22–BOB
Nazrlarning muqaddasligi
1 Egamiz Muso orqali 2 Horun va uning oʻgʻillariga shunday dedi: “Sizlar Isroil xalqining Menga bagʻishlagan ehsonlari bilan ehtiyotkor boʻlinglar, tagʻin Men, Muqaddas Xudoni badnom qilib qoʻymanglar. Men Egangizman. 3 Agar naslingizdan birontasi harom boʻla turib, Isroil xalqi Menga bagʻishlagan ehsonlarga yaqinlashsa, u Mening huzurimda boshqa xizmat qilmaydigan boʻlsin. Men Egangizman. 4 Horunning naslidan teri kasalligiga chalingan yoki ajralmasi oqqan birortasi poklanmaguncha ehsondan tanovul qilmasin. Bordi–yu, ruhoniylardan birortasi murda dastidan bulgʻangan narsaga tegsa yoki jinsiy aʼzosidan maniy oqsa, 5 yoxud oʻrmalab yuradigan harom jonivorga yo harom boʻlgan odamga tegsa, oʻzi harom boʻlgan hisoblanadi. U tekkan odam qanday yoʻl bilan harom boʻlganidan qatʼi nazar, 6 ruhoniy kechgacha harom boʻladi. Ruhoniy badanini yuvmaguncha ehsondan tanovul qilmasin. 7 Quyosh botgandan keyin u pok boʻladi. Ana shundagina u ehsonlardan tanovul qila oladi, chunki bu ehsonlar uning taomidir. 8 Harom oʻlgan yoki yovvoyi hayvon gʻajigan jonivorning goʻshtini ruhoniy yemasin. Aks holda, u oʻzini oʻzi harom qiladi. Men Egangizman. 9 Ruhoniylar talablarimni bajarishsin. Aks holda, talablarimga rioya qilmaganlari uchun gunohlarining jazosini olib, nobud boʻladilar. Ularni muqaddas qiladigan Egangiz Menman.
10 Ruhoniy xonadoniga mansub boʻlgan kishilargina ehsonlardan tanovul qilishlari mumkin. Ruhoniynikida turgan musofir yoki mardikor ehsonlardan tanovul qilmasin. 11 Lekin ruhoniy oʻz kumushiga sotib olgan yoki uning xonadonida tugʻilgan qulu choʻrilar bu nazrlardan tanovul qilishlari mumkin. 12 Agar ruhoniyning qizi ruhoniylar qavmiga mansub boʻlmagan odamga turmushga chiqsa, ehsonlardan tanovul qilish unga man etilsin. 13 Bordi–yu, ruhoniyning bu qizi farzand koʻrmay beva boʻlib qolsa yoki eridan ajralsa, otasining xonadoniga qaytib kelgandan keyin, qizlik davridagiday otasining taomidan tanovul qilishi mumkin. Ammo ruhoniylar qavmiga mansub boʻlmagan odam ruhoniyning taomidan tanovul qilmasin. 14 Agar biror odam bilmagan holda ehsondan yeb qoʻysa, u ruhoniyga keltirgan zararni toʻlab, ustiga beshdan bir qismini qoʻshib bersin. 15 Ruhoniylar Isroil xalqining Menga keltirgan ehsonlarini bulgʻashmasin. 16 Ularni boshqalarning tanovul qilishiga yoʻl qoʻyishmasin. Aks holda, ruhoniylar Isroil xalqini aybdor qilib qoʻyishadi, xalq ayb qurbonligi keltirishi kerak boʻladi. Ehsonni muqaddas qiladigan Egangiz Menman.”
17 Egamiz Muso orqali 18 Horunga, uning oʻgʻillariga va butun Isroil xalqiga quyidagi qoidalarni berdi: Isroil xalqidan yoki orangizda yashayotgan musofirlardan birortasi bergan vaʼdasi ustidan chiqmoqchi boʻlib yoki koʻngildan chiqarib, Egamizga kuydiriladigan qurbonlik keltirmoqchi boʻlsa 19 nuqsonsiz buqa, qoʻchqor yoki takani olib kelsin. Shunda qurbonligi qabul boʻladi. 20 Nuqsoni bor jonivorni olib kelmang, bunday qurbonligingiz qabul boʻlmaydi.
21 Agar birortasi bergan vaʼdasi ustidan chiqish uchun yoki koʻngildan chiqarib, Egamizga tinchlik qurbonligini keltirmoqchi boʻlsa, podasi yoki suruvidan nuqsonsiz jonivorni tanlab olsin. Qurbonligi qabul boʻlishi uchun jonivor bekami–koʻst boʻlsin. 22 Koʻr, jarohatlangan, mayib, yarasidan yiring oqqan, qoʻtir yoki qichimasi bor jonivorni Egamizga keltirmang, uni olovda kuydiriladigan nazr sifatida qurbongoh ustida kuydirmang. 23 Bir tuyogʻi kalta yoki uzun boʻlgan buzoqni yoki qoʻzichoqni koʻngildan chiqarib beradigan qurbonlik sifatida keltirishingiz mumkin. Lekin bunday jonivorni bergan vaʼdangiz ustidan chiqish uchun olib kelmang, u qabul boʻlmaydi. 24 Moyagi koʻkargan, ezilgan, uzilgan yoki kesib olingan jonivorni Egamizga keltirmang. Yurtingizda bunga yoʻl qoʻymang. 25 Xudoyingizga qurbonlik keltirmoqchi boʻlgan musofirdan ham mayib jonivorni qabul qilmang. Bunday jonivor nuqsonli boʻlgani uchun qabul boʻlmaydi.
26 Egamiz Musoga yana dedi: 27 “Yangi tugʻilgan buzoq, qoʻzichoq yoki uloqcha yetti kun onasining yonida boʻlsin. Yettinchi kundan keyin uni olovda kuydirib, Menga nazr qilishingiz mumkin. 28 Lekin podangizdagi yoki suruvingizdagi ona va bolani bir kunda soʻymang. 29 Menga shukrona qurbonligini keltirmoqchi boʻlganingizda qoidalarga rioya qilgan holda keltiring, toki qurbonligingiz qabul boʻlsin. 30 Qurbonlikning goʻshtini oʻsha kuniyoq tanovul qiling. Undan ertalabgacha hech narsa qoldirmang. Men Egangizman.
31 Amrlarimni bitta qoldirmay bajaring. Men Egangizman. 32 Men, Muqaddas Xudoni badnom qilmang. Butun Isroil xalqi Meni muqaddas deb bilsin. Men sizlarni muqaddas qiladigan Egangizman. 33 Xudoyingiz boʻlish uchun sizlarni Misr yurtidan olib chiqqanman. Men Egangizman.”
22–БОБ
Назрларнинг муқаддаслиги
1 Эгамиз Мусо орқали 2 Ҳорун ва унинг ўғилларига шундай деди: “Сизлар Исроил халқининг Менга бағишлаган эҳсонлари билан эҳтиёткор бўлинглар, тағин Мен, Муқаддас Худони бадном қилиб қўйманглар. Мен Эгангизман. 3 Агар наслингиздан биронтаси ҳаром бўла туриб, Исроил халқи Менга бағишлаган эҳсонларга яқинлашса, у Менинг ҳузуримда бошқа хизмат қилмайдиган бўлсин. Мен Эгангизман. 4 Ҳоруннинг наслидан тери касаллигига чалинган ёки ажралмаси оққан бирортаси покланмагунча эҳсондан тановул қилмасин. Борди–ю, руҳонийлардан бирортаси мурда дастидан булғанган нарсага тегса ёки жинсий аъзосидан маний оқса, 5 ёхуд ўрмалаб юрадиган ҳаром жониворга ё ҳаром бўлган одамга тегса, ўзи ҳаром бўлган ҳисобланади. У теккан одам қандай йўл билан ҳаром бўлганидан қатъи назар, 6 руҳоний кечгача ҳаром бўлади. Руҳоний баданини ювмагунча эҳсондан тановул қилмасин. 7 Қуёш ботгандан кейин у пок бўлади. Ана шундагина у эҳсонлардан тановул қила олади, чунки бу эҳсонлар унинг таомидир. 8 Ҳаром ўлган ёки ёввойи ҳайвон ғажиган жониворнинг гўштини руҳоний емасин. Акс ҳолда, у ўзини ўзи ҳаром қилади. Мен Эгангизман. 9 Руҳонийлар талабларимни бажаришсин. Акс ҳолда, талабларимга риоя қилмаганлари учун гуноҳларининг жазосини олиб, нобуд бўладилар. Уларни муқаддас қиладиган Эгангиз Менман.
10 Руҳоний хонадонига мансуб бўлган кишиларгина эҳсонлардан тановул қилишлари мумкин. Руҳонийникида турган мусофир ёки мардикор эҳсонлардан тановул қилмасин. 11 Лекин руҳоний ўз кумушига сотиб олган ёки унинг хонадонида туғилган қулу чўрилар бу назрлардан тановул қилишлари мумкин. 12 Агар руҳонийнинг қизи руҳонийлар қавмига мансуб бўлмаган одамга турмушга чиқса, эҳсонлардан тановул қилиш унга ман этилсин. 13 Борди–ю, руҳонийнинг бу қизи фарзанд кўрмай бева бўлиб қолса ёки эридан ажралса, отасининг хонадонига қайтиб келгандан кейин, қизлик давридагидай отасининг таомидан тановул қилиши мумкин. Аммо руҳонийлар қавмига мансуб бўлмаган одам руҳонийнинг таомидан тановул қилмасин. 14 Агар бирор одам билмаган ҳолда эҳсондан еб қўйса, у руҳонийга келтирган зарарни тўлаб, устига бешдан бир қисмини қўшиб берсин. 15 Руҳонийлар Исроил халқининг Менга келтирган эҳсонларини булғашмасин. 16 Уларни бошқаларнинг тановул қилишига йўл қўйишмасин. Акс ҳолда, руҳонийлар Исроил халқини айбдор қилиб қўйишади, халқ айб қурбонлиги келтириши керак бўлади. Эҳсонни муқаддас қиладиган Эгангиз Менман.”
17 Эгамиз Мусо орқали 18 Ҳорунга, унинг ўғилларига ва бутун Исроил халқига қуйидаги қоидаларни берди: Исроил халқидан ёки орангизда яшаётган мусофирлардан бирортаси берган ваъдаси устидан чиқмоқчи бўлиб ёки кўнгилдан чиқариб, Эгамизга куйдириладиган қурбонлик келтирмоқчи бўлса 19 нуқсонсиз буқа, қўчқор ёки такани олиб келсин. Шунда қурбонлиги қабул бўлади. 20 Нуқсони бор жониворни олиб келманг, бундай қурбонлигингиз қабул бўлмайди.
21 Агар бирортаси берган ваъдаси устидан чиқиш учун ёки кўнгилдан чиқариб, Эгамизга тинчлик қурбонлигини келтирмоқчи бўлса, подаси ёки сурувидан нуқсонсиз жониворни танлаб олсин. Қурбонлиги қабул бўлиши учун жонивор беками–кўст бўлсин. 22 Кўр, жароҳатланган, майиб, ярасидан йиринг оққан, қўтир ёки қичимаси бор жониворни Эгамизга келтирманг, уни оловда куйдириладиган назр сифатида қурбонгоҳ устида куйдирманг. 23 Бир туёғи калта ёки узун бўлган бузоқни ёки қўзичоқни кўнгилдан чиқариб берадиган қурбонлик сифатида келтиришингиз мумкин. Лекин бундай жониворни берган ваъдангиз устидан чиқиш учун олиб келманг, у қабул бўлмайди. 24 Мояги кўкарган, эзилган, узилган ёки кесиб олинган жониворни Эгамизга келтирманг. Юртингизда бунга йўл қўйманг. 25 Худойингизга қурбонлик келтирмоқчи бўлган мусофирдан ҳам майиб жониворни қабул қилманг. Бундай жонивор нуқсонли бўлгани учун қабул бўлмайди.
26 Эгамиз Мусога яна деди: 27 “Янги туғилган бузоқ, қўзичоқ ёки улоқча етти кун онасининг ёнида бўлсин. Еттинчи кундан кейин уни оловда куйдириб, Менга назр қилишингиз мумкин. 28 Лекин подангиздаги ёки сурувингиздаги она ва болани бир кунда сўйманг. 29 Менга шукрона қурбонлигини келтирмоқчи бўлганингизда қоидаларга риоя қилган ҳолда келтиринг, токи қурбонлигингиз қабул бўлсин. 30 Қурбонликнинг гўштини ўша куниёқ тановул қилинг. Ундан эрталабгача ҳеч нарса қолдирманг. Мен Эгангизман.
31 Амрларимни битта қолдирмай бажаринг. Мен Эгангизман. 32 Мен, Муқаддас Худони бадном қилманг. Бутун Исроил халқи Мени муқаддас деб билсин. Мен сизларни муқаддас қиладиган Эгангизман. 33 Худойингиз бўлиш учун сизларни Миср юртидан олиб чиққанман. Мен Эгангизман.”
