4–BOB
Turli pand–nasihatlar
1 Shunday qilib, sevimli birodarlarim, sizlarga aytganlarim boʻyicha, Rabbimiz Iso bilan boʻlgan munosabatingizda mahkam turinglar. Azizlarim, men sizlarni juda sogʻindim. Sizlar mening quvonchimsiz, faxrimsiz!
2 Evodiya va Sintixa, sizlardan iltimos qilaman, Rabbimiz haqi yakdil boʻlinglar. 3 Ey vafodor hamkorim, sendan ham oʻtinaman, bu ayollarga yordam ber, chunki ular men bilan birga, Kliment hamda ismlari hayot kitobida yozilgan boshqa hamkorlarim qatori Xushxabarni targʻib etishda ter toʻkdilar.
4 Har doim Rabbimiz Iso tufayli shodlaning! Yana bir bor aytaman, shodlaning! 5 Hammaga nisbatan muloyim boʻling. Rabbimiz yaqinda keladi . 6 Hech narsadan tashvish qilmanglar. Aksincha, har qanday sharoitda ibodat va iltijoda boʻlib, har bir muhtojligingizni Xudoning oldida minnatdorchilik bilan izhor qilinglar. 7 Shunda Xudo beradigan, inson xayoliga sigʻmaydigan tinchlik Iso Masih orqali sizlarning yuraklaringizni va oʻy–xayollaringizni qoʻriqlaydi.
8 Endi esa, ey birodarlarim, fikr–zikringiz haqiqiy, sharafli, toʻgʻri, pok, yoqimli, tahsinga sazovor narsalarda boʻlsin. Ha, olqishga loyiq, aʼlo narsalar haqida fikr yuritinglar. 9 Taʼlimotimni qabul qildingiz. Endi mendan oʻrganganlaringizning, koʻrgan–eshitganlaringizning hammasini bajaringlar. Shunda tinchlik beradigan Xudo sizlar bilan birga boʻladi.
Pavlusning minnatdorchiligi
10 Sizlar men uchun yana gʻamxoʻrlik qilayotganingizdan juda xursand boʻlib, Rabbimiz Isoga shukur qilyapman. Albatta, sizlar oldin ham men uchun gʻamxoʻrlik qilardingiz, lekin buni koʻrsatishga imkoniyatingiz boʻlmagan edi. 11 Bularni muhtojlikdan aytayotganim yoʻq, chunki men har qanday sharoitda boriga qanoat qilishga oʻrganganman. 12 Har qanday sharoitda va har yerda ham toʻq boʻlish, ham och qolish, moʻl–koʻlchiligu muhtojlikda yashash sirlarini oʻrganganman. Men tanqislikda ham, moʻl–koʻlchilikda ham qanday hayot kechirishni bilaman. 13 Menga kuch–quvvat beradigan Iso Masihning madadi bilan har narsani qila olaman. 14 Nima boʻlishidan qatʼi nazar, sizlar qiyinchiliklarimga sherik boʻlib yaxshi qildingizlar.
15 Axir, siz, Filippiliklar, oʻzlaringiz bilasizlar–ku, men sizlarga Xushxabarni aytgan paytimdan boshlab, Makedoniyadan ketganimdan keyin ham faqat sizlar menga moddiy jihatdan yordam berardingiz. Sizlardan boshqa hech bir jamoat bunday qilmadi. 16 Hatto Salonikada boʻlganimda ham sizlar bir–ikki marta menga yordam berib, ehtiyojimni qondirdingiz. 17 Men sizlardan biror narsa undirib olish niyatida gapirayotganim yoʻq. Aksincha, sizlarning foydangiz koʻpayishini koʻzlayapman. 18 Hozir menda kerakli hamma narsa bor, hatto ortigʻi bilan bor. Epafroditusdan berib yuborgan hadyalaringizni oldim. Endi hech bir muhtojligim qolmadi. Bu hadyalaringiz xushboʻy nazrday, Xudoga maʼqul boʻladigan yoqimli qurbonlik kabidir. 19 Xudoyim Oʻzining ajoyib boyligi bilan Iso Masih orqali sizlarning har bir ehtiyojingizni qondiradi. 20 Otamiz Xudoga abadulabad shon–sharaflar boʻlsin! Omin.
Soʻnggi salomlar
21 Iso Masihga tegishli boʻlganlarning hammasiga salom aytib qoʻying. Yonimdagi birodarlar ham sizlarga salom aytyapti. 22 Xudoning azizlari boʻlganlarning hammasi, ayniqsa Qaysar xizmatida boʻlganlar , sizlarga salom yoʻllayaptilar.
23 Rabbimiz Iso Masihning inoyati sizlarga yor boʻlsin!
4–БОБ
Турли панд–насиҳатлар
1 Шундай қилиб, севимли биродарларим, сизларга айтганларим бўйича, Раббимиз Исо билан бўлган муносабатингизда маҳкам туринглар. Азизларим, мен сизларни жуда соғиндим. Сизлар менинг қувончимсиз, фахримсиз!
2 Эводия ва Синтиха, сизлардан илтимос қиламан, Раббимиз ҳақи якдил бўлинглар. 3 Эй вафодор ҳамкорим, сендан ҳам ўтинаман, бу аёлларга ёрдам бер, чунки улар мен билан бирга, Климент ҳамда исмлари ҳаёт китобида ёзилган бошқа ҳамкорларим қатори Хушхабарни тарғиб этишда тер тўкдилар.
4 Ҳар доим Раббимиз Исо туфайли шодланинг! Яна бир бор айтаман, шодланинг! 5 Ҳаммага нисбатан мулойим бўлинг. Раббимиз яқинда келади . 6 Ҳеч нарсадан ташвиш қилманглар. Аксинча, ҳар қандай шароитда ибодат ва илтижода бўлиб, ҳар бир муҳтожлигингизни Худонинг олдида миннатдорчилик билан изҳор қилинглар. 7 Шунда Худо берадиган, инсон хаёлига сиғмайдиган тинчлик Исо Масиҳ орқали сизларнинг юракларингизни ва ўй–хаёлларингизни қўриқлайди.
8 Энди эса, эй биродарларим, фикр–зикрингиз ҳақиқий, шарафли, тўғри, пок, ёқимли, таҳсинга сазовор нарсаларда бўлсин. Ҳа, олқишга лойиқ, аъло нарсалар ҳақида фикр юритинглар. 9 Таълимотимни қабул қилдингиз. Энди мендан ўрганганларингизнинг, кўрган–эшитганларингизнинг ҳаммасини бажаринглар. Шунда тинчлик берадиган Худо сизлар билан бирга бўлади.
Павлуснинг миннатдорчилиги
10 Сизлар мен учун яна ғамхўрлик қилаётганингиздан жуда хурсанд бўлиб, Раббимиз Исога шукур қиляпман. Албатта, сизлар олдин ҳам мен учун ғамхўрлик қилардингиз, лекин буни кўрсатишга имкониятингиз бўлмаган эди. 11 Буларни муҳтожликдан айтаётганим йўқ, чунки мен ҳар қандай шароитда борига қаноат қилишга ўрганганман. 12 Ҳар қандай шароитда ва ҳар ерда ҳам тўқ бўлиш, ҳам оч қолиш, мўл–кўлчилигу муҳтожликда яшаш сирларини ўрганганман. Мен танқисликда ҳам, мўл–кўлчиликда ҳам қандай ҳаёт кечиришни биламан. 13 Менга куч–қувват берадиган Исо Масиҳнинг мадади билан ҳар нарсани қила оламан. 14 Нима бўлишидан қатъи назар, сизлар қийинчиликларимга шерик бўлиб яхши қилдингизлар.
15 Ахир, сиз, Филиппиликлар, ўзларингиз биласизлар–ку, мен сизларга Хушхабарни айтган пайтимдан бошлаб, Македониядан кетганимдан кейин ҳам фақат сизлар менга моддий жиҳатдан ёрдам берардингиз. Сизлардан бошқа ҳеч бир жамоат бундай қилмади. 16 Ҳатто Салоникада бўлганимда ҳам сизлар бир–икки марта менга ёрдам бериб, эҳтиёжимни қондирдингиз. 17 Мен сизлардан бирор нарса ундириб олиш ниятида гапираётганим йўқ. Аксинча, сизларнинг фойдангиз кўпайишини кўзлаяпман. 18 Ҳозир менда керакли ҳамма нарса бор, ҳатто ортиғи билан бор. Эпафродитусдан бериб юборган ҳадяларингизни олдим. Энди ҳеч бир муҳтожлигим қолмади. Бу ҳадяларингиз хушбўй назрдай, Худога маъқул бўладиган ёқимли қурбонлик кабидир. 19 Худойим Ўзининг ажойиб бойлиги билан Исо Масиҳ орқали сизларнинг ҳар бир эҳтиёжингизни қондиради. 20 Отамиз Худога абадулабад шон–шарафлар бўлсин! Омин.
Сўнгги саломлар
21 Исо Масиҳга тегишли бўлганларнинг ҳаммасига салом айтиб қўйинг. Ёнимдаги биродарлар ҳам сизларга салом айтяпти. 22 Худонинг азизлари бўлганларнинг ҳаммаси, айниқса Қайсар хизматида бўлганлар , сизларга салом йўллаяптилар.
23 Раббимиз Исо Масиҳнинг инояти сизларга ёр бўлсин!
