41–BOB
1 Ha, maxluq Levitanni ushlamoqchi boʻlganlar oʻzini oʻzi aldaydi,
Uning koʻrinishi odamni dahshatga tushiradi.
2 Uni qoʻzgʻatishga hech kimning yuragi dov bermaydi.
Shunday ekan, kim Menga qarshi chiqa oladi?!
3 Xoʻsh, kimdan qarzim borki, hisobini talab qilsa?!
Axir, falak ostidagi hamma narsa Meniki–ku!
4 Men Levitanning qoʻlu oyoqlari,
Beqiyos kuchi va ajoyib tanasi haqida aytib beray.
5 Kim uning terisini shila oladi?
Zirhga oʻxshagan terisini kim teshishi mumkin?
6 Uning ogʻzini kim ochib koʻra oladi?
Axir, uning tishlari qoʻrqinchli–ku!
7 Uning beli qator tizilgan qalqonlardaydir ,
Ular bir–biriga yopishtirib mahkamlangan.
8 Bir–biriga shunchalik yaqinki,
Hatto orasidan havo ham oʻtolmaydi.
9 Ular bir–biriga yopishgan,
Birga mahkamlangan, ajratib boʻlmaydi.
10 Levitan aksirganda uchqun chiqadi,
Koʻzlari tong nuriga oʻxshab chaqnaydi.
11 Ogʻzidan alanga chiqadi,
Olov uchqunlari otiladi.
12 Yonayotgan qamish ustida qaynayotgan qozondan bugʻ chiqqanday,
Uning ham burnidan tutun chiqadi.
13 Uning nafasi koʻmirni yondiradi,
Ogʻzidan alanga chiqadi.
14 Boʻyni shu qadar baquvvatki,
Koʻrganlar vahimaga tushadi.
15 Eti qatlam–qatlam boʻlib, bir–biriga yopishib ketgan,
Ular shunchalik qattiqki, qimirlatib boʻlmaydi.
16 Yuragi toshday qattiq,
Ha, tegirmon toshiday qattiq.
17 Levitan qoʻzgʻalganda, kuchlilar ham qoʻrqadi,
Levitan tashlanganda, ular gʻujanak boʻladi.
18 Unga tekkan qilich, nayza, yoy oʻqiyu
Xanjar hech taʼsir qilmaydi.
19 Temir unga somon kabidir,
Bronza esa chirigan yogʻoch kabidir.
20 Yoy oʻqi uni qochirolmaydi,
Palaxmon toshi somonchalik taʼsir qilmaydi.
21 Tayoq unga xashakday tuyuladi,
Nayzalarning shuvullashidan u kuladi.
22 Qornidagi tangachalari sopol parchasiday oʻtkir,
Loydan yursa, yerni yorib oʻtadi.
23 Levitan harakatlaridan dengiz qaynaydi,
Chuqur suvlarni qaynagan moyday qiladi.
24 U suzgan joylarda yaltiragan iz qoladi,
Dengiz oq sochlar bilan qoplanganga oʻxshaydi.
25 Yer yuzida unga teng keladigani yoʻq,
Bu jonivorda qoʻrquv degan narsa yoʻq.
26 Barcha takabbur jonzotga u past nazar bilan qaraydi,
Magʻrur yovvoyi hayvonlarning shohi Levitandir.”
41–БОБ
1 Ҳа, махлуқ Левитанни ушламоқчи бўлганлар ўзини ўзи алдайди,
Унинг кўриниши одамни даҳшатга туширади.
2 Уни қўзғатишга ҳеч кимнинг юраги дов бермайди.
Шундай экан, ким Менга қарши чиқа олади?!
3 Хўш, кимдан қарзим борки, ҳисобини талаб қилса?!
Ахир, фалак остидаги ҳамма нарса Меники–ку!
4 Мен Левитаннинг қўлу оёқлари,
Беқиёс кучи ва ажойиб танаси ҳақида айтиб берай.
5 Ким унинг терисини шила олади?
Зирҳга ўхшаган терисини ким тешиши мумкин?
6 Унинг оғзини ким очиб кўра олади?
Ахир, унинг тишлари қўрқинчли–ку!
7 Унинг бели қатор тизилган қалқонлардайдир ,
Улар бир–бирига ёпиштириб маҳкамланган.
8 Бир–бирига шунчалик яқинки,
Ҳатто орасидан ҳаво ҳам ўтолмайди.
9 Улар бир–бирига ёпишган,
Бирга маҳкамланган, ажратиб бўлмайди.
10 Левитан аксирганда учқун чиқади,
Кўзлари тонг нурига ўхшаб чақнайди.
11 Оғзидан аланга чиқади,
Олов учқунлари отилади.
12 Ёнаётган қамиш устида қайнаётган қозондан буғ чиққандай,
Унинг ҳам бурнидан тутун чиқади.
13 Унинг нафаси кўмирни ёндиради,
Оғзидан аланга чиқади.
14 Бўйни шу қадар бақувватки,
Кўрганлар ваҳимага тушади.
15 Эти қатлам–қатлам бўлиб, бир–бирига ёпишиб кетган,
Улар шунчалик қаттиқки, қимирлатиб бўлмайди.
16 Юраги тошдай қаттиқ,
Ҳа, тегирмон тошидай қаттиқ.
17 Левитан қўзғалганда, кучлилар ҳам қўрқади,
Левитан ташланганда, улар ғужанак бўлади.
18 Унга теккан қилич, найза, ёй ўқию
Ханжар ҳеч таъсир қилмайди.
19 Темир унга сомон кабидир,
Бронза эса чириган ёғоч кабидир.
20 Ёй ўқи уни қочиролмайди,
Палахмон тоши сомончалик таъсир қилмайди.
21 Таёқ унга хашакдай туюлади,
Найзаларнинг шувиллашидан у кулади.
22 Қорнидаги тангачалари сопол парчасидай ўткир,
Лойдан юрса, ерни ёриб ўтади.
23 Левитан ҳаракатларидан денгиз қайнайди,
Чуқур сувларни қайнаган мойдай қилади.
24 У сузган жойларда ялтираган из қолади,
Денгиз оқ сочлар билан қопланганга ўхшайди.
25 Ер юзида унга тенг келадигани йўқ,
Бу жониворда қўрқув деган нарса йўқ.
26 Барча такаббур жонзотга у паст назар билан қарайди,
Мағрур ёввойи ҳайвонларнинг шоҳи Левитандир.”
