchlik bilan baraka bersin.
28–САНО
Довуд саноси.
1 Эгамизга ҳамдлар айтинг, эй илоҳий зотлар ,
Эгамизнинг қудратию шуҳратига ҳамдлар ўқинг.
2 Эгамизнинг шарафига ҳамдлар ўқинг,
Муқаддас улуғворликка бурканган Эгамизга сажда қилинг!
3 Эгамизнинг овози сувлар узра эшитилади,
Улуғвор Худо гулдираб садо беради.
Ҳа, азим сувлар узра
Эгамиз гулдираб садо беради.
4 Эгамизнинг овози қудратлидир,
Эгамизнинг овози ҳайбатлидир.
5 Эгамизнинг овози садр дарахтларини қулатади,
Ҳатто Лубнондаги садр дарахтларини парчалаб ташлайди.
6 Лубнон тоғларини Эгамиз буқадай сакратади,
Ҳа, Хермон тоғини ёввойи бузоқдай сакратади.
7 Эгамизнинг овози чақмоқ чақтиради,
8 Эгамизнинг овози саҳрони титратади,
Эгамиз Кадеш саҳросини ларзага солади.
9 Эгамизнинг овози улкан дарахтларни эгиб юборади ,
Ўрмонларни яланғочлаб, шилиб юборади,
“Эгамиз улуғвордир”, деб Маъбадида ҳамма куйлайди.
10 Эгамиз тўфонни жиловлади,
У то абад Шоҳ бўлиб тахтда ўтиради.
11 Эгамиз Ўз халқига куч ато этсин,
Ўз халқига тинчлик билан барака берсин.
