136–SANO
1 Bobildagi daryolar boʻyida oʻtirardik,
Yigʻlab, u yerlarda Quddusni eslardik.
2 Liralarimizni oʻsha yerdagi tollarga osib qoʻygandik.
3 Bizni u yerda asirga olganlar:
“Qoʻshiq aytib beringlar”, derdilar,
Bizga zulm qilganlar koʻngillarini chogʻ qilgani:
“Bizga Quddus qoʻshiqlaridan kuylanglar”, derdilar.
4 Qanday qilib begona yurtda
Biz Egamizga qoʻshiq kuylay olardik?!
5 Ey Quddus, agar seni unutsam,
Oʻng qoʻlim qurib qolsin.
6 Agar men seni eslamasam,
Quddusni eng katta shodligim deb bilmasam,
Tilim tanglayimga yopishib qolsin.
7 Ey Egam, Quddus qulagan kunda
Edomliklar nima qilganini yodda tutgin.
Axir, ular: “Qulating, yiqiting uni!
Poydevorigacha qulatib tashlang!” deb baqirgan.
8 Ey Bobil shahri! Qirgʻinga mahkum boʻlgansan .
Bizga ne qilgan boʻlsang,
Oʻshani boshingga soladiganlar baxtlidir.
9 Sening goʻdaklaringni ushlab, qoyaga urib,
Tilka–pora qiladiganlar baxtlidir.
136–САНО
1 Бобилдаги дарёлар бўйида ўтирардик,
Йиғлаб, у ерларда Қуддусни эслардик.
2 Лираларимизни ўша ердаги толларга осиб қўйгандик.
3 Бизни у ерда асирга олганлар:
“Қўшиқ айтиб беринглар”, дердилар,
Бизга зулм қилганлар кўнгилларини чоғ қилгани:
“Бизга Қуддус қўшиқларидан куйланглар”, дердилар.
4 Қандай қилиб бегона юртда
Биз Эгамизга қўшиқ куйлай олардик?!
5 Эй Қуддус, агар сени унутсам,
Ўнг қўлим қуриб қолсин.
6 Агар мен сени эсламасам,
Қуддусни энг катта шодлигим деб билмасам,
Тилим танглайимга ёпишиб қолсин.
7 Эй Эгам, Қуддус қулаган кунда
Эдомликлар нима қилганини ёдда тутгин.
Ахир, улар: “Қулатинг, йиқитинг уни!
Пойдеворигача қулатиб ташланг!” деб бақирган.
8 Эй Бобил шаҳри! Қирғинга маҳкум бўлгансан .
Бизга не қилган бўлсанг,
Ўшани бошингга соладиганлар бахтлидир.
9 Сенинг гўдакларингни ушлаб, қояга уриб,
Тилка–пора қиладиганлар бахтлидир.
