2–BOB
Donolik Egamizdandir
1 Oʻgʻlim , nasihatlarimni qabul qilib,
amrlarimni yuragingda saqlasang,
2 donolikka quloq solib,
qalbingni fahm–idrokka ochsang,
3 farosatga tashna,
idrokka chanqoq boʻlsang,
4 uni kumush izlaganday izlasang,
yashirin xazina qidirganday qidirsang,
5 Egamizdan qoʻrqish nimaligini tushunasan,
Xudo kimligini bilasan.
6 Chunki donolikni Egamiz beradi,
bilim va idrok Uning ogʻzidan chiqadi.
7 Egamiz toʻgʻri odamni eson–omon saqlaydi,
toʻgʻri yuradiganga Oʻzi qalqon boʻladi.
8 Adolatli insonni himoya qiladi,
Unga sodiq boʻlganning yoʻlini qoʻriqlaydi.
9 Shunda sen toʻgʻrilik, adolat, odillik,
yaʼni toʻgʻri yoʻl nima ekanligini tushunasan.
10 Chunki yuragingga donolik kiradi,
ruhing esa bilimdan zavqlanadi.
11 Fahm–farosat seni himoya qiladi,
aql–idrok seni qoʻriqlaydi.
12 Yomon yoʻldan,
yovuz gapiradiganlardan asraydi.
13 Ular toʻgʻri yoʻlni tashlab,
qorongʻilikda yuradi.
14 Yomon ishlardan xursand boʻladi,
yovuzlikdan quvonadi.
15 Ular yoʻldan adashgan,
soʻqmoqlari ham egridir.
16 Donolik seni zinokordan,
tilyogʻlama buzuq ayoldan saqlasin.
17 Buzuq ayol yoshligidagi umr yoʻldoshini tashlab,
Xudo oldida bergan ahdini buzgan.
18 Uning uyi oʻlimga ,
yoʻllari oʻliklarning oldiga olib boradi.
19 Uning oldiga borgan odam qaytib kelmaydi,
hayot soʻqmoqlariga qaytib qadam bosmaydi.
20 Shuning uchun yaxshi odamlarning yoʻlidan yurgin,
solihlarning yoʻlidan chiqmagin.
21 Chunki toʻgʻri odam oʻsha yerda yashaydi,
pok odam u yerda qoladi.
22 Fosiq esa yer yuzidan qirib tashlanadi,
vafosiz yoʻq qilinadi.
2–БОБ
Донолик Эгамиздандир
1 Ўғлим , насиҳатларимни қабул қилиб,
амрларимни юрагингда сақласанг,
2 доноликка қулоқ солиб,
қалбингни фаҳм–идрокка очсанг,
3 фаросатга ташна,
идрокка чанқоқ бўлсанг,
4 уни кумуш излагандай изласанг,
яширин хазина қидиргандай қидирсанг,
5 Эгамиздан қўрқиш нималигини тушунасан,
Худо кимлигини биласан.
6 Чунки доноликни Эгамиз беради,
билим ва идрок Унинг оғзидан чиқади.
7 Эгамиз тўғри одамни эсон–омон сақлайди,
тўғри юрадиганга Ўзи қалқон бўлади.
8 Адолатли инсонни ҳимоя қилади,
Унга содиқ бўлганнинг йўлини қўриқлайди.
9 Шунда сен тўғрилик, адолат, одиллик,
яъни тўғри йўл нима эканлигини тушунасан.
10 Чунки юрагингга донолик киради,
руҳинг эса билимдан завқланади.
11 Фаҳм–фаросат сени ҳимоя қилади,
ақл–идрок сени қўриқлайди.
12 Ёмон йўлдан,
ёвуз гапирадиганлардан асрайди.
13 Улар тўғри йўлни ташлаб,
қоронғиликда юради.
14 Ёмон ишлардан хурсанд бўлади,
ёвузликдан қувонади.
15 Улар йўлдан адашган,
сўқмоқлари ҳам эгридир.
16 Донолик сени зинокордан,
тилёғлама бузуқ аёлдан сақласин.
17 Бузуқ аёл ёшлигидаги умр йўлдошини ташлаб,
Худо олдида берган аҳдини бузган.
18 Унинг уйи ўлимга ,
йўллари ўликларнинг олдига олиб боради.
19 Унинг олдига борган одам қайтиб келмайди,
ҳаёт сўқмоқларига қайтиб қадам босмайди.
20 Шунинг учун яхши одамларнинг йўлидан юргин,
солиҳларнинг йўлидан чиқмагин.
21 Чунки тўғри одам ўша ерда яшайди,
пок одам у ерда қолади.
22 Фосиқ эса ер юзидан қириб ташланади,
вафосиз йўқ қилинади.
