32–BOB
Iordan daryosining sharqiga oʻrnashgan qabilalar
1 Ruben va Gad qabilalarining chorvasi nihoyatda koʻp edi. Ular Yazir va Gilad yerlarining chorvabop ekanligini koʻrib, 2 Muso, ruhoniy Elazar va jamoa yoʻlboshchilarining oldiga borib shunday deyishdi:
3 — Otaroʻt, Dibon, Yazir, Nimro, Xashbon, Elaley, Savom, Navo, Bayoʻn shaharlari 4 joylashgan butun oʻlkani Egamiz Isroil xalqiga magʻlub qilib berdi. Bular nihoyatda chorvabop yerlar ekan. Biz, qullaringizda esa chorva bor. 5 Agar biz sizlarning iltifotingizga sazovor boʻlgan boʻlsak, oʻsha yerlarni bizga mulk qilib bersangizlar, bizni Iordan daryosining narigi tomoniga olib oʻtmasangizlar.
6 Shunda Muso Gad bilan Ruben qabilalariga shu gapni aytdi:
— Birodarlaringiz urushga borganlarida, sizlar bu yerda qolasizlarmi? 7 Nimaga sizlar, Isroil xalqi Egamiz bergan yurtga bormasin deb, ularning raʼyini qaytaryapsizlar? 8 Men otalaringizni Kadesh–Barnadan yurtni koʻrib kelish uchun joʻnatganimda , ular ham xuddi shunday yoʻl tutishgan edi. 9 Ular Eshkoʻl soyligigacha borib, yurtni koʻrib chiqqan edilar. Soʻng Egamiz bergan yurtga Isroil xalqi bormasin deb, ularning raʼyini qaytargan edilar. 10 Oʻsha kuni Egamiz otalaringizdan qattiq gʻazablanib shunday qasam ichgan edi: 11 “Misrdan chiqqan yigirma va undan yuqori yoshdagi odamlar Men Ibrohim, Isʼhoq va Yoqubga vaʼda qilgan yurtga kirmaydilar, chunki ular Menga sodiq qolmadilar. 12 Oʻsha yurtga faqat Xanaz urugʻidan Yafunax oʻgʻli Xolib bilan Nun oʻgʻli Yoshua kiradilar, chunki ular ikkovigina Men, Egangizga sodiq qoldilar.” 13 Ha, Egamiz Isroil xalqidan qattiq gʻazablangan edi. Egamiz Uning oldida qabihlik qilgan ajdodlaringizni qirq yil — ular batamom tugab bitmaguncha sahroda kezdirdi. 14 Endi esa siz, ey gunohkorlar nasli, otalaringizning oʻrnini egallab, Egamizning gʻazabini Isroil xalqiga qarshi qoʻzgʻatyapsizlar! 15 Agar Egamizdan yuz oʻgirsangizlar, U Isroil xalqini yana sahroda tashlab ketadi. Butun xalq sizlar tufayli qirilib ketadi.
16 Lekin Ruben va Gad qabilalari Musoga yaqin kelib, shunday deyishdi:
— Biz bu yerda suruvlarimiz uchun qoʻy qoʻralari, bola–chaqalarimiz uchun shaharlar quramiz. 17 Oʻzimiz esa qurollanib , Isroil xalqini ularning yurtiga joylashtirmagunimizcha, safning boshida boramiz. Shu asnoda bolalarimiz mustahkam shaharlarda qoladilar, mahalliy xalqlar ularga xavf solmaydilar. 18 Isroil xalqining har biri oʻz mulkiga ega boʻlmaguncha, biz uyimizga qaytmaymiz. 19 Biz Iordan daryosining narigi tomonidan oʻzimizga mulk olmaymiz, chunki bizning mulkimiz Iordanning bu tomonida — sharq tomonida boʻladi.
20 Muso ularga shunday dedi:
— Agar sizlar haqiqatan ham aytganingizni qilsangizlar, Egamiz boshchiligida jang qilish uchun qurollaninglar. 21 Qoʻliga qurol tutgan barcha sipohlaringiz Iordan daryosidan oʻtsin. Egamiz Oʻz gʻanimlarini quvib yubormaguncha, Uning oldida boringlar. 22 Egamiz oʻsha yurtni taslim qilgandan keyingina, shu yerga qaytib kelishingiz mumkin. Shunda sizlar Egamiz oldida ham, Isroil xalqi oldida ham oʻz majburiyatingizdan ozod boʻlasiz. Iordan daryosining sharq tomonidagi yer sizning Egamizdan olgan mulkingiz boʻladi. 23 Agar shunday qilmasangizlar, sizlar Egamizga qarshi gunoh qilgan boʻlasizlar. Gunohingiz oʻz boshingizni yeydi. 24 Bolalaringiz uchun shaharlar, suruvlaringiz uchun qoʻralar quringlar. Lekin vaʼdangiz ustidan chiqinglar.
25 Gad va Ruben qabilalari Musoga:
— Hazrat nima buyruq bersalar, qullari shuni ado etgaylar, — deyishdi. 26 — Bolalarimiz, xotinlarimiz, podalaru suruvlarimiz shu yerda — Giladdagi shaharlarda qoladi. 27 Lekin qoʻliga qurol tutgan har bir erkagimiz, hazratimiz aytganlariday, Egamiz boshchiligida jang qilish uchun daryoning narigi tomoniga oʻtadi.
28 Shundan keyin Muso ruhoniy Elazarga, Nun oʻgʻli Yoshuaga va Isroil qabilalarining urugʻboshilariga buyruq berib dedi:
29 — Agar Gad va Ruben qabilalari qurollanib, Egamiz boshchiligida jang qilish uchun sizlar bilan birga Iordanning narigi tomoniga oʻtishsa, sizlar oʻsha yurtni magʻlub qilganingizdan keyin Gilad yerlarini ularga mulk qilib beringlar. 30 Bordi–yu, ular sizlar bilan birga qurollanib bormasa, boshqa qabilalar qatori, Kanʼon yurtidan mulk olishadi.
31 Shunda Gad va Ruben qabilalari:
— Egamiz qullaringizga qanday amr bergan boʻlsa, hammasini ado etamiz, — deb javob berishdi. 32 — Biz qurollanib, Egamiz boshchiligida Iordan daryosining narigi tomoniga oʻtib, Kanʼon yurtiga boramiz. Lekin Iordanning shu tomonidagi yerlar bizning mulkimiz boʻla qolsin.
33 Shundan keyin Muso Gad bilan Ruben qabilalariga hamda Yusuf oʻgʻli Manashe qabilasining yarmiga Amor xalqining shohi Sixoʻnning yurti bilan Bashan shohi Oʻgning yurtini — ularning jamiki yerlariyu shaharlarini, shahar atrofidagi oʻlkalarni berdi.
34-36 Gad qabilasi Dibon, Otaroʻt, Aror, Otroʻt–Shifan, Yazir, Yohboxo, Bayt–Nimro va Bayt–Xoron degan mustahkam shaharlarni qaytadan barpo qilib, qoʻy qoʻralarini qurdi. 37-38 Ruben qabilasi ham Xashbon, Elaley, Xiratayim, Navo, Baal–Miyon va Sivmo shaharlarini qayta qurdi. Ular tiklagan shaharlariga yangi nom berishdi.
39 Manashe oʻgʻli Moxirning avlodlari Gilad oʻlkasiga borishdi. Ular Giladni bosib olib, Amor xalqini u yerdan quvib chiqarishdi. 40 Shundan keyin Muso Giladni Moxir avlodiga berdi. Moxir avlodi u yerda joylashdi. 41 Manashe oʻgʻli Yovir esa Amor xalqining shaharlarini egalladi. U oʻsha yerlarga Yovir shaharlari deb nom berdi. 42 Navah Qanot shahrini va uning atrofidagi qishloqlarni egalladi, u yerlarga Navah deb oʻzining ismini berdi.
32–БОБ
Иордан дарёсининг шарқига ўрнашган қабилалар
1 Рубен ва Гад қабилаларининг чорваси ниҳоятда кўп эди. Улар Язир ва Гилад ерларининг чорвабоп эканлигини кўриб, 2 Мусо, руҳоний Элазар ва жамоа йўлбошчиларининг олдига бориб шундай дейишди:
3 — Отарўт, Дибон, Язир, Нимро, Хашбон, Элалей, Савом, Наво, Байўн шаҳарлари 4 жойлашган бутун ўлкани Эгамиз Исроил халқига мағлуб қилиб берди. Булар ниҳоятда чорвабоп ерлар экан. Биз, қулларингизда эса чорва бор. 5 Агар биз сизларнинг илтифотингизга сазовор бўлган бўлсак, ўша ерларни бизга мулк қилиб берсангизлар, бизни Иордан дарёсининг нариги томонига олиб ўтмасангизлар.
6 Шунда Мусо Гад билан Рубен қабилаларига шу гапни айтди:
— Биродарларингиз урушга борганларида, сизлар бу ерда қоласизларми? 7 Нимага сизлар, Исроил халқи Эгамиз берган юртга бормасин деб, уларнинг раъйини қайтаряпсизлар? 8 Мен оталарингизни Кадеш–Барнадан юртни кўриб келиш учун жўнатганимда , улар ҳам худди шундай йўл тутишган эди. 9 Улар Эшкўл сойлигигача бориб, юртни кўриб чиққан эдилар. Сўнг Эгамиз берган юртга Исроил халқи бормасин деб, уларнинг раъйини қайтарган эдилар. 10 Ўша куни Эгамиз оталарингиздан қаттиқ ғазабланиб шундай қасам ичган эди: 11 “Мисрдан чиққан йигирма ва ундан юқори ёшдаги одамлар Мен Иброҳим, Исҳоқ ва Ёқубга ваъда қилган юртга кирмайдилар, чунки улар Менга содиқ қолмадилар. 12 Ўша юртга фақат Ханаз уруғидан Яфунах ўғли Холиб билан Нун ўғли Ёшуа кирадилар, чунки улар икковигина Мен, Эгангизга содиқ қолдилар.” 13 Ҳа, Эгамиз Исроил халқидан қаттиқ ғазабланган эди. Эгамиз Унинг олдида қабиҳлик қилган аждодларингизни қирқ йил — улар батамом тугаб битмагунча саҳрода кездирди. 14 Энди эса сиз, эй гуноҳкорлар насли, оталарингизнинг ўрнини эгаллаб, Эгамизнинг ғазабини Исроил халқига қарши қўзғатяпсизлар! 15 Агар Эгамиздан юз ўгирсангизлар, У Исроил халқини яна саҳрода ташлаб кетади. Бутун халқ сизлар туфайли қирилиб кетади.
16 Лекин Рубен ва Гад қабилалари Мусога яқин келиб, шундай дейишди:
— Биз бу ерда сурувларимиз учун қўй қўралари, бола–чақаларимиз учун шаҳарлар қурамиз. 17 Ўзимиз эса қуролланиб , Исроил халқини уларнинг юртига жойлаштирмагунимизча, сафнинг бошида борамиз. Шу аснода болаларимиз мустаҳкам шаҳарларда қоладилар, маҳаллий халқлар уларга хавф солмайдилар. 18 Исроил халқининг ҳар бири ўз мулкига эга бўлмагунча, биз уйимизга қайтмаймиз. 19 Биз Иордан дарёсининг нариги томонидан ўзимизга мулк олмаймиз, чунки бизнинг мулкимиз Иорданнинг бу томонида — шарқ томонида бўлади.
20 Мусо уларга шундай деди:
— Агар сизлар ҳақиқатан ҳам айтганингизни қилсангизлар, Эгамиз бошчилигида жанг қилиш учун қуролланинглар. 21 Қўлига қурол тутган барча сипоҳларингиз Иордан дарёсидан ўтсин. Эгамиз Ўз ғанимларини қувиб юбормагунча, Унинг олдида боринглар. 22 Эгамиз ўша юртни таслим қилгандан кейингина, шу ерга қайтиб келишингиз мумкин. Шунда сизлар Эгамиз олдида ҳам, Исроил халқи олдида ҳам ўз мажбуриятингиздан озод бўласиз. Иордан дарёсининг шарқ томонидаги ер сизнинг Эгамиздан олган мулкингиз бўлади. 23 Агар шундай қилмасангизлар, сизлар Эгамизга қарши гуноҳ қилган бўласизлар. Гуноҳингиз ўз бошингизни ейди. 24 Болаларингиз учун шаҳарлар, сурувларингиз учун қўралар қуринглар. Лекин ваъдангиз устидан чиқинглар.
25 Гад ва Рубен қабилалари Мусога:
— Ҳазрат нима буйруқ берсалар, қуллари шуни адо этгайлар, — дейишди. 26 — Болаларимиз, хотинларимиз, подалару сурувларимиз шу ерда — Гиладдаги шаҳарларда қолади. 27 Лекин қўлига қурол тутган ҳар бир эркагимиз, ҳазратимиз айтганларидай, Эгамиз бошчилигида жанг қилиш учун дарёнинг нариги томонига ўтади.
28 Шундан кейин Мусо руҳоний Элазарга, Нун ўғли Ёшуага ва Исроил қабилаларининг уруғбошиларига буйруқ бериб деди:
29 — Агар Гад ва Рубен қабилалари қуролланиб, Эгамиз бошчилигида жанг қилиш учун сизлар билан бирга Иорданнинг нариги томонига ўтишса, сизлар ўша юртни мағлуб қилганингиздан кейин Гилад ерларини уларга мулк қилиб беринглар. 30 Борди–ю, улар сизлар билан бирга қуролланиб бормаса, бошқа қабилалар қатори, Канъон юртидан мулк олишади.
31 Шунда Гад ва Рубен қабилалари:
— Эгамиз қулларингизга қандай амр берган бўлса, ҳаммасини адо этамиз, — деб жавоб беришди. 32 — Биз қуролланиб, Эгамиз бошчилигида Иордан дарёсининг нариги томонига ўтиб, Канъон юртига борамиз. Лекин Иорданнинг шу томонидаги ерлар бизнинг мулкимиз бўла қолсин.
33 Шундан кейин Мусо Гад билан Рубен қабилаларига ҳамда Юсуф ўғли Манаше қабиласининг ярмига Амор халқининг шоҳи Сихўннинг юрти билан Башан шоҳи Ўгнинг юртини — уларнинг жамики ерларию шаҳарларини, шаҳар атрофидаги ўлкаларни берди.
34-36 Гад қабиласи Дибон, Отарўт, Арор, Отрўт–Шифан, Язир, Ёҳбохо, Байт–Нимро ва Байт–Хорон деган мустаҳкам шаҳарларни қайтадан барпо қилиб, қўй қўраларини қурди. 37-38 Рубен қабиласи ҳам Хашбон, Элалей, Хиратайим, Наво, Баал–Миён ва Сивмо шаҳарларини қайта қурди. Улар тиклаган шаҳарларига янги ном беришди.
39 Манаше ўғли Мохирнинг авлодлари Гилад ўлкасига боришди. Улар Гиладни босиб олиб, Амор халқини у ердан қувиб чиқаришди. 40 Шундан кейин Мусо Гиладни Мохир авлодига берди. Мохир авлоди у ерда жойлашди. 41 Манаше ўғли Ёвир эса Амор халқининг шаҳарларини эгаллади. У ўша ерларга Ёвир шаҳарлари деб ном берди. 42 Наваҳ Қанот шаҳрини ва унинг атрофидаги қишлоқларни эгаллади, у ерларга Наваҳ деб ўзининг исмини берди.
