24–BOB
Moychiroqlar
1 Egamiz Muso orqali 2 Isroil xalqiga quyidagi amrlarni berdi: toza zaytun moyidan olib kelinglar. Toki moychiroqlar har doim tun boʻyi yonib tursin. 3 Horun moychiroqlarni Uchrashuv chodiriga, Ahd sandigʻini toʻsib turgan ichki parda oldiga oʻrnatsin. Moychiroqlar Egamizning huzurida oqshomdan ertalabgacha oʻchmay yonib tursin. Bu avlodlaringiz osha doimiy qonun–qoida boʻlsin. 4 Horun moychiroqlarni toza oltindan yasalgan chiroqpoyaga oʻrnatsin. Moychiroqlar Egamizning huzurida doimo tun boʻyi yonib tursin.
Xudoga nazr qilinadigan nonlar
5 Sifatli undan oʻn ikkita non yop. Har bir non sakkiz kosa undan yopilgan boʻlsin. 6 Nonlarni Egamiz huzuridagi toza oltindan yasalgan xontaxta ustiga ikki qator qilib ter. Har bir qatorda oltitadan non boʻlsin. 7 Har bir qatorga toza xushboʻy tutatqidan qoʻy. Bu xushboʻy tutatqi nonning oʻrniga olovda kuydirilib, Egamizga nazr qilinadi. 8 Horun nonlarni doimiy tarzda, har Shabbat kuni Isroil xalqi nomidan Egamiz oldiga qoʻysin. Bu Isroil xalqining abadiy majburiyatidir. 9 Bu nonlar Horun va uning avlodiniki boʻlsin. Ular bu nonlarni muqaddas joyda tanovul qilishsin . Egamizga atab, olovda kuydiriladigan nazrlardan Horunning nasliga berilgan doimiy ulush shudir, u gʻoyat muqaddasdir.
Toʻgʻri va adolatli hukmning misoli
10-11 Dan qabilasidan boʻlgan Dibri qizi Shalumit Misrlik bir kishiga turmushga chiqqan edi. Ularning bir oʻgʻli bor edi. Bir kuni oʻsha oʻgʻli Isroil xalqidan boʻlgan bir odam bilan janjallashib qoldi. Janjal paytida Shalumitning oʻgʻli qargʻanib, Xudoga shak keltirdi. Shunda uni Musoning oldiga olib kelishdi. 12 Egamizning hukmi maʼlum boʻlgunga qadar uni qamab qoʻyishdi.
13 Egamiz Musoga dedi: 14 “Shakkokni qarorgohning tashqarisiga olib chiqinglar. Shak keltirganini eshitganlarning hammasi qoʻlini uning boshiga qoʻysin, keyin butun jamoa uni toshboʻron qilsin. 15 Isroil xalqiga shu gapimni aytib qoʻy: «Meni qargʻagan har qanday odam jazoga tortilsin. 16 Men, Egangizga shak keltirgan odamning jazosi oʻlimdir. Butun jamoa uni toshboʻron qilsin. Oʻsha shakkok kim boʻlishidan qatʼi nazar, musofir boʻladimi yoki Isroil xalqidanmi, oʻldirilsin.
17 Odamning joniga qasd qilgan har qanday odam oʻldirilsin. 18 Birovning molini oʻldirib qoʻygan odam egasiga tovon toʻlasin. Bunday vaziyatda jon evaziga jon degan qoida qoʻllanilsin. 19 Agar kimdir birovga shikast yetkazsa, unga ham xuddi shunday shikast yetkazilsin. 20 Siniq evaziga siniq, koʻz evaziga koʻz, tish evaziga tish bilan javob qaytarilsin. Shikast yetkazganga xuddi shunday shikast yetkazilsin. 21 Jonivorni oʻldirgan tovon toʻlasin, odamni oʻldirgan esa oʻlim jazosini olsin. 22 Musofir uchun ham, Isroillik uchun ham qonun birdir. Men Egangiz Xudoman.»”
23 Muso bu soʻzlarni Isroil xalqiga aytib boʻlgach, xalq shakkokni qarorgoh tashqarisiga olib chiqib, toshboʻron qildi. Shunday qilib, Isroil xalqi Egamizning Musoga bergan amrini ado etdi.
24–БОБ
Мойчироқлар
1 Эгамиз Мусо орқали 2 Исроил халқига қуйидаги амрларни берди: тоза зайтун мойидан олиб келинглар. Токи мойчироқлар ҳар доим тун бўйи ёниб турсин. 3 Ҳорун мойчироқларни Учрашув чодирига, Аҳд сандиғини тўсиб турган ички парда олдига ўрнатсин. Мойчироқлар Эгамизнинг ҳузурида оқшомдан эрталабгача ўчмай ёниб турсин. Бу авлодларингиз оша доимий қонун–қоида бўлсин. 4 Ҳорун мойчироқларни тоза олтиндан ясалган чироқпояга ўрнатсин. Мойчироқлар Эгамизнинг ҳузурида доимо тун бўйи ёниб турсин.
Худога назр қилинадиган нонлар
5 Сифатли ундан ўн иккита нон ёп. Ҳар бир нон саккиз коса ундан ёпилган бўлсин. 6 Нонларни Эгамиз ҳузуридаги тоза олтиндан ясалган хонтахта устига икки қатор қилиб тер. Ҳар бир қаторда олтитадан нон бўлсин. 7 Ҳар бир қаторга тоза хушбўй тутатқидан қўй. Бу хушбўй тутатқи ноннинг ўрнига оловда куйдирилиб, Эгамизга назр қилинади. 8 Ҳорун нонларни доимий тарзда, ҳар Шаббат куни Исроил халқи номидан Эгамиз олдига қўйсин. Бу Исроил халқининг абадий мажбуриятидир. 9 Бу нонлар Ҳорун ва унинг авлодиники бўлсин. Улар бу нонларни муқаддас жойда тановул қилишсин . Эгамизга атаб, оловда куйдириладиган назрлардан Ҳоруннинг наслига берилган доимий улуш шудир, у ғоят муқаддасдир.
Тўғри ва адолатли ҳукмнинг мисоли
10-11 Дан қабиласидан бўлган Дибри қизи Шалумит Мисрлик бир кишига турмушга чиққан эди. Уларнинг бир ўғли бор эди. Бир куни ўша ўғли Исроил халқидан бўлган бир одам билан жанжаллашиб қолди. Жанжал пайтида Шалумитнинг ўғли қарғаниб, Худога шак келтирди. Шунда уни Мусонинг олдига олиб келишди. 12 Эгамизнинг ҳукми маълум бўлгунга қадар уни қамаб қўйишди.
13 Эгамиз Мусога деди: 14 “Шаккокни қароргоҳнинг ташқарисига олиб чиқинглар. Шак келтирганини эшитганларнинг ҳаммаси қўлини унинг бошига қўйсин, кейин бутун жамоа уни тошбўрон қилсин. 15 Исроил халқига шу гапимни айтиб қўй: «Мени қарғаган ҳар қандай одам жазога тортилсин. 16 Мен, Эгангизга шак келтирган одамнинг жазоси ўлимдир. Бутун жамоа уни тошбўрон қилсин. Ўша шаккок ким бўлишидан қатъи назар, мусофир бўладими ёки Исроил халқиданми, ўлдирилсин.
17 Одамнинг жонига қасд қилган ҳар қандай одам ўлдирилсин. 18 Бировнинг молини ўлдириб қўйган одам эгасига товон тўласин. Бундай вазиятда жон эвазига жон деган қоида қўлланилсин. 19 Агар кимдир бировга шикаст етказса, унга ҳам худди шундай шикаст етказилсин. 20 Синиқ эвазига синиқ, кўз эвазига кўз, тиш эвазига тиш билан жавоб қайтарилсин. Шикаст етказганга худди шундай шикаст етказилсин. 21 Жониворни ўлдирган товон тўласин, одамни ўлдирган эса ўлим жазосини олсин. 22 Мусофир учун ҳам, Исроиллик учун ҳам қонун бирдир. Мен Эгангиз Худоман.»”
23 Мусо бу сўзларни Исроил халқига айтиб бўлгач, халқ шаккокни қароргоҳ ташқарисига олиб чиқиб, тошбўрон қилди. Шундай қилиб, Исроил халқи Эгамизнинг Мусога берган амрини адо этди.
