8–BOB
1 Egamiz shunday demoqda: “Oʻsha vaqtda Yahudo shohlarining suyaklari, aʼyonlarning, ruhoniylarning, paygʻambarlarning va Quddus aholisining suyaklari qabrlardan olib chiqiladi. 2 Ularning suyaklari quyosh, oy va yulduzlar ostida sochib tashlanadi. Zotan, bu odamlar osmon jismlarini sevar edilar, oʻshalarga xizmat qilar edilar, ularga ergashib, maslahat solar edilar, oʻshalarga sajda etar edilar. Ularning suyaklarini hech kim yigʻib koʻmmaydi, goʻngday yer ustida yotaveradi. 3 Bu yovuz naslning omon qolganlarini Men turli joylarga surgun qilaman. Oʻshanda ular yashashdan koʻra, oʻlimni afzal koʻradigan boʻladilar.” Sarvari Olamning kalomi shudir.
Gunoh va jazo
4 Ularga borib ayt, Egamiz shunday demoqda:
“Yiqilgan odam turmaydimi?!
Yoʻldan adashgan ortiga qaytmaydimi?!
5 Nima uchun bu xalq Men koʻrsatgan yoʻldan ozdi?
Nima uchun Quddus ahli toʻgʻri yoʻlga qaytmayapti?
Ular yolgʻonga qattiq yopishib oldilar,
Huzurimga qaytishdan bosh tortdilar.
6 Men ularning gaplariga yaxshilab quloq soldim,
Birontasi toʻgʻri gap aytmaydi.
Hech biri qilmishidan pushaymon boʻlmaydi,
«Nimalar qilib qoʻydim?» demaydi.
Ular jangga chopgan otga oʻxshaydilar
Oʻz yoʻllaridan qaytmaydilar.
7 Hattoki osmondagi laylaklar
Qaytib kelish vaqtini biladi.
Kaptar, qaldirgʻochu turnalar
Mavsumda koʻchish vaqtiga amal qiladi.
Mening xalqim esa oʻz Egasining
Qonun–qoidalarini bilmaydi.
8 Sizlar: «Biz donomiz» deb aytasiz,
«Bizda Egamizning qonunlari bor», deb maqtanasiz.
Aslida tafsirchilar qalloblik qilib,
Qonunimni oʻzgartirdilar.
9 Bunday donolar sharmanda boʻladi,
Sarosimaga tushib, tuzoqqa ilinadi.
Mening soʻzimni rad etganlarni
Dono deb boʻladimi?!
10 Shuning uchun ularning xotinlarini boshqalarga beraman,
Dalalarini bosqinchilarga topshiraman.
Zotan, ularning kichigidan tortib, kattasigacha
Nafsini tiyolmay harom yoʻl bilan pul topishadi.
Paygʻambaridan tortib, ruhoniysigacha —
Hammasi tovlamachilik qilishadi.
11 Xalqimning yaralarini yuzaki davolashadi.
Ahvol ogʻir bir paytda «hammasi yaxshi», deb aytishadi.
12 Jirkanch ishlari uchun ular uyaladilarmi?
Yoʻq, ular uyalmaydilar!
Qizarish degan narsani bilmaydilar.
Shuning uchun boshqalarday halok boʻladilar,
Ularni jazolab, xonavayron qilaman,
— deb aytmoqda Egamiz. —
13 Men ularning hosilini tortib olaman.
Toklarida uzum qolmaydi,
Anjir daraxtlari meva tugmaydi,
Barglari toʻkilib xazon boʻladi.
Ularga nima bergan boʻlsam,
Hammasidan judo boʻlishadi.”
Egamizning kalomi shudir.
14 Yahudo odamlari bir–biriga aytishadi:
“Bu yerda nima qilib oʻtiribmiz, axir?
Qani boʻlinglar, yigʻilishib,
Mustahkam shaharlarga qochib boraylik,
Oʻsha yerda jon taslim qilaylik.
Evoh, Egamizga qarshi gunoh qildik!
Egamiz Xudo bizni oʻlimga mahkum etdi,
Zaharli suvdan bizga ichirdi.
15 Biz tinchlikni izladik,
Ammo yaxshilik kelmadi.
Shifo topmoqchi edik,
Ammo vahimaga duchor boʻldik.
16 Ana, dushman Dan shahriga yetib keldi ,
U yerdan otlarining pishqirgani eshitilmoqda.
Aygʻirlarning kishnagani
Butun yurtni titratmoqda.
Dushman yurtimizni yakson qilmoqchi,
Shaharlarni vayron etib, odamlarni oʻldirmoqchi.”
17 Egamiz shunday demoqda:
“Men orangizga ilonlarni yuboryapman,
Bu zaharli ilonlar sizlarni chaqadi,
Bu ilonlarni oʻynatib boʻlmaydi.”
Yeremiyoning oʻz xalqi uchun tortgan jafosi
18 Qaygʻularimga tasalli topa olmayapman,
Yurak–bagʻrim ezilib ketdi.
19 Xalqim faryod etmoqda,
Yurt boʻylab dod–voylari eshitilmoqda:
“Nahotki Egamiz Quddusni tark etgan boʻlsa?!
Nahotki Shohimiz Sionda boʻlmasa?!”
Egamiz shunday javob berdi:
“Ular butlari bilan qahrimni keltirdilar–ku!
Yaroqsiz begona tasvirlari bilan Meni gʻazablantirdilar–ku!”
20 Xalq esa shunday deb nolimoqda:
“Oʻrim vaqti oʻtdi,
Yoz ham tugadi,
Biz esa hanuz qutqarilmadik!”
21 Xalqim tortgan azoblardan ezilib ketdim,
Qaygʻurib, vahimaga tushdim.
22 Nima, Giladda malham yoʻqmidi?!
Tabib yoʻqmidi?!
Unday boʻlsa, nega xalqim shifo topmayapti?
8–БОБ
1 Эгамиз шундай демоқда: “Ўша вақтда Яҳудо шоҳларининг суяклари, аъёнларнинг, руҳонийларнинг, пайғамбарларнинг ва Қуддус аҳолисининг суяклари қабрлардан олиб чиқилади. 2 Уларнинг суяклари қуёш, ой ва юлдузлар остида сочиб ташланади. Зотан, бу одамлар осмон жисмларини севар эдилар, ўшаларга хизмат қилар эдилар, уларга эргашиб, маслаҳат солар эдилар, ўшаларга сажда этар эдилар. Уларнинг суякларини ҳеч ким йиғиб кўммайди, гўнгдай ер устида ётаверади. 3 Бу ёвуз наслнинг омон қолганларини Мен турли жойларга сургун қиламан. Ўшанда улар яшашдан кўра, ўлимни афзал кўрадиган бўладилар.” Сарвари Оламнинг каломи шудир.
Гуноҳ ва жазо
4 Уларга бориб айт, Эгамиз шундай демоқда:
“Йиқилган одам турмайдими?!
Йўлдан адашган ортига қайтмайдими?!
5 Нима учун бу халқ Мен кўрсатган йўлдан озди?
Нима учун Қуддус аҳли тўғри йўлга қайтмаяпти?
Улар ёлғонга қаттиқ ёпишиб олдилар,
Ҳузуримга қайтишдан бош тортдилар.
6 Мен уларнинг гапларига яхшилаб қулоқ солдим,
Биронтаси тўғри гап айтмайди.
Ҳеч бири қилмишидан пушаймон бўлмайди,
«Нималар қилиб қўйдим?» демайди.
Улар жангга чопган отга ўхшайдилар
Ўз йўлларидан қайтмайдилар.
7 Ҳаттоки осмондаги лайлаклар
Қайтиб келиш вақтини билади.
Каптар, қалдирғочу турналар
Мавсумда кўчиш вақтига амал қилади.
Менинг халқим эса ўз Эгасининг
Қонун–қоидаларини билмайди.
8 Сизлар: «Биз дономиз» деб айтасиз,
«Бизда Эгамизнинг қонунлари бор», деб мақтанасиз.
Аслида тафсирчилар қаллоблик қилиб,
Қонунимни ўзгартирдилар.
9 Бундай донолар шарманда бўлади,
Саросимага тушиб, тузоққа илинади.
Менинг сўзимни рад этганларни
Доно деб бўладими?!
10 Шунинг учун уларнинг хотинларини бошқаларга бераман,
Далаларини босқинчиларга топшираман.
Зотан, уларнинг кичигидан тортиб, каттасигача
Нафсини тиёлмай ҳаром йўл билан пул топишади.
Пайғамбаридан тортиб, руҳонийсигача —
Ҳаммаси товламачилик қилишади.
11 Халқимнинг яраларини юзаки даволашади.
Аҳвол оғир бир пайтда «ҳаммаси яхши», деб айтишади.
12 Жирканч ишлари учун улар уяладиларми?
Йўқ, улар уялмайдилар!
Қизариш деган нарсани билмайдилар.
Шунинг учун бошқалардай ҳалок бўладилар,
Уларни жазолаб, хонавайрон қиламан,
— деб айтмоқда Эгамиз. —
13 Мен уларнинг ҳосилини тортиб оламан.
Токларида узум қолмайди,
Анжир дарахтлари мева тугмайди,
Барглари тўкилиб хазон бўлади.
Уларга нима берган бўлсам,
Ҳаммасидан жудо бўлишади.”
Эгамизнинг каломи шудир.
14 Яҳудо одамлари бир–бирига айтишади:
“Бу ерда нима қилиб ўтирибмиз, ахир?
Қани бўлинглар, йиғилишиб,
Мустаҳкам шаҳарларга қочиб борайлик,
Ўша ерда жон таслим қилайлик.
Эвоҳ, Эгамизга қарши гуноҳ қилдик!
Эгамиз Худо бизни ўлимга маҳкум этди,
Заҳарли сувдан бизга ичирди.
15 Биз тинчликни изладик,
Аммо яхшилик келмади.
Шифо топмоқчи эдик,
Аммо ваҳимага дучор бўлдик.
16 Ана, душман Дан шаҳрига етиб келди ,
У ердан отларининг пишқиргани эшитилмоқда.
Айғирларнинг кишнагани
Бутун юртни титратмоқда.
Душман юртимизни яксон қилмоқчи,
Шаҳарларни вайрон этиб, одамларни ўлдирмоқчи.”
17 Эгамиз шундай демоқда:
“Мен орангизга илонларни юборяпман,
Бу заҳарли илонлар сизларни чақади,
Бу илонларни ўйнатиб бўлмайди.”
Еремиёнинг ўз халқи учун тортган жафоси
18 Қайғуларимга тасалли топа олмаяпман,
Юрак–бағрим эзилиб кетди.
19 Халқим фарёд этмоқда,
Юрт бўйлаб дод–войлари эшитилмоқда:
“Наҳотки Эгамиз Қуддусни тарк этган бўлса?!
Наҳотки Шоҳимиз Сионда бўлмаса?!”
Эгамиз шундай жавоб берди:
“Улар бутлари билан қаҳримни келтирдилар–ку!
Яроқсиз бегона тасвирлари билан Мени ғазаблантирдилар–ку!”
20 Халқ эса шундай деб нолимоқда:
“Ўрим вақти ўтди,
Ёз ҳам тугади,
Биз эса ҳануз қутқарилмадик!”
21 Халқим тортган азоблардан эзилиб кетдим,
Қайғуриб, ваҳимага тушдим.
22 Нима, Гиладда малҳам йўқмиди?!
Табиб йўқмиди?!
Ундай бўлса, нега халқим шифо топмаяпти?
