11–BOB
Iso Masih va Yahyo choʻmdiruvchi
1 Iso oʻn ikki shogirdiga koʻrsatmalarni berib boʻlgandan keyin, yaqin atrofdagi shaharlarda taʼlim berish va vaʼz aytish uchun ketdi. 2 Yahyo bu paytda zindonda edi , u Isoning qilayotgan ishlarini eshitib, shogirdlarini Isoning oldiga 3 shunday savol bilan yubordi: “Keladigan Zot Sizmisiz, yoki biz boshqasini kutaylikmi?”
4 Iso Yahyoning shogirdlariga shunday javob berdi:
— Boringlar, koʻrib eshitayotganlaringizni Yahyoga aytinglar: 5 koʻrlar koʻrmoqda, choʻloqlar yurmoqda, teri kasalligiga chalinganlar tuzalmoqda, karlar eshitmoqda, oʻliklar tirilmoqda, yoʻqsillar Xushxabarni eshitmoqda. 6 Mendan yuz oʻgirmaganlar naqadar baxtlidir!
7 Yahyoning shogirdlari ketayotganlarida, Iso olomonga Yahyo haqida gapira boshladi: “Sahroga nimani koʻrgani bordingizlar? Shamolda hilpirab turgan qamishnimi? 8 Xoʻsh, nimani koʻrgani bordingizlar? Bashang kiyingan odamnimi? Bashang kiyinganlar shoh saroyida boʻladi–ku! 9 Unday boʻlsa, nimani koʻrgani bordingizlar? Paygʻambarnimi? Ha, sizlarga shuni aytay: sizlar paygʻambardan ham ulugʻini koʻrdingizlar! 10 U haqda shunday yozilgan:
«Mana, Sendan oldin Men Oʻz elchimni yuboryapman,
U Sen uchun yoʻlni hozirlaydi.»
11 Sizlarga chinini aytay: butun inson zoti orasida Yahyo choʻmdiruvchidan ulugʻi yoʻq. Ammo Osmon Shohligida eng kichik hisoblangan odam ham undan ulugʻroqdir. 12 Yahyo choʻmdiruvchi davridan shu kungacha odamlar Osmon Shohligiga shafqatsiz hujum qilmoqdalar. Zoʻravonlar Osmon Shohligini qoʻlga kiritishga harakat qilmoqdalar. 13 Yahyo choʻmdiruvchidan oldin oʻtgan hamma paygʻambarlarning bitiklarida va Tavrot kitobida Osmon Shohligi haqida bashorat qilingan. 14 Agar bu bashoratlarga ishonishni istasangizlar, Yahyo — kelishi bashorat qilingan Ilyosdir . 15 Kimning eshitar qulogʻi boʻlsa, eshitsin!
16 Bu naslni kimga qiyoslasam boʻladi? Ular bolalarga oʻxshaydilar, maydonda oʻtirib olib, shunday deya bir–birlariga baqiradilar:
17 «Sizlar uchun nay chaldik, ammo raqsga tushmadingiz,
Biz oh–voh qildik, ammo sizlar qaygʻurmadingiz.»
18 Yahyo kelganda, u na yedi, na ichdi, shuning uchun hamma: «Uni jin uribdi», deydilar. 19 Inson Oʻgʻli kelganda esa ham yedi, ham ichdi. Ammo Uni: «Yebtoʻymas, sharobxoʻr, soliqchilar va gunohkorlarning doʻsti», deydilar. Lekin bilib qoʻyinglar: donolik toʻgʻri ekanligi oʻz natijasidan ayon .”
Gunohkor shaharlarning holiga voy
20 Iso baʼzi shaharlarda koʻp moʻjizalar koʻrsatgandi, ammo xalq oʻz gunohlari uchun tavba qilmadi. Iso oʻsha shaharlar aholisiga taʼna qildi: 21 “Sening holingga voy, ey Xorazin! Sening holingga voy, ey Baytsayda! Agar sizlarda qilingan moʻjizalar Tir bilan Sidon shaharlarida qilinganda edi, ular allaqachon qanorga oʻranib, boshlariga kul sochib , tavba qilgan boʻlardilar. 22 Biroq sizlarga aytayin: qiyomat kunida sizning holingiz Tir va Sidonning holidan battar boʻladi. 23 Ey Kafarnahum! Xudo seni koʻklarga koʻtaradi deb oʻylaysanmi?! Yoʻq, U seni tubsiz chuqurlikka uloqtiradi! Agar senda yuz bergan moʻjizalar Sadoʻmda boʻlganda edi, u shahar shu kungacha saqlanib qolgan boʻlar edi. 24 Biroq senga aytayin: qiyomat kunida sening holing Sadoʻm shahrining holidan battar boʻladi.”
Holdan toyganlarga orom vaʼdasi
25 Oʻsha vaqtda Iso yana shunday dedi: “Ey Ota, yeru osmonning Egasi! Sen bu ishlarni donolaru idroklilardan yashirib, goʻdaklarga maʼlum etganing uchun Senga shukurlar aytaman. 26 Ha, Ota, bu Sening ezgu xohishing edi.
27 Otam hamma narsani Mening ixtiyorimga topshirgan. Oʻgʻilni Otadan boshqa hech kim bilmaydi. Otani ham Oʻgʻildan boshqa va Oʻgʻil ayon qilishni istagan odamdan boshqa hech kim bilmaydi.
28 Ey holdan toyganlar, ogʻir yuk ostida qolganlar, hammalaringiz Mening oldimga kelinglar! Men sizlarga orom beraman. 29 Mening boʻyinturugʻimni taqib olinglar, Mendan oʻrganinglar. Chunki Men yumshoq koʻngil va kamtarinman. Shunda sizlarning jonlaringiz orom topadi. 30 Axir, Mening boʻyinturugʻim qulay, yukim yengildir.”
11–БОБ
Исо Масиҳ ва Яҳё чўмдирувчи
1 Исо ўн икки шогирдига кўрсатмаларни бериб бўлгандан кейин, яқин атрофдаги шаҳарларда таълим бериш ва ваъз айтиш учун кетди. 2 Яҳё бу пайтда зиндонда эди , у Исонинг қилаётган ишларини эшитиб, шогирдларини Исонинг олдига 3 шундай савол билан юборди: “Келадиган Зот Сизмисиз, ёки биз бошқасини кутайликми?”
4 Исо Яҳёнинг шогирдларига шундай жавоб берди:
— Боринглар, кўриб эшитаётганларингизни Яҳёга айтинглар: 5 кўрлар кўрмоқда, чўлоқлар юрмоқда, тери касаллигига чалинганлар тузалмоқда, карлар эшитмоқда, ўликлар тирилмоқда, йўқсиллар Хушхабарни эшитмоқда. 6 Мендан юз ўгирмаганлар нақадар бахтлидир!
7 Яҳёнинг шогирдлари кетаётганларида, Исо оломонга Яҳё ҳақида гапира бошлади: “Саҳрога нимани кўргани бордингизлар? Шамолда ҳилпираб турган қамишними? 8 Хўш, нимани кўргани бордингизлар? Башанг кийинган одамними? Башанг кийинганлар шоҳ саройида бўлади–ку! 9 Ундай бўлса, нимани кўргани бордингизлар? Пайғамбарними? Ҳа, сизларга шуни айтай: сизлар пайғамбардан ҳам улуғини кўрдингизлар! 10 У ҳақда шундай ёзилган:
«Мана, Сендан олдин Мен Ўз элчимни юборяпман,
У Сен учун йўлни ҳозирлайди.»
11 Сизларга чинини айтай: бутун инсон зоти орасида Яҳё чўмдирувчидан улуғи йўқ. Аммо Осмон Шоҳлигида энг кичик ҳисобланган одам ҳам ундан улуғроқдир. 12 Яҳё чўмдирувчи давридан шу кунгача одамлар Осмон Шоҳлигига шафқатсиз ҳужум қилмоқдалар. Зўравонлар Осмон Шоҳлигини қўлга киритишга ҳаракат қилмоқдалар. 13 Яҳё чўмдирувчидан олдин ўтган ҳамма пайғамбарларнинг битикларида ва Таврот китобида Осмон Шоҳлиги ҳақида башорат қилинган. 14 Агар бу башоратларга ишонишни истасангизлар, Яҳё — келиши башорат қилинган Илёсдир . 15 Кимнинг эшитар қулоғи бўлса, эшитсин!
16 Бу наслни кимга қиёсласам бўлади? Улар болаларга ўхшайдилар, майдонда ўтириб олиб, шундай дея бир–бирларига бақирадилар:
17 «Сизлар учун най чалдик, аммо рақсга тушмадингиз,
Биз оҳ–воҳ қилдик, аммо сизлар қайғурмадингиз.»
18 Яҳё келганда, у на еди, на ичди, шунинг учун ҳамма: «Уни жин урибди», дейдилар. 19 Инсон Ўғли келганда эса ҳам еди, ҳам ичди. Аммо Уни: «Ебтўймас, шаробхўр, солиқчилар ва гуноҳкорларнинг дўсти», дейдилар. Лекин билиб қўйинглар: донолик тўғри эканлиги ўз натижасидан аён .”
Гуноҳкор шаҳарларнинг ҳолига вой
20 Исо баъзи шаҳарларда кўп мўъжизалар кўрсатганди, аммо халқ ўз гуноҳлари учун тавба қилмади. Исо ўша шаҳарлар аҳолисига таъна қилди: 21 “Сенинг ҳолингга вой, эй Хоразин! Сенинг ҳолингга вой, эй Байтсайда! Агар сизларда қилинган мўъжизалар Тир билан Сидон шаҳарларида қилинганда эди, улар аллақачон қанорга ўраниб, бошларига кул сочиб , тавба қилган бўлардилар. 22 Бироқ сизларга айтайин: қиёмат кунида сизнинг ҳолингиз Тир ва Сидоннинг ҳолидан баттар бўлади. 23 Эй Кафарнаҳум! Худо сени кўкларга кўтаради деб ўйлайсанми?! Йўқ, У сени тубсиз чуқурликка улоқтиради! Агар сенда юз берган мўъжизалар Садўмда бўлганда эди, у шаҳар шу кунгача сақланиб қолган бўлар эди. 24 Бироқ сенга айтайин: қиёмат кунида сенинг ҳолинг Садўм шаҳрининг ҳолидан баттар бўлади.”
Ҳолдан тойганларга ором ваъдаси
25 Ўша вақтда Исо яна шундай деди: “Эй Ота, еру осмоннинг Эгаси! Сен бу ишларни донолару идроклилардан яшириб, гўдакларга маълум этганинг учун Сенга шукурлар айтаман. 26 Ҳа, Ота, бу Сенинг эзгу хоҳишинг эди.
27 Отам ҳамма нарсани Менинг ихтиёримга топширган. Ўғилни Отадан бошқа ҳеч ким билмайди. Отани ҳам Ўғилдан бошқа ва Ўғил аён қилишни истаган одамдан бошқа ҳеч ким билмайди.
28 Эй ҳолдан тойганлар, оғир юк остида қолганлар, ҳаммаларингиз Менинг олдимга келинглар! Мен сизларга ором бераман. 29 Менинг бўйинтуруғимни тақиб олинглар, Мендан ўрганинглар. Чунки Мен юмшоқ кўнгил ва камтаринман. Шунда сизларнинг жонларингиз ором топади. 30 Ахир, Менинг бўйинтуруғим қулай, юким енгилдир.”
