13–BOB
1 Aqlli farzand otasining nasihatlarini qabul qiladi,
mazax qiluvchi esa tanbehga quloq solmaydi.
2 Yaxshi odam soʻzlari bilan yaxshilikka erishadi,
xoin esa zoʻravonlikka.
3 Tilini tiygan jonini asraydi,
tiliga erk bergan esa halokatga uchraydi.
4 Dangasaning koʻngli xohlaydi–yu,
ammo hech narsaga erisha olmaydi,
tirishqoq esa orzusiga yetishadi.
5 Solih yolgʻondan nafratlanadi,
fosiq esa uyatli va sharmandali ishlar qiladi.
6 Solihlik toʻgʻri yuradiganni himoya qiladi,
fosiqlik esa gunohkorni halok qiladi.
7 Shunday odam bor, hech narsasi yoʻgʻ–u, oʻzini boy koʻrsatadi.
Yana shunday odam bor, boyligi koʻp–u, oʻzini qashshoq koʻrsatadi.
8 Jonning haqi — uning boyligi,
kambagʻal esa doʻq–poʻpisadan qoʻrqmaydi.
9 Solihlarning chirogʻi doim charogʻon,
fosiqniki esa oʻchib qoladi.
10 Magʻrurlikdan faqat urush chiqadi,
nasihatga quloq solgan odamda esa donolik bor.
11 Hiyla bilan topilgan davlat yoʻqoladi,
mehnat bilan topilgani esa koʻpayadi.
12 Roʻyobga chiqmagan umid yurakni ezadi,
ushalgan orzu esa hayot daraxti kabidir.
13 Pand–nasihatlardan nafratlangan
oʻziga halokat keltiradi,
amrga quloq solgan esa taqdirlanadi.
14 Dononing taʼlimoti hayot manbaidir,
u odamni oʻlim tuzogʻidan asraydi.
15 Idrokli inson marhamatga erishadi,
xoinning yoʻli esa mashaqqatlidir .
16 Zukko odam aql bilan ish qiladi,
aqlsiz esa ahmoqligini koʻrsatadi.
17 Yomon xabarchi kulfat olib keladi,
sodiq xabarchi esa yurakka shifo keltiradi.
18 Nasihatga quloq solmaganlarga qashshoqlik va uyat keladi,
tanbehga quloq solganlar esa hurmat va izzat topadi.
19 Amalga oshgan tilak jonga rohat beradi,
nodon odam yomonlikdan ayrilishni rad etadi.
20 Donoga hamroh boʻlgan dono boʻladi,
ahmoqqa yoʻldosh boʻlgan esa halok boʻladi.
21 Baxtsizlik gunohkorning ketidan quvib yuradi,
solihning mukofoti esa baxt–saodatdir.
22 Yaxshi odam bolalarining bolalariga ham meros qoldiradi,
fosiqning boyligi esa solihga nasib etadi.
23 Kambagʻalning dalasida gʻalla moʻl,
lekin adolatsizlik tufayli vayron boʻladi.
24 Kaltakni oʻgʻlidan ayagan odam uni yomon koʻradi,
oʻgʻlini sevgan esa yoshlikdan tartib–intizomga oʻrgatadi.
25 Solih qorni toʻyib ovqat yeydi,
fosiq esa och qoladi.
13–БОБ
1 Ақлли фарзанд отасининг насиҳатларини қабул қилади,
мазах қилувчи эса танбеҳга қулоқ солмайди.
2 Яхши одам сўзлари билан яхшиликка эришади,
хоин эса зўравонликка.
3 Тилини тийган жонини асрайди,
тилига эрк берган эса ҳалокатга учрайди.
4 Дангасанинг кўнгли хоҳлайди–ю,
аммо ҳеч нарсага эриша олмайди,
тиришқоқ эса орзусига етишади.
5 Солиҳ ёлғондан нафратланади,
фосиқ эса уятли ва шармандали ишлар қилади.
6 Солиҳлик тўғри юрадиганни ҳимоя қилади,
фосиқлик эса гуноҳкорни ҳалок қилади.
7 Шундай одам бор, ҳеч нарсаси йўғ–у, ўзини бой кўрсатади.
Яна шундай одам бор, бойлиги кўп–у, ўзини қашшоқ кўрсатади.
8 Жоннинг ҳақи — унинг бойлиги,
камбағал эса дўқ–пўписадан қўрқмайди.
9 Солиҳларнинг чироғи доим чароғон,
фосиқники эса ўчиб қолади.
10 Мағрурликдан фақат уруш чиқади,
насиҳатга қулоқ солган одамда эса донолик бор.
11 Ҳийла билан топилган давлат йўқолади,
меҳнат билан топилгани эса кўпаяди.
12 Рўёбга чиқмаган умид юракни эзади,
ушалган орзу эса ҳаёт дарахти кабидир.
13 Панд–насиҳатлардан нафратланган
ўзига ҳалокат келтиради,
амрга қулоқ солган эса тақдирланади.
14 Дононинг таълимоти ҳаёт манбаидир,
у одамни ўлим тузоғидан асрайди.
15 Идрокли инсон марҳаматга эришади,
хоиннинг йўли эса машаққатлидир .
16 Зукко одам ақл билан иш қилади,
ақлсиз эса аҳмоқлигини кўрсатади.
17 Ёмон хабарчи кулфат олиб келади,
содиқ хабарчи эса юракка шифо келтиради.
18 Насиҳатга қулоқ солмаганларга қашшоқлик ва уят келади,
танбеҳга қулоқ солганлар эса ҳурмат ва иззат топади.
19 Амалга ошган тилак жонга роҳат беради,
нодон одам ёмонликдан айрилишни рад этади.
20 Донога ҳамроҳ бўлган доно бўлади,
аҳмоққа йўлдош бўлган эса ҳалок бўлади.
21 Бахтсизлик гуноҳкорнинг кетидан қувиб юради,
солиҳнинг мукофоти эса бахт–саодатдир.
22 Яхши одам болаларининг болаларига ҳам мерос қолдиради,
фосиқнинг бойлиги эса солиҳга насиб этади.
23 Камбағалнинг даласида ғалла мўл,
лекин адолатсизлик туфайли вайрон бўлади.
24 Калтакни ўғлидан аяган одам уни ёмон кўради,
ўғлини севган эса ёшликдан тартиб–интизомга ўргатади.
25 Солиҳ қорни тўйиб овқат ейди,
фосиқ эса оч қолади.
