108–SANO
Ijrochilar rahbariga. Dovud sanosi.
1 Seni olqishlayman, ey Xudo,
Sukut saqlamagin.
2 Fosiq, yolgʻonchilar menga qarshi ogʻiz ochgan,
Yolgʻonchi tillar bilan menga qarshi gapirar.
3 Nafratga toʻla soʻzlarni ustimga yogʻdirarlar,
Sababsiz menga hujum qilarlar.
4 Menga ayb qoʻyarlar doʻstligimga javoban,
Ibodat qilaman hamon.
5 Yaxshilik evaziga menga yomonlik qaytararlar,
Doʻstligim evaziga menga adovat qilarlar.
6 Fosiqni ularga qarshi qoʻy,
Ularning oʻng tomonida ayblovchi tursin.
7 Sinalganda, ular aybdor boʻlsin,
Ularning ibodati gunoh deb hisoblansin.
8 Ularning umri qisqa boʻlsin,
Oʻrnini boshqasi olsin.
9 Yetim boʻlib qolsin bolalari,
Beva boʻlib qolsin xotinlari.
10 Bolalari kulbasidan ayrilib, darbadar boʻlsin,
Non izlab tilanchi boʻlsin.
11 Mol–holini sudxoʻrlar egallasin,
Mehnati samarasini begonalar tortib olsin.
12 Biron kimsa ularga shafqat qilmasin,
Ularning yetim bolalariga hech kim achinmasin.
13 Ularning nasl–nasabi qirilib ketsin,
Bir nasldan soʻng nomlari yoʻq boʻlsin.
14 Ey Egamiz! Otalari aybini esga olgin,
Onalarining gunohini hech qachon unutmagin.
15 Ey Egamiz, ularning gunohidan doim xabardor boʻlgin,
Oʻsha insonlarning xotirasini yer yuzidan oʻchirgin.
16 Axir, ular hech qachon shafqat qilishni oʻylamadi.
Muhtojlarni, umidsizlikka tushganlarni,
Kambagʻallarni taʼqib qildi, oʻldirdi.
17 Ular laʼnatlashni yaxshi koʻrardi,
Endi laʼnatlari oʻzlarining boshiga kelsin.
Duo qilishni yoqtirmasdi,
Endi duo ulardan uzoq boʻlsin .
18 Laʼnatni ular kiyimday kiyardi,
Ularning tanasiga laʼnat suv kabi kirardi,
Suyaklariga moy kabi singardi.
19 Ha, kiyim kiyganday, ular laʼnatga oʻranib olsin,
Laʼnatni har kuni belga taqadigan kamarday qilib olsin.
20 Ey Egam! Menga qarshi yomon gapiruvchilarga,
Meni ayblovchilarga Sendan ana shular mukofot boʻlsin.
21 Sen, ey Egam Rabbiy,
Oʻz noming haqi menga madad ber,
Ezgudir sodiq sevging, meni qutqar.
22 Men bir bechora, yoʻqsilman,
Ichimda yuragim yaralangandir.
23 Oqshomgi soyaday yoʻq boʻlib boryapman,
Chigirtkaday men uloqtirilganman.
24 Roʻza tutganimdan tizzalarimda darmon yoʻq,
Etim suyagimga yopishib qolgan.
25 Dushmanlarim haqoratining nishoniman,
Meni koʻrganlarida masxaralab, boshlarini chayqashar.
26 Ey Egam Xudo, menga madad bergin,
Sodiq sevging haqi meni xalos qilgin.
27 Buni Sening qoʻling qilganini dushmanlarim bilsin,
Ey Egam, menga najot bergan Sen ekaningni ular bilsin.
28 Mayli, ular meni laʼnatlasin,
Sen esa menga baraka berasan.
Ular hujum qilganda, sharmanda boʻlishsin,
Men — quling esa shod–xurram boʻlay.
29 Meni ayblovchilar badnomlikka burkansin,
Chopon kiyganday, sharmandalikka oʻransin.
30 Egamga cheksiz shukronalar aytaman,
Xaloyiq orasida Unga hamdu sano oʻqiyman.
31 Egamiz turar yoʻqsillarning oʻng tomonida,
Ularni oʻlimga mahkum etganlardan qutqarmoq uchun.
108–САНО
Ижрочилар раҳбарига. Довуд саноси.
1 Сени олқишлайман, эй Худо,
Сукут сақламагин.
2 Фосиқ, ёлғончилар менга қарши оғиз очган,
Ёлғончи тиллар билан менга қарши гапирар.
3 Нафратга тўла сўзларни устимга ёғдирарлар,
Сабабсиз менга ҳужум қиларлар.
4 Менга айб қўярлар дўстлигимга жавобан,
Ибодат қиламан ҳамон.
5 Яхшилик эвазига менга ёмонлик қайтарарлар,
Дўстлигим эвазига менга адоват қиларлар.
6 Фосиқни уларга қарши қўй,
Уларнинг ўнг томонида айбловчи турсин.
7 Синалганда, улар айбдор бўлсин,
Уларнинг ибодати гуноҳ деб ҳисоблансин.
8 Уларнинг умри қисқа бўлсин,
Ўрнини бошқаси олсин.
9 Етим бўлиб қолсин болалари,
Бева бўлиб қолсин хотинлари.
10 Болалари кулбасидан айрилиб, дарбадар бўлсин,
Нон излаб тиланчи бўлсин.
11 Мол–ҳолини судхўрлар эгалласин,
Меҳнати самарасини бегоналар тортиб олсин.
12 Бирон кимса уларга шафқат қилмасин,
Уларнинг етим болаларига ҳеч ким ачинмасин.
13 Уларнинг насл–насаби қирилиб кетсин,
Бир наслдан сўнг номлари йўқ бўлсин.
14 Эй Эгамиз! Оталари айбини эсга олгин,
Оналарининг гуноҳини ҳеч қачон унутмагин.
15 Эй Эгамиз, уларнинг гуноҳидан доим хабардор бўлгин,
Ўша инсонларнинг хотирасини ер юзидан ўчиргин.
16 Ахир, улар ҳеч қачон шафқат қилишни ўйламади.
Муҳтожларни, умидсизликка тушганларни,
Камбағалларни таъқиб қилди, ўлдирди.
17 Улар лаънатлашни яхши кўрарди,
Энди лаънатлари ўзларининг бошига келсин.
Дуо қилишни ёқтирмасди,
Энди дуо улардан узоқ бўлсин .
18 Лаънатни улар кийимдай киярди,
Уларнинг танасига лаънат сув каби кирарди,
Суякларига мой каби сингарди.
19 Ҳа, кийим кийгандай, улар лаънатга ўраниб олсин,
Лаънатни ҳар куни белга тақадиган камардай қилиб олсин.
20 Эй Эгам! Менга қарши ёмон гапирувчиларга,
Мени айбловчиларга Сендан ана шулар мукофот бўлсин.
21 Сен, эй Эгам Раббий,
Ўз номинг ҳақи менга мадад бер,
Эзгудир содиқ севгинг, мени қутқар.
22 Мен бир бечора, йўқсилман,
Ичимда юрагим яралангандир.
23 Оқшомги соядай йўқ бўлиб боряпман,
Чигирткадай мен улоқтирилганман.
24 Рўза тутганимдан тиззаларимда дармон йўқ,
Этим суягимга ёпишиб қолган.
25 Душманларим ҳақоратининг нишониман,
Мени кўрганларида масхаралаб, бошларини чайқашар.
26 Эй Эгам Худо, менга мадад бергин,
Содиқ севгинг ҳақи мени халос қилгин.
27 Буни Сенинг қўлинг қилганини душманларим билсин,
Эй Эгам, менга нажот берган Сен эканингни улар билсин.
28 Майли, улар мени лаънатласин,
Сен эса менга барака берасан.
Улар ҳужум қилганда, шарманда бўлишсин,
Мен — қулинг эса шод–хуррам бўлай.
29 Мени айбловчилар бадномликка буркансин,
Чопон кийгандай, шармандаликка ўрансин.
30 Эгамга чексиз шукроналар айтаман,
Халойиқ орасида Унга ҳамду сано ўқийман.
31 Эгамиз турар йўқсилларнинг ўнг томонида,
Уларни ўлимга маҳкум этганлардан қутқармоқ учун.
