15–SANO
Dovud qoʻshigʻi.
1 Oʻzing saqla meni, ey Xudo!
Men Senda panoh topaman.
2 Egamga aytdim: “Mening Rabbimsan,
Sendan boshqa mening buyuk baxtim yoʻq.”
3 Naqadar ulugʻvordir yurtdagi taqvodorlar,
Ulardan men gʻoyat zavq olaman.
4 Soxta xudolarga ergashganlarning kulfati ortadi.
Ularning ichimlik nazri qon ekan,
Men ularning bu nazrlariga qoʻshilmayman,
Soxta xudolarning ismlarini tilga olmayman.
5 Ey Egam! Barqarorligim Sensan,
Muvaffaqiyatim ham Oʻzingdirsan,
Kelajagimni Sen taʼminlaysan.
6 Hosildor yerni meros olgan insonga oʻxshayman.
Axir, Sen meni ajoyib mulkning sohibi qilding!
7 Egamni olqishlayman,
U menga yoʻl koʻrsatadi,
Tunda ham qalbim menga oʻgit beradi.
8 Men doim Egamga koʻz tikaman,
U oʻng tomonimda boʻlgani uchun
Meni hech narsa qoʻzgʻata olmas.
9 Shu bois, ey Egam, yuragim quvonchga toʻla,
Jonim ham quvonadi.
Tanam xavf–xatarsiz yashaydi.
10 Meni oʻliklar diyorida qoldirmaysan,
Taqvodoringni qabrda chiritmaysan.
11 Menga hayot soʻqmogʻini Oʻzing koʻrsatasan,
Huzuringda shodlik meni qamrab oladi,
Menga boqiy huzur–halovatni Sen berasan.
15–САНО
Довуд қўшиғи.
1 Ўзинг сақла мени, эй Худо!
Мен Сенда паноҳ топаман.
2 Эгамга айтдим: “Менинг Раббимсан,
Сендан бошқа менинг буюк бахтим йўқ.”
3 Нақадар улуғвордир юртдаги тақводорлар,
Улардан мен ғоят завқ оламан.
4 Сохта худоларга эргашганларнинг кулфати ортади.
Уларнинг ичимлик назри қон экан,
Мен уларнинг бу назрларига қўшилмайман,
Сохта худоларнинг исмларини тилга олмайман.
5 Эй Эгам! Барқарорлигим Сенсан,
Муваффақиятим ҳам Ўзингдирсан,
Келажагимни Сен таъминлайсан.
6 Ҳосилдор ерни мерос олган инсонга ўхшайман.
Ахир, Сен мени ажойиб мулкнинг соҳиби қилдинг!
7 Эгамни олқишлайман,
У менга йўл кўрсатади,
Тунда ҳам қалбим менга ўгит беради.
8 Мен доим Эгамга кўз тикаман,
У ўнг томонимда бўлгани учун
Мени ҳеч нарса қўзғата олмас.
9 Шу боис, эй Эгам, юрагим қувончга тўла,
Жоним ҳам қувонади.
Танам хавф–хатарсиз яшайди.
10 Мени ўликлар диёрида қолдирмайсан,
Тақводорингни қабрда чиритмайсан.
11 Менга ҳаёт сўқмоғини Ўзинг кўрсатасан,
Ҳузурингда шодлик мени қамраб олади,
Менга боқий ҳузур–ҳаловатни Сен берасан.
