13–BOB
Isroil xalqi begona nasllardan ajraladi
1 Oʻsha kuni xalqqa Musoning kitobidan oʻqib berildi. U yerda shunday yozilgan ekan : “Ommonliklar va Moʻabliklar Xudoning jamoasiga kirolmaydi, 2 chunki Isroil xalqi Misrdan chiqqanda, Ommonliklar va Moʻabliklar ularni non va suv bilan kutib olmadilar. Aksincha, Isroil xalqini laʼnatlash uchun Balomni yolladilar . Lekin Xudoyimiz laʼnatni duoga aylantirdi.” 3 Isroil xalqi Tavrot soʻzlarini eshitgach, Isroil jamoasidan hamma begona nasllarni chiqarib yubordi.
Naximiyoning islohotlari
Naximiyo Maʼbad xizmatkorlarining taʼminoti toʻgʻrisida qoidalar joriy qiladi
4 Bu voqea Quddus devori bagʻishlanishidan ancha oldin sodir boʻlgan edi. Oʻsha vaqtda Toʻviyoning qarindoshi Eliashab Xudoyimizning uyidagi omborxonalar uchun masʼul edi. 5 Eliashab Toʻviyo uchun Maʼbadga qarashli katta bir xonani boʻshatib beribdi. Ilgari bu xonada nazr qilingan don, xushboʻy tutatqilar va Maʼbad buyumlari saqlanardi. Egamiz bergan amrga muvofiq, levilarga, qoʻshiqchilarga, Maʼbad darvozabonlariga atalgan don, sharob, zaytun moyi ushrlari va ruhoniylarga atalgan nazrlar ham oʻsha xonada saqlanardi.
6 Bu ishlar sodir boʻlganda, men Quddusda emasdim. Bobil shohi Artaxshas hukmronligining oʻttiz ikkinchi yilida men shoh huzuriga ketgan edim. Maʼlum vaqt oʻtgach, shohdan ijozat soʻrab, 7 Quddusga qaytib keldim. Shundagina Eliashabning qilgan bu rasvo ishidan xabardor boʻldim. U Toʻviyoga Xudoning uyidagi bir xonani ajratib beribdi–ya! 8 Men qattiq gʻazablanib, Toʻviyoning barcha uy jihozlarini xonadan uloqtirib tashladim. 9 Soʻng, omborxonalar poklansin, deb buyruq berdim. Omborxonalar poklangach, Xudoning uyi buyumlarini, don nazrlarini va xushboʻy tutatqilarni oʻz joyiga qaytarib qoʻydirdim.
10 Shuningdek, levilarga hosilning oʻzlariga tegishli ulushlari berilmaganini ham bilib qoldim. Shu sababdan Maʼbadda xizmat qilib yurgan levilar va qoʻshiqchilar oʻzlarining dalalariga qaytib ketishgan ekan. 11 Yoʻlboshchilarga: “Nima uchun Xudoning uyini oʻz holiga tashlab qoʻydingizlar?!” deb tanbeh berdim. Levilar va qoʻshiqchilarni toʻplab, hammalarini oʻz vazifalariga qoʻydim. 12 Shundan keyin jamiki Yahudo xalqi don, sharob, zaytun moyi ushrlarini Maʼbad omborxonalariga olib kelishdi. 13 Ruhoniy Shalamiyoni, kotib Zodoʻxni va levilardan Podiyoni omborxonalarga masʼul qilib tayinladim. Mattaniyoning nabirasi Zakkur oʻgʻli Xanonni ularning yordamchisi qilib tayinladim. Ular ishonchli odamlar boʻlib, vazifalari birodarlariga ulushni taqsimlashdan iborat edi.
14 Ey Xudoyim! Qilgan bu ishlarimni yodingda tut, mendan marhamatingni darigʻ tutmagin. Sening uying uchun va uyingda oʻtkaziladigan sajda marosimlari uchun sadoqat bilan qilgan savob ishlarimni unutma.
Naximiyo Shabbat qoidalarini joriy qiladi
15 Oʻsha vaqtda men Shabbat kunlari uzum ezayotgan yahudiylarni koʻrardim. Uyum–uyum don, sharob, uzum, anjir va har xil yuklarni olib kelayotganlarni kuzatar edim. Ular bu narsalarni eshaklarga yuklab, Shabbat kuni Quddusga olib kelishar edi. Ular oʻz mahsulotlarini sotayotganlarida, men ularni ogohlantirib, bunday ishlarni Shabbat kuni qilmanglar, deb aytardim. 16 Quddusda yashayotgan Tirliklar ham baliq va har xil mahsulotlarni olib kelib, oʻshalarni Shabbat kuni Yahudo xalqiga Quddusda sotayotgan edilar. 17 Men Yahudo yoʻlboshchilariga tanbeh berdim: “Bu qilayotganlaringiz qabihlik–ku! Axir, Shabbat kunini bulgʻayapsizlar! 18 Xudo bizni va bu shaharni ota–bobolarimizning xuddi shunday qabihligi uchun jazolagan edi–ku! Endi esa sizlar Shabbat kunini bulgʻab, xalqimizning boshiga Xudoning qahr–gʻazabini yanada koʻproq olib kelyapsizlar.”
19 Shunda men buyruq berdim: “Shabbatdan oldin oqshom tushishi bilanoq Quddus darvozalari yopilsin, Shabbat tugamaguncha ochilmasin.” Shabbat kuni birortasi yuk olib chiqmasligi uchun darvoza oldiga odamlarimdan baʼzilarini oʻtqazib qoʻydim. 20 Shunda savdogarlar va har xil mahsulotlarni sotuvchilar tunni bir–ikki marta Quddusdan tashqarida oʻtkazdilar. 21 Men ularni ogohlantirib, shunday dedim: “Nega sizlar tunni devor ortida oʻtkazasizlar?! Agar yana shunday qilsangiz, sizlarni qamayman.” Oʻshandan keyin ular Shabbat kuni kelmay qoʻydilar. 22 Soʻngra men levilarga, oʻzlaringizni poklab kelib, Shabbat kunini muqaddas saqlash uchun shahar darvozalarini qoʻriqlanglar, deb buyruq berdim.
Ey Xudoyim! Qilgan bu ishlarimni ham yodingda tut, mendan marhamatingni darigʻ tutmagin. Buyuk sodiq sevging haqi menga shafqat qil.
Naximiyo begona xalqlar bilan quda–andachilik qilishni man etadi
23 Oʻsha kunlarda Ashdodlik , Ommonlik va Moʻablik ayollarga uylangan yahudiylar haqida xabar topgan edim. 24 Bolalarining yarmi ibroniy tilida gaplashishni bilmasdilar, Ashdod tilida yoki boshqa tilda soʻzlashardilar. 25-27 Shuning uchun men ularga tanbeh berdim, ularni laʼnatladim, baʼzilarini urdim, sochlarini yuldim. Ularga shunday dedim: “Hatto Isroil shohi Sulaymon bunday ayollarga uylanib, gunoh qilgan edi! Bir oʻylab koʻringlar! Xalqlar orasida Sulaymonga oʻxshagan shoh yoʻq edi. Xudo uni yaxshi koʻrib, uni butun Isroil ustidan shoh qilgan edi. Shunga qaramay, butparast ayollar uni gunohga boshladilar. Mana endi sizlar ham xuddi shunday gunohga qoʻl urganingizni eshitib turibman! Sizlar Xudoga qarshi oʻtaketgan qabihlik qilyapsizlar! Butparast ayollarga uylanib, Xudoga xiyonat qilyapsizlar!” Men Xudoning nomini oʻrtaga qoʻyib: “Biz bu yerdagi begona xalqlar bilan quda–andachilik qilmaymiz”, deb ularga qasam ichdirdim.
28 Yoʻxadax oliy ruhoniy Eliashabning oʻgʻli edi. Yoʻxadaxning oʻgʻillaridan biri Bayt–Xoʻronlik Sanballatning qiziga uylangan edi. Yoʻxadaxning oʻsha oʻgʻlini oldimdan haydab yubordim.
29 Ey Xudoyim! Bu uchala odamning qilmishini yodingda tut, ularning jazosini ber. Axir, ular ruhoniylikni bulgʻadilar , Sen ruhoniylar va levilar bilan tuzgan ahdni buzdilar.
Naximiyoning soʻnggi islohotlari
30 Shunday qilib, men xalqni begonalarning taʼsiridan pokladim. Ruhoniylar va levilarning burchlarini, har birining vazifasini belgilab berdim. 31 Qurbonliklarni kuydirish uchun oʻtinlarni oʻz vaqtida olib kelishni va birinchi hosildan ruhoniylar uchun nazrlarni olib kelishni yoʻlga qoʻydim.
Ey Xudoyim! Qilgan ishlarimni yodingda tut, mendan marhamatingni darigʻ tutmagin.
13–БОБ
Исроил халқи бегона насллардан ажралади
1 Ўша куни халққа Мусонинг китобидан ўқиб берилди. У ерда шундай ёзилган экан : “Оммонликлар ва Мўабликлар Худонинг жамоасига киролмайди, 2 чунки Исроил халқи Мисрдан чиққанда, Оммонликлар ва Мўабликлар уларни нон ва сув билан кутиб олмадилар. Аксинча, Исроил халқини лаънатлаш учун Баломни ёлладилар . Лекин Худойимиз лаънатни дуога айлантирди.” 3 Исроил халқи Таврот сўзларини эшитгач, Исроил жамоасидан ҳамма бегона наслларни чиқариб юборди.
Нахимиёнинг ислоҳотлари
Нахимиё Маъбад хизматкорларининг таъминоти тўғрисида қоидалар жорий қилади
4 Бу воқеа Қуддус девори бағишланишидан анча олдин содир бўлган эди. Ўша вақтда Тўвиёнинг қариндоши Элиашаб Худойимизнинг уйидаги омборхоналар учун масъул эди. 5 Элиашаб Тўвиё учун Маъбадга қарашли катта бир хонани бўшатиб берибди. Илгари бу хонада назр қилинган дон, хушбўй тутатқилар ва Маъбад буюмлари сақланарди. Эгамиз берган амрга мувофиқ, левиларга, қўшиқчиларга, Маъбад дарвозабонларига аталган дон, шароб, зайтун мойи ушрлари ва руҳонийларга аталган назрлар ҳам ўша хонада сақланарди.
6 Бу ишлар содир бўлганда, мен Қуддусда эмасдим. Бобил шоҳи Артахшас ҳукмронлигининг ўттиз иккинчи йилида мен шоҳ ҳузурига кетган эдим. Маълум вақт ўтгач, шоҳдан ижозат сўраб, 7 Қуддусга қайтиб келдим. Шундагина Элиашабнинг қилган бу расво ишидан хабардор бўлдим. У Тўвиёга Худонинг уйидаги бир хонани ажратиб берибди–я! 8 Мен қаттиқ ғазабланиб, Тўвиёнинг барча уй жиҳозларини хонадан улоқтириб ташладим. 9 Сўнг, омборхоналар поклансин, деб буйруқ бердим. Омборхоналар поклангач, Худонинг уйи буюмларини, дон назрларини ва хушбўй тутатқиларни ўз жойига қайтариб қўйдирдим.
10 Шунингдек, левиларга ҳосилнинг ўзларига тегишли улушлари берилмаганини ҳам билиб қолдим. Шу сабабдан Маъбадда хизмат қилиб юрган левилар ва қўшиқчилар ўзларининг далаларига қайтиб кетишган экан. 11 Йўлбошчиларга: “Нима учун Худонинг уйини ўз ҳолига ташлаб қўйдингизлар?!” деб танбеҳ бердим. Левилар ва қўшиқчиларни тўплаб, ҳаммаларини ўз вазифаларига қўйдим. 12 Шундан кейин жамики Яҳудо халқи дон, шароб, зайтун мойи ушрларини Маъбад омборхоналарига олиб келишди. 13 Руҳоний Шаламиёни, котиб Зодўхни ва левилардан Подиёни омборхоналарга масъул қилиб тайинладим. Маттаниёнинг набираси Заккур ўғли Ханонни уларнинг ёрдамчиси қилиб тайинладим. Улар ишончли одамлар бўлиб, вазифалари биродарларига улушни тақсимлашдан иборат эди.
14 Эй Худойим! Қилган бу ишларимни ёдингда тут, мендан марҳаматингни дариғ тутмагин. Сенинг уйинг учун ва уйингда ўтказиладиган сажда маросимлари учун садоқат билан қилган савоб ишларимни унутма.
Нахимиё Шаббат қоидаларини жорий қилади
15 Ўша вақтда мен Шаббат кунлари узум эзаётган яҳудийларни кўрардим. Уюм–уюм дон, шароб, узум, анжир ва ҳар хил юкларни олиб келаётганларни кузатар эдим. Улар бу нарсаларни эшакларга юклаб, Шаббат куни Қуддусга олиб келишар эди. Улар ўз маҳсулотларини сотаётганларида, мен уларни огоҳлантириб, бундай ишларни Шаббат куни қилманглар, деб айтардим. 16 Қуддусда яшаётган Тирликлар ҳам балиқ ва ҳар хил маҳсулотларни олиб келиб, ўшаларни Шаббат куни Яҳудо халқига Қуддусда сотаётган эдилар. 17 Мен Яҳудо йўлбошчиларига танбеҳ бердим: “Бу қилаётганларингиз қабиҳлик–ку! Ахир, Шаббат кунини булғаяпсизлар! 18 Худо бизни ва бу шаҳарни ота–боболаримизнинг худди шундай қабиҳлиги учун жазолаган эди–ку! Энди эса сизлар Шаббат кунини булғаб, халқимизнинг бошига Худонинг қаҳр–ғазабини янада кўпроқ олиб келяпсизлар.”
19 Шунда мен буйруқ бердим: “Шаббатдан олдин оқшом тушиши биланоқ Қуддус дарвозалари ёпилсин, Шаббат тугамагунча очилмасин.” Шаббат куни бирортаси юк олиб чиқмаслиги учун дарвоза олдига одамларимдан баъзиларини ўтқазиб қўйдим. 20 Шунда савдогарлар ва ҳар хил маҳсулотларни сотувчилар тунни бир–икки марта Қуддусдан ташқарида ўтказдилар. 21 Мен уларни огоҳлантириб, шундай дедим: “Нега сизлар тунни девор ортида ўтказасизлар?! Агар яна шундай қилсангиз, сизларни қамайман.” Ўшандан кейин улар Шаббат куни келмай қўйдилар. 22 Сўнгра мен левиларга, ўзларингизни поклаб келиб, Шаббат кунини муқаддас сақлаш учун шаҳар дарвозаларини қўриқланглар, деб буйруқ бердим.
Эй Худойим! Қилган бу ишларимни ҳам ёдингда тут, мендан марҳаматингни дариғ тутмагин. Буюк содиқ севгинг ҳақи менга шафқат қил.
Нахимиё бегона халқлар билан қуда–андачилик қилишни ман этади
23 Ўша кунларда Ашдодлик , Оммонлик ва Мўаблик аёлларга уйланган яҳудийлар ҳақида хабар топган эдим. 24 Болаларининг ярми иброний тилида гаплашишни билмасдилар, Ашдод тилида ёки бошқа тилда сўзлашардилар. 25-27 Шунинг учун мен уларга танбеҳ бердим, уларни лаънатладим, баъзиларини урдим, сочларини юлдим. Уларга шундай дедим: “Ҳатто Исроил шоҳи Сулаймон бундай аёлларга уйланиб, гуноҳ қилган эди! Бир ўйлаб кўринглар! Халқлар орасида Сулаймонга ўхшаган шоҳ йўқ эди. Худо уни яхши кўриб, уни бутун Исроил устидан шоҳ қилган эди. Шунга қарамай, бутпараст аёллар уни гуноҳга бошладилар. Мана энди сизлар ҳам худди шундай гуноҳга қўл урганингизни эшитиб турибман! Сизлар Худога қарши ўтакетган қабиҳлик қиляпсизлар! Бутпараст аёлларга уйланиб, Худога хиёнат қиляпсизлар!” Мен Худонинг номини ўртага қўйиб: “Биз бу ердаги бегона халқлар билан қуда–андачилик қилмаймиз”, деб уларга қасам ичдирдим.
28 Йўхадах олий руҳоний Элиашабнинг ўғли эди. Йўхадахнинг ўғилларидан бири Байт–Хўронлик Санбаллатнинг қизига уйланган эди. Йўхадахнинг ўша ўғлини олдимдан ҳайдаб юбордим.
29 Эй Худойим! Бу учала одамнинг қилмишини ёдингда тут, уларнинг жазосини бер. Ахир, улар руҳонийликни булғадилар , Сен руҳонийлар ва левилар билан тузган аҳдни буздилар.
Нахимиёнинг сўнгги ислоҳотлари
30 Шундай қилиб, мен халқни бегоналарнинг таъсиридан покладим. Руҳонийлар ва левиларнинг бурчларини, ҳар бирининг вазифасини белгилаб бердим. 31 Қурбонликларни куйдириш учун ўтинларни ўз вақтида олиб келишни ва биринчи ҳосилдан руҳонийлар учун назрларни олиб келишни йўлга қўйдим.
Эй Худойим! Қилган ишларимни ёдингда тут, мендан марҳаматингни дариғ тутмагин.
