13–BOB
Isroil xalqi hali bosib olmagan yerlar
1 Yillar oʻtib, Yoshua ancha keksayib qolgan paytda, Egamiz unga shunday dedi: “Sen qariding, yoshing ham oʻtib qoldi, lekin Men sizlarga bergan yurtning koʻp joylari hali bosib olinmagan. 2 Isroil xalqi hali quyidagi yerlarni egallamagan: butun Filist va Geshir xalqining yerlari, 3 yaʼni Misrning sharqiy chegarasidagi Shixor irmogʻidan shimoldagi Exron chegaralarigacha boʻlgan yerlar. Hozir bu yerlar Kanʼon xalqiga tegishli. U yerlarda Filist xalqining beshta hukmdori yashaydi. Ular quyidagi shaharlarda hukmronlik qiladi: Gʻazo, Ashdod, Ashqalon, Gat va Exron. Janubdagi Avim xalqining yerlari ham hali bosib olinmagan. 4 Shimolda esa Isroil xalqi hali Kanʼon xalqining barcha yerlarini bosib olmagan. Bu yerlar Sidon xalqiga tegishli boʻlgan Merax shahrini oʻz ichiga olib, shimol tomonga, Amor xalqi yerlarining chegarasidagi Ofoq degan joygacha choʻziladi. 5 Isroil xalqi yana Gabolliklarning yerlarini, Lubnon togʻli yerlarining sharq tomonini — Xermon togʻining etagidagi Baal–Gaddan Levo–Xomatgacha boʻlgan joylarni qoʻlga kiritmagan. 6 Ular Lubnondan Misrafoʻt–Mayimgacha boʻlgan qirlarning aholisini — barcha Sidonliklarni ham hali magʻlub qilmagan. Men Oʻzim mana shu xalqlarni bu yurtdan, Isroil xalqining oldidan haydayman. Men senga buyurganimday, mana shu yerlarni albatta Isroil xalqiga mulk qilib bergin. 7 Xullas, mana shu yerlarni qolgan toʻqqizta qabilaga va Manashe qabilasining yarmiga mulk qilib boʻlib bergin.”
Iordan daryosining sharqidagi yerlar
8 Ruben, Gad qabilalari va Manashe qabilasining boshqa yarmi Iordan daryosining sharqida oʻz ulushlarini olib boʻlgan edilar. Ularga bu yerlarni Egamizning quli Muso bergan edi. 9 Ularning hududi janubdagi Arnon soyligining chetida joylashgan Aror shahridan tortib, soylikdagi shahargacha choʻzilib, Midavodan Dibongacha boʻlgan butun yassi tepalikni oʻz ichiga oladi. 10 Bu hudud Xashbon shahrida hukmronlik qilgan Amor xalqining shohi Sixoʻn qoʻli ostida boʻlgan hamma shaharlarni, Ommon xalqining chegarasigacha boʻlgan yerlarni oʻz ichiga olardi. 11-12 Bulardan tashqari, Gashur va Maxo xalqlarining yerlari, shuningdek, shoh Oʻgning butun shohligi, chunonchi, Gilad oʻlkasi, shimoldagi butun Xermon togʻi va sharqdagi Salkogacha boʻlgan butun Bashan oʻsha hududga kirar edi. Shoh Oʻg Rafa xalqining eng oxirgi avlodi boʻlib, Bashan oʻlkasining Ashtaroʻt va Edrey shaharlarida hukmronlik qilgan edi. Muso oʻsha yerlarni bosib olib, xalqlarini haydab chiqargan edi. 13 Lekin Isroil xalqi Gashur va Maxo xalqlarini haydab chiqarmadi, ular bugungacha Isroil xalqi orasida yashaydilar.
14 Faqatgina Levi qabilasiga Muso ulush qilib yer bermadi. Egamiz aytganday, qurbongohda Isroil xalqining Xudosi — Egamizga atab kuydiriladigan qurbonliklar Levi qabilasining ulushidir .
Ruben qabilasining hududi
15 Muso Ruben qabilasiga urugʻlari boʻyicha ulush bergan edi. 16 Ularning hududi janubdagi Arnon soyligining chetida joylashgan Aror shahridan tortib, soylikdagi shahargacha choʻzilib, Midavo atrofidagi butun yassi tepalikni oʻz ichiga olardi. 17 Mana shu hudud Xashbon shahrini va yassi tepalikda joylashgan quyidagi hamma shaharlarni oʻz ichiga olar edi: Dibon, Bomoʻt–Baal va Bayt–Baal–Miyon, 18 Yaxaz, Kadamoʻt, Mifat, 19 Xiratayim, Sivmo va Iordan vodiysida joylashgan qirning ustidagi Zaret–Xashaxar, 20 Bayt–Piyor, Fisgax togʻ tizmasining yon bagʻirlari, Bayt–Yashimoʻt shaharlari. 21 Ruben qabilasining yerlari yassi tepalik ustidagi barcha shaharlar, Xashbonda hukmronlik qilgan Amor xalqining shohi Sixoʻnning butun shohligini oʻz ichiga olardi. Muso Sixoʻnni va u bilan ittifoq tuzgan Midiyon hukmdorlarini magʻlub qilgandi. Ularning ismlari Evi, Rahem, Zur, Xur va Raba edi. 22 Isroil xalqi yana Bavoʻr oʻgʻli Balomni ham qilichdan oʻtkazgan edi. U folbinlik bilan shugʻullanar edi. 23 Ruben qabilasi hududining gʻarbiy chegarasi Iordan daryosi va uning qirgʻoqlari edi. Mana shu yerlar Ruben qabilasiga mulk qilib berilgan edi.
Gad qabilasining hududi
24 Muso Gad qabilasiga ham urugʻlari boʻyicha ulush berdi. 25 Yazir shahri, Gilad oʻlkasidagi hamma shaharlar, Rabba shahrining sharqidagi Aror shahrigacha boʻlgan Ommonlar yerining yarmi ularning hududiga kirar edi. 26 Ularning yeri yana janubdagi Xashbon shahridan shimol tomondagi Ramat–Mispi va Batonim shaharlarigacha, shuningdek, shimoldagi Moxanayimdan Debirgacha choʻzilgan edi. 27 Gad qabilasining yeri Iordan vodiysida Bayt–Xaram, Bayt–Nimro, Suxot, Zofun shaharlarini hamda Xashbon hukmdori boʻlgan Sixoʻn shohining qolgan shohligini ham oʻz ichiga olar edi. Bu hududning gʻarbiy chegarasi Iordan daryosi boʻlib, shimoldagi Jalila koʻligacha choʻzilgan edi. 28 Mana shu hududdagi shaharlar va atroflaridagi qishloqlar Gad qabilasiga mulk qilib berilgan edi.
Iordan sharqidagi Manashe qabilasining yarmiga berilgan yerlar
29 Muso Manashe qabilasining yarmiga ham urugʻlari boʻyicha ulush bergan edi. 30 Ularning hududi Moxanayim shahridan shimolga choʻzilib, butun Bashan oʻlkasini va Yovir bosib olgan oltmishta shaharni oʻz ichiga olar edi. Bashan shohi Oʻg mana shu joylarda hukmronlik qilgan edi. 31 Gilad oʻlkasining yarmi, Bashandagi Oʻg shohligining poytaxt shaharlari Ashtaroʻt va Edrey ham ularning hududiga kirar edi. Bu yerlar Manashe oʻgʻli Moxirdan kelib chiqqan naslning yarmiga berilgan edi.
32 Iordanning sharqida, Moʻab tekisligida, Yerixoning roʻparasida Muso boʻlib bergan ulushlar mana shulardir. 33 Lekin Levi qabilasiga Muso ulush qilib yer bermagan edi. Isroil xalqining Xudosi — Egamiz ularga: “Men Oʻzim sizlarning ulushingiz boʻlaman”, deb vaʼda bergan edi .
13–БОБ
Исроил халқи ҳали босиб олмаган ерлар
1 Йиллар ўтиб, Ёшуа анча кексайиб қолган пайтда, Эгамиз унга шундай деди: “Сен қаридинг, ёшинг ҳам ўтиб қолди, лекин Мен сизларга берган юртнинг кўп жойлари ҳали босиб олинмаган. 2 Исроил халқи ҳали қуйидаги ерларни эгалламаган: бутун Филист ва Гешир халқининг ерлари, 3 яъни Мисрнинг шарқий чегарасидаги Шихор ирмоғидан шимолдаги Эхрон чегараларигача бўлган ерлар. Ҳозир бу ерлар Канъон халқига тегишли. У ерларда Филист халқининг бешта ҳукмдори яшайди. Улар қуйидаги шаҳарларда ҳукмронлик қилади: Ғазо, Ашдод, Ашқалон, Гат ва Эхрон. Жанубдаги Авим халқининг ерлари ҳам ҳали босиб олинмаган. 4 Шимолда эса Исроил халқи ҳали Канъон халқининг барча ерларини босиб олмаган. Бу ерлар Сидон халқига тегишли бўлган Мерах шаҳрини ўз ичига олиб, шимол томонга, Амор халқи ерларининг чегарасидаги Офоқ деган жойгача чўзилади. 5 Исроил халқи яна Габолликларнинг ерларини, Лубнон тоғли ерларининг шарқ томонини — Хермон тоғининг этагидаги Баал–Гаддан Лево–Хоматгача бўлган жойларни қўлга киритмаган. 6 Улар Лубнондан Мисрафўт–Майимгача бўлган қирларнинг аҳолисини — барча Сидонликларни ҳам ҳали мағлуб қилмаган. Мен Ўзим мана шу халқларни бу юртдан, Исроил халқининг олдидан ҳайдайман. Мен сенга буюрганимдай, мана шу ерларни албатта Исроил халқига мулк қилиб бергин. 7 Хуллас, мана шу ерларни қолган тўққизта қабилага ва Манаше қабиласининг ярмига мулк қилиб бўлиб бергин.”
Иордан дарёсининг шарқидаги ерлар
8 Рубен, Гад қабилалари ва Манаше қабиласининг бошқа ярми Иордан дарёсининг шарқида ўз улушларини олиб бўлган эдилар. Уларга бу ерларни Эгамизнинг қули Мусо берган эди. 9 Уларнинг ҳудуди жанубдаги Арнон сойлигининг четида жойлашган Арор шаҳридан тортиб, сойликдаги шаҳаргача чўзилиб, Мидаводан Дибонгача бўлган бутун ясси тепаликни ўз ичига олади. 10 Бу ҳудуд Хашбон шаҳрида ҳукмронлик қилган Амор халқининг шоҳи Сихўн қўли остида бўлган ҳамма шаҳарларни, Оммон халқининг чегарасигача бўлган ерларни ўз ичига оларди. 11-12 Булардан ташқари, Гашур ва Махо халқларининг ерлари, шунингдек, шоҳ Ўгнинг бутун шоҳлиги, чунончи, Гилад ўлкаси, шимолдаги бутун Хермон тоғи ва шарқдаги Салкогача бўлган бутун Башан ўша ҳудудга кирар эди. Шоҳ Ўг Рафа халқининг энг охирги авлоди бўлиб, Башан ўлкасининг Аштарўт ва Эдрей шаҳарларида ҳукмронлик қилган эди. Мусо ўша ерларни босиб олиб, халқларини ҳайдаб чиқарган эди. 13 Лекин Исроил халқи Гашур ва Махо халқларини ҳайдаб чиқармади, улар бугунгача Исроил халқи орасида яшайдилар.
14 Фақатгина Леви қабиласига Мусо улуш қилиб ер бермади. Эгамиз айтгандай, қурбонгоҳда Исроил халқининг Худоси — Эгамизга атаб куйдириладиган қурбонликлар Леви қабиласининг улушидир .
Рубен қабиласининг ҳудуди
15 Мусо Рубен қабиласига уруғлари бўйича улуш берган эди. 16 Уларнинг ҳудуди жанубдаги Арнон сойлигининг четида жойлашган Арор шаҳридан тортиб, сойликдаги шаҳаргача чўзилиб, Мидаво атрофидаги бутун ясси тепаликни ўз ичига оларди. 17 Мана шу ҳудуд Хашбон шаҳрини ва ясси тепаликда жойлашган қуйидаги ҳамма шаҳарларни ўз ичига олар эди: Дибон, Бомўт–Баал ва Байт–Баал–Миён, 18 Яхаз, Кадамўт, Мифат, 19 Хиратайим, Сивмо ва Иордан водийсида жойлашган қирнинг устидаги Зарет–Хашахар, 20 Байт–Пиёр, Фисгах тоғ тизмасининг ён бағирлари, Байт–Яшимўт шаҳарлари. 21 Рубен қабиласининг ерлари ясси тепалик устидаги барча шаҳарлар, Хашбонда ҳукмронлик қилган Амор халқининг шоҳи Сихўннинг бутун шоҳлигини ўз ичига оларди. Мусо Сихўнни ва у билан иттифоқ тузган Мидиён ҳукмдорларини мағлуб қилганди. Уларнинг исмлари Эви, Раҳем, Зур, Хур ва Раба эди. 22 Исроил халқи яна Бавўр ўғли Баломни ҳам қиличдан ўтказган эди. У фолбинлик билан шуғулланар эди. 23 Рубен қабиласи ҳудудининг ғарбий чегараси Иордан дарёси ва унинг қирғоқлари эди. Мана шу ерлар Рубен қабиласига мулк қилиб берилган эди.
Гад қабиласининг ҳудуди
24 Мусо Гад қабиласига ҳам уруғлари бўйича улуш берди. 25 Язир шаҳри, Гилад ўлкасидаги ҳамма шаҳарлар, Рабба шаҳрининг шарқидаги Арор шаҳригача бўлган Оммонлар ерининг ярми уларнинг ҳудудига кирар эди. 26 Уларнинг ери яна жанубдаги Хашбон шаҳридан шимол томондаги Рамат–Миспи ва Батоним шаҳарларигача, шунингдек, шимолдаги Моханайимдан Дебиргача чўзилган эди. 27 Гад қабиласининг ери Иордан водийсида Байт–Харам, Байт–Нимро, Сухот, Зофун шаҳарларини ҳамда Хашбон ҳукмдори бўлган Сихўн шоҳининг қолган шоҳлигини ҳам ўз ичига олар эди. Бу ҳудуднинг ғарбий чегараси Иордан дарёси бўлиб, шимолдаги Жалила кўлигача чўзилган эди. 28 Мана шу ҳудуддаги шаҳарлар ва атрофларидаги қишлоқлар Гад қабиласига мулк қилиб берилган эди.
Иордан шарқидаги Манаше қабиласининг ярмига берилган ерлар
29 Мусо Манаше қабиласининг ярмига ҳам уруғлари бўйича улуш берган эди. 30 Уларнинг ҳудуди Моханайим шаҳридан шимолга чўзилиб, бутун Башан ўлкасини ва Ёвир босиб олган олтмишта шаҳарни ўз ичига олар эди. Башан шоҳи Ўг мана шу жойларда ҳукмронлик қилган эди. 31 Гилад ўлкасининг ярми, Башандаги Ўг шоҳлигининг пойтахт шаҳарлари Аштарўт ва Эдрей ҳам уларнинг ҳудудига кирар эди. Бу ерлар Манаше ўғли Мохирдан келиб чиққан наслнинг ярмига берилган эди.
32 Иорданнинг шарқида, Мўаб текислигида, Ерихонинг рўпарасида Мусо бўлиб берган улушлар мана шулардир. 33 Лекин Леви қабиласига Мусо улуш қилиб ер бермаган эди. Исроил халқининг Худоси — Эгамиз уларга: “Мен Ўзим сизларнинг улушингиз бўламан”, деб ваъда берган эди .
