2–SANO
1 Nega quturadi xalqlar?!
Nega behuda fitna qilar elatlar?!
2 Zamin shohlari Egamizga
Va U tanlagan shohga qarshi saf tortadilar.
Hukmdorlar fitna qoʻzgʻab, shunday deydilar:
3 “Sindiraylik ular solgan kishanlarni,
Olib tashlaylik boʻynimizdan sirtmoqlarni.”
4 Samoda hukmron boʻlgan Rabbiy esa
Ularni masxaralab, ustidan kuladi.
5 Rabbiy gʻazab bilan ularni ogoh etadi,
Qahrini sochib, vahimaga solib aytadi:
6 “Men Sionga , Oʻzimning muqaddas tepaligimga
Oʻz shohimni joylashtirdim.”
7 Egamizning soʻzlarini shoh eʼlon qilmoqda:
“Egamiz menga shunday dedi:
«Sen Mening oʻgʻlimsan,
Bugun Men senga ota boʻldim .
8 Tila, xalqlarni senga mulk qilib beraman,
Yerning toʻrt tomoni seniki boʻladi.
9 Temir xivchin ila ularni urib ezasan ,
Sopol koʻzani sindirganday ularni parchalaysan.»”
10 Ey shohlar! Endi aql bilan ish qiling.
Ey zamin hukmdorlari! Ogoh boʻling.
11 Qoʻrquv ila Egamizga sajda qiling!
Vahima ila tavba qiling!
12 Uning oʻgʻliga taʼzim qiling,
Boʻlmasa U gʻazablanadi,
Yoʻlingizda yoʻq boʻlib ketasiz,
Uning gʻazabi tez alanga oladi.
Naqadar baxtlidir Unda panoh topganlar!
2–САНО
1 Нега қутуради халқлар?!
Нега беҳуда фитна қилар элатлар?!
2 Замин шоҳлари Эгамизга
Ва У танлаган шоҳга қарши саф тортадилар.
Ҳукмдорлар фитна қўзғаб, шундай дейдилар:
3 “Синдирайлик улар солган кишанларни,
Олиб ташлайлик бўйнимиздан сиртмоқларни.”
4 Самода ҳукмрон бўлган Раббий эса
Уларни масхаралаб, устидан кулади.
5 Раббий ғазаб билан уларни огоҳ этади,
Қаҳрини сочиб, ваҳимага солиб айтади:
6 “Мен Сионга , Ўзимнинг муқаддас тепалигимга
Ўз шоҳимни жойлаштирдим.”
7 Эгамизнинг сўзларини шоҳ эълон қилмоқда:
“Эгамиз менга шундай деди:
«Сен Менинг ўғлимсан,
Бугун Мен сенга ота бўлдим .
8 Тила, халқларни сенга мулк қилиб бераман,
Ернинг тўрт томони сеники бўлади.
9 Темир хивчин ила уларни уриб эзасан ,
Сопол кўзани синдиргандай уларни парчалайсан.»”
10 Эй шоҳлар! Энди ақл билан иш қилинг.
Эй замин ҳукмдорлари! Огоҳ бўлинг.
11 Қўрқув ила Эгамизга сажда қилинг!
Ваҳима ила тавба қилинг!
12 Унинг ўғлига таъзим қилинг,
Бўлмаса У ғазабланади,
Йўлингизда йўқ бўлиб кетасиз,
Унинг ғазаби тез аланга олади.
Нақадар бахтлидир Унда паноҳ топганлар!
