6–BOB
Kafillik va turli illatlarga qarshi ogohlantirish
1 Oʻgʻlim , oʻzgaga kafillik qilib,
begona bilan ahdlashgan boʻlsang ,
2 oʻz tilingdan ilinib,
soʻzlaring tuzoqqa yetaklagan boʻlsa,
3 oʻgʻlim, oʻzganing qoʻliga tushib qolibsan,
oʻzingni qutqar, bor, tiz choʻkib yolvor.
4 Oʻzingga uyqu berma,
bir soniya ham dam olma.
5 Ovchidan qochgan ohu kabi,
bedanavoz qoʻlidan qochgan bedanaday oʻzingni qutqar.
6 Ey tanbal, chumolilarga bir qara,
ularning xatti–harakatlarini koʻrib dono boʻl.
7 Ularning na rahbari,
na nazoratchisi, na hukmdori bor.
8 Lekin ular yozda oziq toʻplashadi,
oʻrim paytida don–dun yigʻishadi.
9 Sen–chi, tanbal, qachongacha uxlaysan?!
Qachon oʻrningdan turasan?
10 “Bir oz uxlay, bir mizgʻib olay,
yonboshlab birpas dam olay”, deysan.
11 Shuning uchun qashshoqlik yoʻltoʻsarday,
muhtojlik qaroqchiday ustingga keladi.
12 Ayyor va nopoklar yaramas soʻzlarni gapirib yuradilar.
13 Koʻz qisadilar,
oyoq–qoʻllari bilan imo–ishora qiladilar.
14 Yuraklarida doim yovuz niyat qilib,
odamlar orasida janjal chiqaradilar.
15 Shuning uchun toʻsatdan ofatga uchraydilar,
shifo topmay toʻsatdan halok boʻladilar.
16 Olti narsadan Egamiz nafratlanadi,
yetti narsadan U jirkanadi. Bular:
17 manmanlik nigohi, yolgʻonchi til,
begunoh qonni toʻkadigan qoʻllar,
18 yomon niyatli yurak,
yovuzlikka yuguradigan oyoqlar,
19 yolgʻon gapiradigan soxta guvoh,
aka–ukalar orasiga nifoq soluvchilardir.
Zinoga qarshi ogohlantirish
20 Oʻgʻlim, otang nasihatlariga quloq sol,
onang oʻgitlarini rad etma,
21 ularni doim yuragingda saqla,
boʻyningga taqib ol.
22 Yurganingda ular senga yoʻl koʻrsatadi,
uxlaganingda qoʻriqlaydi,
uygʻoqligingda senga gapiradi.
23 Chunki amrlar — chiroq,
tanbeh — hayot yoʻli,
pand–nasihatlar nurdir.
24 Ular seni boshqalarning xotinidan,
zinokor ayolning shirin soʻzidan saqlaydi.
25 Yuragingda uning goʻzalligini orzu qilmagin,
koʻzlariga mahliyo boʻlma.
26 Fohishaga bittagina non haqi yetarli,
ammo oʻzganing xotini bilan qilingan zino
butun hayotingni barbod qiladi.
27 Qoʻyinga choʻgʻ solganda kiyimni kuydirmay boʻladimi?!
28 Choʻgʻ ustida yurganda oyoqni kuydirmay boʻladimi?!
29 Oʻzganing xotini oldiga kirganning ahvoli ham shunday,
begona ayolga tekkan jazosiz qolmaydi.
30 Qorni ochligidan oʻzini toʻydirish uchun oʻgʻrilik qilsa,
odamlar undan nafratlanmaydi.
31 Lekin qoʻlga tushib qolganda oʻgʻirlangan molining haqini
yetti barobar qilib qaytarishi kerak.
32 Zino qilgan aqlsizdir,
oʻzini oʻzi nobud qiladi.
33 U koʻp kaltak yeb sharmanda boʻladi,
bir umrga badnom boʻladi.
34 Chunki rashk erni gʻazablantiradi,
er qasos olganda shafqat qilmaydi.
35 Har qanday hadyani rad etadi,
qancha pora bersang olmaydi.
6–БОБ
Кафиллик ва турли иллатларга қарши огоҳлантириш
1 Ўғлим , ўзгага кафиллик қилиб,
бегона билан аҳдлашган бўлсанг ,
2 ўз тилингдан илиниб,
сўзларинг тузоққа етаклаган бўлса,
3 ўғлим, ўзганинг қўлига тушиб қолибсан,
ўзингни қутқар, бор, тиз чўкиб ёлвор.
4 Ўзингга уйқу берма,
бир сония ҳам дам олма.
5 Овчидан қочган оҳу каби,
беданавоз қўлидан қочган беданадай ўзингни қутқар.
6 Эй танбал, чумолиларга бир қара,
уларнинг хатти–ҳаракатларини кўриб доно бўл.
7 Уларнинг на раҳбари,
на назоратчиси, на ҳукмдори бор.
8 Лекин улар ёзда озиқ тўплашади,
ўрим пайтида дон–дун йиғишади.
9 Сен–чи, танбал, қачонгача ухлайсан?!
Қачон ўрнингдан турасан?
10 “Бир оз ухлай, бир мизғиб олай,
ёнбошлаб бирпас дам олай”, дейсан.
11 Шунинг учун қашшоқлик йўлтўсардай,
муҳтожлик қароқчидай устингга келади.
12 Айёр ва нопоклар ярамас сўзларни гапириб юрадилар.
13 Кўз қисадилар,
оёқ–қўллари билан имо–ишора қиладилар.
14 Юракларида доим ёвуз ният қилиб,
одамлар орасида жанжал чиқарадилар.
15 Шунинг учун тўсатдан офатга учрайдилар,
шифо топмай тўсатдан ҳалок бўладилар.
16 Олти нарсадан Эгамиз нафратланади,
етти нарсадан У жирканади. Булар:
17 манманлик нигоҳи, ёлғончи тил,
бегуноҳ қонни тўкадиган қўллар,
18 ёмон ниятли юрак,
ёвузликка югурадиган оёқлар,
19 ёлғон гапирадиган сохта гувоҳ,
ака–укалар орасига нифоқ солувчилардир.
Зинога қарши огоҳлантириш
20 Ўғлим, отанг насиҳатларига қулоқ сол,
онанг ўгитларини рад этма,
21 уларни доим юрагингда сақла,
бўйнингга тақиб ол.
22 Юрганингда улар сенга йўл кўрсатади,
ухлаганингда қўриқлайди,
уйғоқлигингда сенга гапиради.
23 Чунки амрлар — чироқ,
танбеҳ — ҳаёт йўли,
панд–насиҳатлар нурдир.
24 Улар сени бошқаларнинг хотинидан,
зинокор аёлнинг ширин сўзидан сақлайди.
25 Юрагингда унинг гўзаллигини орзу қилмагин,
кўзларига маҳлиё бўлма.
26 Фоҳишага биттагина нон ҳақи етарли,
аммо ўзганинг хотини билан қилинган зино
бутун ҳаётингни барбод қилади.
27 Қўйинга чўғ солганда кийимни куйдирмай бўладими?!
28 Чўғ устида юрганда оёқни куйдирмай бўладими?!
29 Ўзганинг хотини олдига кирганнинг аҳволи ҳам шундай,
бегона аёлга теккан жазосиз қолмайди.
30 Қорни очлигидан ўзини тўйдириш учун ўғрилик қилса,
одамлар ундан нафратланмайди.
31 Лекин қўлга тушиб қолганда ўғирланган молининг ҳақини
етти баробар қилиб қайтариши керак.
32 Зино қилган ақлсиздир,
ўзини ўзи нобуд қилади.
33 У кўп калтак еб шарманда бўлади,
бир умрга бадном бўлади.
34 Чунки рашк эрни ғазаблантиради,
эр қасос олганда шафқат қилмайди.
35 Ҳар қандай ҳадяни рад этади,
қанча пора берсанг олмайди.
