36–BOB
1 Elixu gapida davom etib shunday dedi:
2 “Yana bir oz sabr qiling, men sizlarga koʻrsatay,
Xudo tomonida turib gapiradigan gaplarim bor hali.
3 Mening bilimim juda koʻp,
Meni yaratgan Xudo odil ekanligini sizlarga koʻrsataman.
4 Rostini aytaman, soʻzlarim yolgʻon emas.
Mana men, bilimi barkamol inson, sizning oldingizdaman.
5 Xudo qudratlidir,
Ammo U insonlardan nafratlanmaydi,
Xudo qudratli va barqarordir.
6 Fosiqlarning yashashiga Xudo yoʻl qoʻymaydi,
Ezilganlarga esa adolat qiladi.
7 Solihlardan yuz oʻgirmaydi,
Solihlarni shohlar bilan birga taxtga chiqaradi,
Ularni to abad yuksaltiradi.
8 Agar insonlar zanjirband boʻlsa,
Azob ularni iskanjaga olgan boʻlsa,
9 Xudo ularning qilmishlariniyu gunohlarini oʻzlariga koʻrsatadi,
Ular magʻrurlanib ketganlarini oshkor qiladi.
10 Yoʻl–yoʻriqlarini tinglashga majbur qiladi,
Yovuzlikdan qaytishga amr qiladi.
11 Agar ular itoat etib, Xudoga xizmat qilsalar,
Qolgan umrlarini farovonlikda oʻtkazadilar,
Hayotlari rohatda oʻtadi.
12 Ammo itoat etmasalar,
Ular oʻlim daryosiga gʻarq boʻladilar ,
Aql–idrokka erishmay, olamdan oʻtadilar.
13 Xudosizlar alamini ichiga yutib yuraveradilar,
Xudo ularni kishanlasa ham yordam soʻramaydilar.
14 Ular sajdagohlardagi fohishlar orasida,
Yoshliklaridayoq vafot etadilar.
15 Xudo qiynalganlarni oʻsha azoblari orqali qutqaradi,
Zulm va jabr–jafoga mubtalo qilib, ularning koʻzlarini ochadi.
16 Xudo sizni ham darddan ozod qilib,
Bepoyon kenglikka olib chiqadi,
Dasturxoningiz noz–neʼmatga toʻladi.
17 Ammo siz hozir fosiqlarni hukm qilish bilan ovorasiz.
Xayolingiz adolat va hukm bilan band.
18 Ehtiyot boʻling, yana birov sizni boylik bilan vasvasaga solmasin,
Katta poralar sizni yoʻldan urmasin.
19 Boyliklaringiz sizni kulfatdan qutqara olarmidi?!
Qudratu kuchingiz endi sizga yordam bera olarmidi?!
20 Tunni kutavermang ,
Axir, xalqlar kechasi yoʻq boʻlib ketadilar–ku!
21 Hushyor boʻling! Fosiqlikka yuz burmang,
Axir, dard sizni fosiqlikdan saqlash uchun yuborilgan–ku.
Elixu Ayubga Xudoning qudratini eslatadi
22 Xudo Oʻz qudrati tufayli yuksakdir!
Unga oʻxshash ustoz bormi?
23 Kim Xudoga yoʻl koʻrsata olardi?!
Kim Unga: «Qilganlaring notoʻgʻri», deya oladi?!
24 Xudo qilgan ishlari uchun
Insonlar Uni madh qiladilar,
Siz ham doimo ularga joʻr boʻling.
25 Butun inson zoti Uning ishlarini koʻrgan,
Hamma uzoqdan turib kuzatadi.
26 Xudo qanchalar buyuk!
Uning buyukligiga aqlimiz yetmaydi,
Xudoning umrini hisoblaydigan sonning oʻzi yoʻq.
27 U suv tomchilarini yigʻib,
Ularni yomgʻirga aylantiradi.
28 Bulutlardan yomgʻir yogʻdiradi,
Odamzod bundan bahramand boʻladi.
29 Xudo qanday qilib bulutlarni yurgizishini
Yoki Oʻz maskanidan turib, momaqaldiroqni qanday gumburlatishini
Kim ham tushuna oladi?
30 Mana, qaranglar, Xudo shunday chaqmoq chaqtiradiki,
Hatto dengiz tubi ham yorishib ketadi .
31 Xudo Oʻz qudratli ishlari bilan xalqlarni boshqaradi,
Ularga farovonlik ato qiladi.
32 Chaqmoqni qoʻliga olib,
Belgilagan joyiga borib urishni amr qiladi.
33 Boʻron kelayotganini momaqaldiroq bildirib turadi,
Hatto chorva ham oldindan sezadi .
36–БОБ
1 Элиху гапида давом этиб шундай деди:
2 “Яна бир оз сабр қилинг, мен сизларга кўрсатай,
Худо томонида туриб гапирадиган гапларим бор ҳали.
3 Менинг билимим жуда кўп,
Мени яратган Худо одил эканлигини сизларга кўрсатаман.
4 Ростини айтаман, сўзларим ёлғон эмас.
Мана мен, билими баркамол инсон, сизнинг олдингиздаман.
5 Худо қудратлидир,
Аммо У инсонлардан нафратланмайди,
Худо қудратли ва барқарордир.
6 Фосиқларнинг яшашига Худо йўл қўймайди,
Эзилганларга эса адолат қилади.
7 Солиҳлардан юз ўгирмайди,
Солиҳларни шоҳлар билан бирга тахтга чиқаради,
Уларни то абад юксалтиради.
8 Агар инсонлар занжирбанд бўлса,
Азоб уларни исканжага олган бўлса,
9 Худо уларнинг қилмишларинию гуноҳларини ўзларига кўрсатади,
Улар мағрурланиб кетганларини ошкор қилади.
10 Йўл–йўриқларини тинглашга мажбур қилади,
Ёвузликдан қайтишга амр қилади.
11 Агар улар итоат этиб, Худога хизмат қилсалар,
Қолган умрларини фаровонликда ўтказадилар,
Ҳаётлари роҳатда ўтади.
12 Аммо итоат этмасалар,
Улар ўлим дарёсига ғарқ бўладилар ,
Ақл–идрокка эришмай, оламдан ўтадилар.
13 Худосизлар аламини ичига ютиб юраверадилар,
Худо уларни кишанласа ҳам ёрдам сўрамайдилар.
14 Улар саждагоҳлардаги фоҳишлар орасида,
Ёшликларидаёқ вафот этадилар.
15 Худо қийналганларни ўша азоблари орқали қутқаради,
Зулм ва жабр–жафога мубтало қилиб, уларнинг кўзларини очади.
16 Худо сизни ҳам дарддан озод қилиб,
Бепоён кенгликка олиб чиқади,
Дастурхонингиз ноз–неъматга тўлади.
17 Аммо сиз ҳозир фосиқларни ҳукм қилиш билан оворасиз.
Хаёлингиз адолат ва ҳукм билан банд.
18 Эҳтиёт бўлинг, яна биров сизни бойлик билан васвасага солмасин,
Катта поралар сизни йўлдан урмасин.
19 Бойликларингиз сизни кулфатдан қутқара олармиди?!
Қудрату кучингиз энди сизга ёрдам бера олармиди?!
20 Тунни кутаверманг ,
Ахир, халқлар кечаси йўқ бўлиб кетадилар–ку!
21 Ҳушёр бўлинг! Фосиқликка юз бурманг,
Ахир, дард сизни фосиқликдан сақлаш учун юборилган–ку.
Элиху Аюбга Худонинг қудратини эслатади
22 Худо Ўз қудрати туфайли юксакдир!
Унга ўхшаш устоз борми?
23 Ким Худога йўл кўрсата оларди?!
Ким Унга: «Қилганларинг нотўғри», дея олади?!
24 Худо қилган ишлари учун
Инсонлар Уни мадҳ қиладилар,
Сиз ҳам доимо уларга жўр бўлинг.
25 Бутун инсон зоти Унинг ишларини кўрган,
Ҳамма узоқдан туриб кузатади.
26 Худо қанчалар буюк!
Унинг буюклигига ақлимиз етмайди,
Худонинг умрини ҳисоблайдиган соннинг ўзи йўқ.
27 У сув томчиларини йиғиб,
Уларни ёмғирга айлантиради.
28 Булутлардан ёмғир ёғдиради,
Одамзод бундан баҳраманд бўлади.
29 Худо қандай қилиб булутларни юргизишини
Ёки Ўз масканидан туриб, момақалдироқни қандай гумбурлатишини
Ким ҳам тушуна олади?
30 Мана, қаранглар, Худо шундай чақмоқ чақтирадики,
Ҳатто денгиз туби ҳам ёришиб кетади .
31 Худо Ўз қудратли ишлари билан халқларни бошқаради,
Уларга фаровонлик ато қилади.
32 Чақмоқни қўлига олиб,
Белгилаган жойига бориб уришни амр қилади.
33 Бўрон келаётганини момақалдироқ билдириб туради,
Ҳатто чорва ҳам олдиндан сезади .
