5–BOB
Boylarni ogohlantirish
1 Menga qaranglar, ey boylar, boshingizga tushadigan falokatlar uchun hoʻngrab yigʻlanglar! 2 Boyligingiz chirib ketgan, kiyimingizni kuya yegan. 3 Oltinu kumushlaringizni zang bosgan. Bu zang sizga qarshi guvoh boʻladi, u tufayli tanangiz Xudoning qahri olovida yonadi. Oxirzamon kelib qoldi, sizlar esa boylik toʻplash bilan ovorasizlar. 4 Sizlar ekinlaringizni oʻrgan oʻroqchilarni aldab, ish haqini bermadingizlar. Ana, oʻsha pullar sizlardan norozi boʻlib, nola qilmoqda! Oʻroqchilarning dod–figʻoni Sarvari Olamning qulogʻiga yetib bordi. 5-6 Sizlar qarshilik koʻrsata olmagan aybsiz odamlarni qoralab, qatl qildingizlar. Bu dunyoda maishatga berilib, huzur–halovatda yashadingizlar. Boʻrdoqilarday semirib ketdingiz! Mana endi hukm kunida soʻyilishga tayyor boʻlib qoldingiz!
Sabr–toqatli boʻlinglar
7 Ey birodarlarim, Rabbimiz Iso keladigan kunga qadar sabr–toqat qilinglar! Axir, dehqon ham dalasi moʻl hosil yetishtirishini kutadi. U kuzgi va bahorgi yomgʻirni poylab, qancha sabr–toqat qiladi! 8 Sizlar ham sabr qilinglar. Dadil boʻlinglar, chunki Rabbimizning keladigan kuni yaqinlashib qoldi. 9 Birodarlarim, mahkum boʻlmasligingiz uchun bir–biringizdan shikoyat qilmanglar. Mana, hukm qiluvchi Rabbimiz Iso ostonada turibdi!
10 Ey birodarlarim, paygʻambarlardan oʻrnak olinglar! Ular Egamizning nomidan gapirib, azob–uqubatlarga dosh berganlar. 11 Darhaqiqat, sabr qilgan bunday odamlarni biz baxtli deb hisoblaymiz. Ayubning sabr–toqati haqida eshitgansizlar, oxirida Egamiz unga qanchalar baraka berganini bilasizlar. Ha, Egamiz rahmdil va mehr–shafqatlidir.
12 Ey birodarlarim, eng avvalo, qasamxoʻr boʻlmanglar! Lafzi yoʻq inson kabi, boʻlar–boʻlmasga osmon haqi, yer haqi va boshqa narsa haqi, deb qasam ichavermanglar. Javobingiz “ha” yoki “yoʻq” boʻlsin. Shunda Xudo sizlarni hukm qilmaydi.
Bir–biringiz uchun ibodat qilinglar
13 Orangizda azob–uqubat chekayotgan bironta odam bormi? Agar boʻlsa, ibodat qilsin. Xursand boʻlgani bormi? Xudoga hamdu sanolar kuylasin. 14 Orangizda kasal boʻlgan bormi? Jamoat oqsoqollarini chaqirtirsin. Ular ibodat qilib, Rabbimiz Iso nomi bilan bemorning boshiga zaytun moyini surtsinlar . 15 Imon bilan qilingan ibodat bemorni sogʻaytiradi, Rabbimizning Oʻzi unga shifo beradi. Agar bemor gunoh qilgan boʻlsa, Rabbimiz uni kechiradi. 16 Shuning uchun qilgan gunohlaringizni bir–biringiz oldida tan olinglar, bir–biringiz uchun ibodat qilinglar, shifo topasizlar. Solih odamning iltijosi kuchli taʼsirga egadir! 17 Ilyos ham bizga oʻxshagan oddiy bir inson edi. Yomgʻir yogʻmasin, deb u astoydil iltijo qildi va yer yuziga uch yilu olti oy yomgʻir yogʻmadi. 18 Soʻng u yomgʻir yogʻsin, deb ibodat qildi, osmondan yomgʻir yogʻib, yer hosil berdi.
19 Ey birodarlarim, agar orangizdagi biror kishi haq yoʻldan ozgan boʻlsa, uni toʻgʻri yoʻlga soling. 20 Esingizda boʻlsin, gunohkorni nohaq yoʻldan qaytargan odam oʻsha gunohkorning najot topishiga va behisob gunohlarining yuvilishiga sababchi boʻladi.
5–БОБ
Бойларни огоҳлантириш
1 Менга қаранглар, эй бойлар, бошингизга тушадиган фалокатлар учун ҳўнграб йиғланглар! 2 Бойлигингиз чириб кетган, кийимингизни куя еган. 3 Олтину кумушларингизни занг босган. Бу занг сизга қарши гувоҳ бўлади, у туфайли танангиз Худонинг қаҳри оловида ёнади. Охирзамон келиб қолди, сизлар эса бойлик тўплаш билан оворасизлар. 4 Сизлар экинларингизни ўрган ўроқчиларни алдаб, иш ҳақини бермадингизлар. Ана, ўша пуллар сизлардан норози бўлиб, нола қилмоқда! Ўроқчиларнинг дод–фиғони Сарвари Оламнинг қулоғига етиб борди. 5-6 Сизлар қаршилик кўрсата олмаган айбсиз одамларни қоралаб, қатл қилдингизлар. Бу дунёда маишатга берилиб, ҳузур–ҳаловатда яшадингизлар. Бўрдоқилардай семириб кетдингиз! Мана энди ҳукм кунида сўйилишга тайёр бўлиб қолдингиз!
Сабр–тоқатли бўлинглар
7 Эй биродарларим, Раббимиз Исо келадиган кунга қадар сабр–тоқат қилинглар! Ахир, деҳқон ҳам даласи мўл ҳосил етиштиришини кутади. У кузги ва баҳорги ёмғирни пойлаб, қанча сабр–тоқат қилади! 8 Сизлар ҳам сабр қилинглар. Дадил бўлинглар, чунки Раббимизнинг келадиган куни яқинлашиб қолди. 9 Биродарларим, маҳкум бўлмаслигингиз учун бир–бирингиздан шикоят қилманглар. Мана, ҳукм қилувчи Раббимиз Исо остонада турибди!
10 Эй биродарларим, пайғамбарлардан ўрнак олинглар! Улар Эгамизнинг номидан гапириб, азоб–уқубатларга дош берганлар. 11 Дарҳақиқат, сабр қилган бундай одамларни биз бахтли деб ҳисоблаймиз. Аюбнинг сабр–тоқати ҳақида эшитгансизлар, охирида Эгамиз унга қанчалар барака берганини биласизлар. Ҳа, Эгамиз раҳмдил ва меҳр–шафқатлидир.
12 Эй биродарларим, энг аввало, қасамхўр бўлманглар! Лафзи йўқ инсон каби, бўлар–бўлмасга осмон ҳақи, ер ҳақи ва бошқа нарса ҳақи, деб қасам ичаверманглар. Жавобингиз “ҳа” ёки “йўқ” бўлсин. Шунда Худо сизларни ҳукм қилмайди.
Бир–бирингиз учун ибодат қилинглар
13 Орангизда азоб–уқубат чекаётган биронта одам борми? Агар бўлса, ибодат қилсин. Хурсанд бўлгани борми? Худога ҳамду санолар куйласин. 14 Орангизда касал бўлган борми? Жамоат оқсоқолларини чақиртирсин. Улар ибодат қилиб, Раббимиз Исо номи билан беморнинг бошига зайтун мойини суртсинлар . 15 Имон билан қилинган ибодат беморни соғайтиради, Раббимизнинг Ўзи унга шифо беради. Агар бемор гуноҳ қилган бўлса, Раббимиз уни кечиради. 16 Шунинг учун қилган гуноҳларингизни бир–бирингиз олдида тан олинглар, бир–бирингиз учун ибодат қилинглар, шифо топасизлар. Солиҳ одамнинг илтижоси кучли таъсирга эгадир! 17 Илёс ҳам бизга ўхшаган оддий бир инсон эди. Ёмғир ёғмасин, деб у астойдил илтижо қилди ва ер юзига уч йилу олти ой ёмғир ёғмади. 18 Сўнг у ёмғир ёғсин, деб ибодат қилди, осмондан ёмғир ёғиб, ер ҳосил берди.
19 Эй биродарларим, агар орангиздаги бирор киши ҳақ йўлдан озган бўлса, уни тўғри йўлга солинг. 20 Эсингизда бўлсин, гуноҳкорни ноҳақ йўлдан қайтарган одам ўша гуноҳкорнинг нажот топишига ва беҳисоб гуноҳларининг ювилишига сабабчи бўлади.
