21–BOB
Benyamin yigitlari uchun kelinlar
1 Isroil xalqi Mispaxdagi yigʻinda: “Birontamiz ham Benyamin qabilasiga qiz uzatmaymiz”, — deb ont ichgan edi. 2 Benyamin qabilasi bilan boʻlgan urushdan keyin Isroil xalqi Baytilga borib, Xudoning huzurida kechgacha oʻtirdi. Ular faryod koʻtarib: 3 “Ey Isroil xalqining Xudosi — Egamiz, nega bunday koʻrgilik boshimizga tushdi?! Nega Isroilning bir qabilasi yoʻq boʻlib ketdi?!” deya achchiq–achchiq yigʻladilar.
4 Ertasi kuni odamlar barvaqt turib, u yerda qurbongoh qurdilar. Ular kuydiriladigan qurbonliklar va tinchlik qurbonliklarini keltirdilar. 5 Keyin bir–birlaridan: “Isroil qabilalaridan Egamiz huzurida oʻtkazilgan yigʻinga kelmaganlar bormi?” deb soʻradilar. Chunki ular, Mispaxda — Egamiz huzurida oʻtkazilgan yigʻinda ishtirok etmagan har bir kishining jazosi oʻlimdir, deb qatʼiy bir qasam ichgan edilar. 6 Isroil xalqi oʻz jigari boʻlgan Benyamin qabilasiga achinib: “Evoh, bugun Isroilning bir qabilasi yoʻq boʻldi”, deya koʻp oʻkindi. 7 “Oʻsha qabiladan faqatgina bir nechta yigit omon qoldi, xolos. Endi ular uchun qayerdan qiz topamiz? Birontamiz ularga qiz uzatmaymiz, deb Egamizning nomi bilan qasam ichgan edik–ku!”
8 Isroil xalqi: “Mispaxdagi yigʻinda qatnashmaganlar bormi?” deya surishtira boshladi. Shunda Giladdagi Yobosh shahrining aholisi yigʻinda qatnashmaganligi maʼlum boʻldi. 9 Chunki yoʻqlama qilinganda oʻsha shahardan hech kim yoʻq edi. 10 Butun jamoa oʻn ikki ming jangchini tanlab, ularga: “Boringlar, Giladdagi Yobosh shahrining butun aholisini qirib tashlanglar, xotinu bola–chaqalarini ham ayamanglar!” dedi. 11 “Har bir erkak va er koʻrgan har bir ayol oʻldirilsin.” 12 Jangchilar Yobosh aholisining orasidan toʻrt yuzta er koʻrmagan, yosh bokira qizni topib, ularni Kanʼon yurtidagi Shiloʻ qarorgohiga olib keldilar.
13 Keyin butun jamoa Rimmon qoyasidagi Benyamin odamlariga xabar yuborib, tinchlik eʼlon qildi. 14 Benyamin odamlari oʻz uylariga qaytib borishdi. Isroil xalqi Giladdagi Yobosh aholisining omon qolgan qizlarini ularga turmushga berdi. Ammo qizlarning soni Benyamin odamlariga qaraganda kamroq edi.
15 Isroil xalqi Benyamin qabilasiga nihoyatda achinar edi, chunki Egamiz ularni deyarli yoʻq qilib yuborgan edi. 16 Shunda jamoa oqsoqollari shunday dedilar:
— Obbo, endi qolgan Benyamin oʻgʻillariga qayerdan qiz topib beramiz? Ularning qabilasidan bironta qiz ham tirik qolmadi–ku! 17 Benyamin qabilasi Isroildan batamom yoʻq boʻlib ketmasligi uchun omon qolganlari nasl qoldirishlari kerak. 18 Lekin shunisi ham borki, biz: “Benyamin qabilasiga qiz uzatgan laʼnati boʻlgay!” deb qasam ichib qoʻydik, endi ularga qiz uzata olmaymiz.
19 Shunda odamlardan bittasi:
— Ha, aytgancha, Egamizga bagʻishlab Shiloʻda har yili oʻtkaziladigan bayram haqida nima deysizlar? — dedi. — Lavoʻn va Baytil shaharlarining oʻrtasida joylashgan bu shahar, Baytildan Shakamga ketadigan yoʻlning shundoq yonginasida–ku.
20 Oqsoqollar Benyamin qabilasidan boʻlgan boʻydoq yigitlarga shunday uqtirdilar:
— Boringlar, uzumzorlarda yashirinib, 21 poylab turinglar. Shiloʻ qizlari oʻyinga chiqqanda, uzumzordan chiqib, har biringiz oʻzlaringiz uchun qiz olib qochinglar. 22 Qizlarning otalari yoki aka–ukalari oldimizga shikoyat qilib keladigan boʻlishsa, biz ularga shunday deymiz: “Qizlaringizni olib qolishimizga ijozat beringlar. Tushuninglar axir, biz Giladdagi Yoboshga hujum qilganimizda Benyamin yigitlari uchun yetarlicha qiz olib kela olmadik. Garchi Benyamin yigitlari qizlaringizni olib qochgan boʻlsa–da, sizlar qasamni buzgan hisoblanmaysizlar.”
23 Benyamin odamlari Shiloʻga borib, uzumzorlarda yashirinib oldilar. Qizlar raqsga tushganlarida ular oʻzlari uchun bittadan qiz olib qochdilar. Soʻng olib qochgan qizlari bilan uylariga qaytib ketdilar, shaharlarini tiklab, oʻsha joyda yashadilar. 24 Butun Isroil jamoasi ham uy–uylariga, qabilalari va oilalariga qaytib bordi.
25 Oʻsha davrlarda Isroilda shoh yoʻq edi. Har bir odam bilganini qilar edi.
21–БОБ
Бенямин йигитлари учун келинлар
1 Исроил халқи Миспахдаги йиғинда: “Биронтамиз ҳам Бенямин қабиласига қиз узатмаймиз”, — деб онт ичган эди. 2 Бенямин қабиласи билан бўлган урушдан кейин Исроил халқи Байтилга бориб, Худонинг ҳузурида кечгача ўтирди. Улар фарёд кўтариб: 3 “Эй Исроил халқининг Худоси — Эгамиз, нега бундай кўргилик бошимизга тушди?! Нега Исроилнинг бир қабиласи йўқ бўлиб кетди?!” дея аччиқ–аччиқ йиғладилар.
4 Эртаси куни одамлар барвақт туриб, у ерда қурбонгоҳ қурдилар. Улар куйдириладиган қурбонликлар ва тинчлик қурбонликларини келтирдилар. 5 Кейин бир–бирларидан: “Исроил қабилаларидан Эгамиз ҳузурида ўтказилган йиғинга келмаганлар борми?” деб сўрадилар. Чунки улар, Миспахда — Эгамиз ҳузурида ўтказилган йиғинда иштирок этмаган ҳар бир кишининг жазоси ўлимдир, деб қатъий бир қасам ичган эдилар. 6 Исроил халқи ўз жигари бўлган Бенямин қабиласига ачиниб: “Эвоҳ, бугун Исроилнинг бир қабиласи йўқ бўлди”, дея кўп ўкинди. 7 “Ўша қабиладан фақатгина бир нечта йигит омон қолди, холос. Энди улар учун қаердан қиз топамиз? Биронтамиз уларга қиз узатмаймиз, деб Эгамизнинг номи билан қасам ичган эдик–ку!”
8 Исроил халқи: “Миспахдаги йиғинда қатнашмаганлар борми?” дея суриштира бошлади. Шунда Гиладдаги Ёбош шаҳрининг аҳолиси йиғинда қатнашмаганлиги маълум бўлди. 9 Чунки йўқлама қилинганда ўша шаҳардан ҳеч ким йўқ эди. 10 Бутун жамоа ўн икки минг жангчини танлаб, уларга: “Боринглар, Гиладдаги Ёбош шаҳрининг бутун аҳолисини қириб ташланглар, хотину бола–чақаларини ҳам аяманглар!” деди. 11 “Ҳар бир эркак ва эр кўрган ҳар бир аёл ўлдирилсин.” 12 Жангчилар Ёбош аҳолисининг орасидан тўрт юзта эр кўрмаган, ёш бокира қизни топиб, уларни Канъон юртидаги Шилў қароргоҳига олиб келдилар.
13 Кейин бутун жамоа Риммон қоясидаги Бенямин одамларига хабар юбориб, тинчлик эълон қилди. 14 Бенямин одамлари ўз уйларига қайтиб боришди. Исроил халқи Гиладдаги Ёбош аҳолисининг омон қолган қизларини уларга турмушга берди. Аммо қизларнинг сони Бенямин одамларига қараганда камроқ эди.
15 Исроил халқи Бенямин қабиласига ниҳоятда ачинар эди, чунки Эгамиз уларни деярли йўқ қилиб юборган эди. 16 Шунда жамоа оқсоқоллари шундай дедилар:
— Оббо, энди қолган Бенямин ўғилларига қаердан қиз топиб берамиз? Уларнинг қабиласидан биронта қиз ҳам тирик қолмади–ку! 17 Бенямин қабиласи Исроилдан батамом йўқ бўлиб кетмаслиги учун омон қолганлари насл қолдиришлари керак. 18 Лекин шуниси ҳам борки, биз: “Бенямин қабиласига қиз узатган лаънати бўлгай!” деб қасам ичиб қўйдик, энди уларга қиз узата олмаймиз.
19 Шунда одамлардан биттаси:
— Ҳа, айтганча, Эгамизга бағишлаб Шилўда ҳар йили ўтказиладиган байрам ҳақида нима дейсизлар? — деди. — Лавўн ва Байтил шаҳарларининг ўртасида жойлашган бу шаҳар, Байтилдан Шакамга кетадиган йўлнинг шундоқ ёнгинасида–ку.
20 Оқсоқоллар Бенямин қабиласидан бўлган бўйдоқ йигитларга шундай уқтирдилар:
— Боринглар, узумзорларда яшириниб, 21 пойлаб туринглар. Шилў қизлари ўйинга чиққанда, узумзордан чиқиб, ҳар бирингиз ўзларингиз учун қиз олиб қочинглар. 22 Қизларнинг оталари ёки ака–укалари олдимизга шикоят қилиб келадиган бўлишса, биз уларга шундай деймиз: “Қизларингизни олиб қолишимизга ижозат беринглар. Тушунинглар ахир, биз Гиладдаги Ёбошга ҳужум қилганимизда Бенямин йигитлари учун етарлича қиз олиб кела олмадик. Гарчи Бенямин йигитлари қизларингизни олиб қочган бўлса–да, сизлар қасамни бузган ҳисобланмайсизлар.”
23 Бенямин одамлари Шилўга бориб, узумзорларда яшириниб олдилар. Қизлар рақсга тушганларида улар ўзлари учун биттадан қиз олиб қочдилар. Сўнг олиб қочган қизлари билан уйларига қайтиб кетдилар, шаҳарларини тиклаб, ўша жойда яшадилар. 24 Бутун Исроил жамоаси ҳам уй–уйларига, қабилалари ва оилаларига қайтиб борди.
25 Ўша даврларда Исроилда шоҳ йўқ эди. Ҳар бир одам билганини қилар эди.
