35–BOB
Levilarga berilgan shaharlar
1 Moʻab tekisligida, Yerixo shahrining roʻparasidagi Iordan daryosi boʻyida Egamiz Musoga dedi: 2 “Isroil xalqiga buyur, ular mulk qilib oladigan yeridan levilarga yashash uchun shaharlar berishsin. Shuningdek, shaharlarning atrofidagi yaylovlarni ham berishsin. 3 Shaharlar levilarga vatan boʻladi, yaylovlar esa mol–holi uchun yaraydi. 4 Levilarga beriladigan yaylovlar shahar devoridan 1000 tirsak masofada boʻlgan tevarakdagi hamma yaylovlarni oʻz ichiga olsin. 5 Shahar tashqarisidan sharq, janub, gʻarb, shimol tomonga 2000 tirsakdan oʻlchanglar, shahar oʻrtada boʻlsin. Shahar atrofi esa levilarning yaylovlari boʻladi.
6 Sizlar levilarga beradigan shaharlaringizning oltitasi panoh shaharlar boʻlsin. Birortangiz bexosdan odam oʻldirib qoʻysangiz, oʻsha shaharlarning biriga qochib borishingiz mumkin. Bu oltita shahardan tashqari, levilarga yana qirq ikkita shahar beringlar. 7 Hammasi boʻlib levilarga qirq sakkizta shahar va ular atrofidagi yaylovlar berilsin.
8 Isroil xalqi mulkidan har bir qabila olgan ulushining hajmiga koʻra, levilarga shaharlar ajratib beringlar. Kattaroq ulush olgan qabila koʻproq, kichikroq ulush olgan qabila esa kamroq shahar bersin.”
Panoh shaharlar
9-10 Isroil xalqiga quyidagi amr va qonunlarni yetkaz, deb Musoga Egamiz shunday amr berdi: “Sizlar Iordan daryosining narigi tomoniga oʻtib, Kanʼon yurtiga kirganlaringizdan keyin, 11 oʻzlaringiz uchun panoh shaharlarni tanlanglar. Birortasi bexosdan odam oʻldirib qoʻysa, oʻsha shaharlarning biriga qochib bora oladigan boʻlsin. 12 Qotil jamoa oldida hukm qilinishdan oldin oʻldirilib qoʻyilmasligi uchun bu shaharlar qotilga qasoskordan panoh boʻladi.
13 Oltita panoh shahringiz boʻlsin. 14 Uchta shaharni Iordan daryosining sharq tomonidan, qolgan uchtasini Kanʼon yurtidan tanlanglar. 15 Ana shu oltita shahar sizlar uchun ham, orangizda vaqtincha yoki doimiy ravishda istiqomat qilayotgan musofirlar uchun ham panoh boʻladi. Birortasini bexosdan oʻldirib qoʻygan odam oʻsha yoqqa qochib borsin.
16 Agar birorta odam boshqasini temir asbob bilan urib oʻldirib qoʻysa, urgan odam qotil hisoblanadi va oʻsha odamning jazosi oʻlimdir. 17 Odamni tosh bilan urib oʻldirgan kishi ham qotildir. Qotilning jazosi oʻlimdir. 18 Odamni yogʻoch qurol bilan urib oʻldirgan kishi ham qotildir. Qotilning jazosi oʻlimdir. 19 Marhumning xunini oladigan odam qotilni oʻldirsin. Qotilni uchratib qolganda uning jonini olsin. 20 Shuningdek, agar birortasi boshqasini yomon koʻrgani uchun itarib yoki qasddan unga biror narsani otib oʻldirib qoʻysa, 21 yoxud adovatdan unga musht tushirib oʻldirsa, urgan odamning jazosi oʻlimdir. U qotildir. Marhumning xunini oladigan odam qotilni uchratganda oʻldirsin.
22 Bordi–yu, biri boshqasini bexosdan, xusumat qilmay, turtib yuborsa yoki qasd qilmay biror narsa otsa 23-24 yo koʻrmay turib ustiga tosh tushirib yuborsa va oʻsha odam oʻlsa, jamoa qasoskor bilan odam oʻldirgan kishining orasidagi mojaroni hal qilsin. Chunki odam oʻldirganning va marhumning orasida hech qanday adovat boʻlmagan edi. 25 Jamoa qotilni qasoskorning qoʻlidan xalos qilib, uni qaytarib panoh shaharga joʻnatsin. Moy surtib tanlangan oliy ruhoniy vafot etguncha, qotil oʻsha yerda qolsin.
26 Lekin qotil panoh shahar chegarasidan chiqsa 27 va qasoskor uni panoh shahardan tashqarida tutib olib oʻldirsa, qasoskor qotillikda ayblanmaydi. 28 Chunki oliy ruhoniy vafot etguncha, qotil panoh shaharda qolishi lozim edi. Oliy ruhoniyning vafotidan soʻnggina u oʻz uyiga qaytib borishi mumkin edi. 29 Mana shular sizlar uchun avlodlaringiz osha, qayerda yashasangiz ham, qonun boʻlib qolsin.
30 Odam oʻldirgan kishi faqat guvohlarning koʻrsatmalari asosidagina qotillikda ayblanib, oʻlim jazosiga tortilsin. Bitta odamning guvohligi asosida hech kim oʻldirilmasin.
31 Oʻlimga hukm qilingan qotilning joni evaziga pul olmanglar. Qotilni albatta oʻldiringlar.
32 Panoh shaharga qochib ketgan odamdan ham pul olmanglar, u oliy ruhoniyning vafotidan oldin oʻz yeriga qaytib kelib yashashi uchun yoʻl qoʻymanglar. 33 Oʻzingiz yashab yurgan yerni bulgʻamanglar. Yer toʻkilgan qon tufayli bulgʻanadi. Qotillik tufayli bulgʻangan yerni faqat qotilning qoni bilan tozalab boʻladi. 34 Oʻzlaringiz yashaydigan va Men istiqomat qiladigan yerni bulgʻamanglar, zotan, Men, Egangiz, Isroil xalqi orasida istiqomat qilaman.”
35–БОБ
Левиларга берилган шаҳарлар
1 Мўаб текислигида, Ерихо шаҳрининг рўпарасидаги Иордан дарёси бўйида Эгамиз Мусога деди: 2 “Исроил халқига буюр, улар мулк қилиб оладиган еридан левиларга яшаш учун шаҳарлар беришсин. Шунингдек, шаҳарларнинг атрофидаги яйловларни ҳам беришсин. 3 Шаҳарлар левиларга ватан бўлади, яйловлар эса мол–ҳоли учун ярайди. 4 Левиларга бериладиган яйловлар шаҳар деворидан 1000 тирсак масофада бўлган теваракдаги ҳамма яйловларни ўз ичига олсин. 5 Шаҳар ташқарисидан шарқ, жануб, ғарб, шимол томонга 2000 тирсакдан ўлчанглар, шаҳар ўртада бўлсин. Шаҳар атрофи эса левиларнинг яйловлари бўлади.
6 Сизлар левиларга берадиган шаҳарларингизнинг олтитаси паноҳ шаҳарлар бўлсин. Бирортангиз бехосдан одам ўлдириб қўйсангиз, ўша шаҳарларнинг бирига қочиб боришингиз мумкин. Бу олтита шаҳардан ташқари, левиларга яна қирқ иккита шаҳар беринглар. 7 Ҳаммаси бўлиб левиларга қирқ саккизта шаҳар ва улар атрофидаги яйловлар берилсин.
8 Исроил халқи мулкидан ҳар бир қабила олган улушининг ҳажмига кўра, левиларга шаҳарлар ажратиб беринглар. Каттароқ улуш олган қабила кўпроқ, кичикроқ улуш олган қабила эса камроқ шаҳар берсин.”
Паноҳ шаҳарлар
9-10 Исроил халқига қуйидаги амр ва қонунларни етказ, деб Мусога Эгамиз шундай амр берди: “Сизлар Иордан дарёсининг нариги томонига ўтиб, Канъон юртига кирганларингиздан кейин, 11 ўзларингиз учун паноҳ шаҳарларни танланглар. Бирортаси бехосдан одам ўлдириб қўйса, ўша шаҳарларнинг бирига қочиб бора оладиган бўлсин. 12 Қотил жамоа олдида ҳукм қилинишдан олдин ўлдирилиб қўйилмаслиги учун бу шаҳарлар қотилга қасоскордан паноҳ бўлади.
13 Олтита паноҳ шаҳрингиз бўлсин. 14 Учта шаҳарни Иордан дарёсининг шарқ томонидан, қолган учтасини Канъон юртидан танланглар. 15 Ана шу олтита шаҳар сизлар учун ҳам, орангизда вақтинча ёки доимий равишда истиқомат қилаётган мусофирлар учун ҳам паноҳ бўлади. Бирортасини бехосдан ўлдириб қўйган одам ўша ёққа қочиб борсин.
16 Агар бирорта одам бошқасини темир асбоб билан уриб ўлдириб қўйса, урган одам қотил ҳисобланади ва ўша одамнинг жазоси ўлимдир. 17 Одамни тош билан уриб ўлдирган киши ҳам қотилдир. Қотилнинг жазоси ўлимдир. 18 Одамни ёғоч қурол билан уриб ўлдирган киши ҳам қотилдир. Қотилнинг жазоси ўлимдир. 19 Марҳумнинг хунини оладиган одам қотилни ўлдирсин. Қотилни учратиб қолганда унинг жонини олсин. 20 Шунингдек, агар бирортаси бошқасини ёмон кўргани учун итариб ёки қасддан унга бирор нарсани отиб ўлдириб қўйса, 21 ёхуд адоватдан унга мушт тушириб ўлдирса, урган одамнинг жазоси ўлимдир. У қотилдир. Марҳумнинг хунини оладиган одам қотилни учратганда ўлдирсин.
22 Борди–ю, бири бошқасини бехосдан, хусумат қилмай, туртиб юборса ёки қасд қилмай бирор нарса отса 23-24 ё кўрмай туриб устига тош тушириб юборса ва ўша одам ўлса, жамоа қасоскор билан одам ўлдирган кишининг орасидаги можарони ҳал қилсин. Чунки одам ўлдирганнинг ва марҳумнинг орасида ҳеч қандай адоват бўлмаган эди. 25 Жамоа қотилни қасоскорнинг қўлидан халос қилиб, уни қайтариб паноҳ шаҳарга жўнатсин. Мой суртиб танланган олий руҳоний вафот этгунча, қотил ўша ерда қолсин.
26 Лекин қотил паноҳ шаҳар чегарасидан чиқса 27 ва қасоскор уни паноҳ шаҳардан ташқарида тутиб олиб ўлдирса, қасоскор қотилликда айбланмайди. 28 Чунки олий руҳоний вафот этгунча, қотил паноҳ шаҳарда қолиши лозим эди. Олий руҳонийнинг вафотидан сўнггина у ўз уйига қайтиб бориши мумкин эди. 29 Мана шулар сизлар учун авлодларингиз оша, қаерда яшасангиз ҳам, қонун бўлиб қолсин.
30 Одам ўлдирган киши фақат гувоҳларнинг кўрсатмалари асосидагина қотилликда айбланиб, ўлим жазосига тортилсин. Битта одамнинг гувоҳлиги асосида ҳеч ким ўлдирилмасин.
31 Ўлимга ҳукм қилинган қотилнинг жони эвазига пул олманглар. Қотилни албатта ўлдиринглар.
32 Паноҳ шаҳарга қочиб кетган одамдан ҳам пул олманглар, у олий руҳонийнинг вафотидан олдин ўз ерига қайтиб келиб яшаши учун йўл қўйманглар. 33 Ўзингиз яшаб юрган ерни булғаманглар. Ер тўкилган қон туфайли булғанади. Қотиллик туфайли булғанган ерни фақат қотилнинг қони билан тозалаб бўлади. 34 Ўзларингиз яшайдиган ва Мен истиқомат қиладиган ерни булғаманглар, зотан, Мен, Эгангиз, Исроил халқи орасида истиқомат қиламан.”
