4–BOB
Dunyo bilan doʻst boʻlgan kishi Xudoga dushmandir
1 Orangizdagi urush va janjallar qayerdan kelib chiqadi? Ichingizda jang qilayotgan nafsu ehtiroslaringizdan emasmi?! 2 Sizlar oʻzingizda yoʻq narsani xohlaysizlar, oʻshanga erishish uchun odam oʻldirishdan ham toymaysizlar. Hasad qilyapsizlar, ammo maqsadingizga erisha olmagach, janjallashib urushyapsizlar. Sizlarda xohlagan narsangiz yoʻq, chunki uni Xudodan soʻramaysizlar. 3 Soʻragan taqdirda ham, olmayapsizlar, chunki yomon niyat bilan, nafsingizni qondirish uchun soʻrayapsizlar.
4 Ey sadoqatsiz bandalar! Dunyo bilan doʻstlik Xudoga dushmanlik ekanligini nahotki bilmasangizlar?! Kim dunyo bilan doʻst boʻlishni istasa, Xudoga dushman boʻladi. 5 Muqaddas bitiklarda: “Xudo ichimizga solgan ruhni gʻoyatda qizgʻanadi, U bizdan sadoqatni talab qiladi”, deb taʼlim beriladi–ku! Nima, sizlar bularni bekor deb oʻylaysizlarmi?! 6 Toʻgʻri, Xudo bizdan sadoqatni talab qiladi, ammo shu bilan birga U bizga nisbatan nihoyatda inoyatlidir. Zero, Muqaddas bitiklarda yozilgan:
“Xudo magʻrurlarga qarshi chiqadi,
Kamtarlarga esa inoyat koʻrsatadi.”
7 Shunday ekan, Xudoga boʻysuninglar! Iblisga qarshilik koʻrsatinglar, shunda u sizlardan qochadi. 8 Xudoga yaqinlashinglar, shunda U sizlarga yaqinlashadi. Ey gunohkorlar, qoʻllaringizni gunohdan tozalanglar! Bir vaqtning oʻzida ham Xudoga, ham dunyoga koʻngil bogʻlaganlar, qalbingizni poklanglar! 9 Qilgan gunohingiz uchun qaygʻuringlar, motam tutinglar, yigʻlanglar! Kulgingiz motamga, shodligingiz gʻam–gʻussaga aylansin. 10 Egamiz oldida oʻzingizni past tutinglar, shunda U sizlarni yuksaltiradi.
Birodarlarni hukm qilmanglar
11 Ey birodarlarim, bir–biringizni yomonlamanglar. Agar birodaringizni yomonlab, hukm qilsangiz, demak, mehr–oqibatni oʻrgatadigan Xudoning qonunini yomonlab, hukm qilgan boʻlasizlar. Xudoning qonunini hukm qilgan odam esa, qonun bajarishdan bosh tortib, oʻzini qonundan ustun qoʻygan qoziday boʻladi. 12 Ammo faqatgina Xudo qonun chiqarib, hukm qila oladi. Faqat U qutqarish va nobud qilish qudratiga ega. Sen esa kim boʻlibsanki, birodaringni hukm qilasan?!
Xudoga tayanmay oʻz kuchiga tayanganlarni ogohlantirish
13 Hoy, qilmoqchi boʻlgan ishlari bilan maqtanadiganlar, menga quloq solinglar! Sizlar: “Bugun yoki ertaga falon shaharga borib, u yerda bir yil yashaymiz. Savdo–sotiq qilib, pul ishlab kelamiz”, deysizlar. 14 Ertaga nima boʻlishini sizlar qayerdan bilasizlar?! Umringiz bir lahza koʻzga koʻrinib, keyin gʻoyib boʻladigan tutunga oʻxshaydi–ku! 15 Buning oʻrniga sizlar: “Egamiz xohlasa, sogʻ–salomat boʻlsak, uni yoki buni qilamiz”, deb aytishingiz kerak. 16 Sizlar esa aksini qilib, magʻrurlanib, maqtanyapsizlar. Bu kabi maqtanish yomondir. 17 Demak, qilishingiz kerak boʻlgan yaxshi ishni bila turib, qilmasangiz gunoh boʻladi.
4–БОБ
Дунё билан дўст бўлган киши Худога душмандир
1 Орангиздаги уруш ва жанжаллар қаердан келиб чиқади? Ичингизда жанг қилаётган нафсу эҳтиросларингиздан эмасми?! 2 Сизлар ўзингизда йўқ нарсани хоҳлайсизлар, ўшанга эришиш учун одам ўлдиришдан ҳам тоймайсизлар. Ҳасад қиляпсизлар, аммо мақсадингизга эриша олмагач, жанжаллашиб урушяпсизлар. Сизларда хоҳлаган нарсангиз йўқ, чунки уни Худодан сўрамайсизлар. 3 Сўраган тақдирда ҳам, олмаяпсизлар, чунки ёмон ният билан, нафсингизни қондириш учун сўраяпсизлар.
4 Эй садоқатсиз бандалар! Дунё билан дўстлик Худога душманлик эканлигини наҳотки билмасангизлар?! Ким дунё билан дўст бўлишни истаса, Худога душман бўлади. 5 Муқаддас битикларда: “Худо ичимизга солган руҳни ғоятда қизғанади, У биздан садоқатни талаб қилади”, деб таълим берилади–ку! Нима, сизлар буларни бекор деб ўйлайсизларми?! 6 Тўғри, Худо биздан садоқатни талаб қилади, аммо шу билан бирга У бизга нисбатан ниҳоятда иноятлидир. Зеро, Муқаддас битикларда ёзилган:
“Худо мағрурларга қарши чиқади,
Камтарларга эса иноят кўрсатади.”
7 Шундай экан, Худога бўйсунинглар! Иблисга қаршилик кўрсатинглар, шунда у сизлардан қочади. 8 Худога яқинлашинглар, шунда У сизларга яқинлашади. Эй гуноҳкорлар, қўлларингизни гуноҳдан тозаланглар! Бир вақтнинг ўзида ҳам Худога, ҳам дунёга кўнгил боғлаганлар, қалбингизни покланглар! 9 Қилган гуноҳингиз учун қайғуринглар, мотам тутинглар, йиғланглар! Кулгингиз мотамга, шодлигингиз ғам–ғуссага айлансин. 10 Эгамиз олдида ўзингизни паст тутинглар, шунда У сизларни юксалтиради.
Биродарларни ҳукм қилманглар
11 Эй биродарларим, бир–бирингизни ёмонламанглар. Агар биродарингизни ёмонлаб, ҳукм қилсангиз, демак, меҳр–оқибатни ўргатадиган Худонинг қонунини ёмонлаб, ҳукм қилган бўласизлар. Худонинг қонунини ҳукм қилган одам эса, қонун бажаришдан бош тортиб, ўзини қонундан устун қўйган қозидай бўлади. 12 Аммо фақатгина Худо қонун чиқариб, ҳукм қила олади. Фақат У қутқариш ва нобуд қилиш қудратига эга. Сен эса ким бўлибсанки, биродарингни ҳукм қиласан?!
Худога таянмай ўз кучига таянганларни огоҳлантириш
13 Ҳой, қилмоқчи бўлган ишлари билан мақтанадиганлар, менга қулоқ солинглар! Сизлар: “Бугун ёки эртага фалон шаҳарга бориб, у ерда бир йил яшаймиз. Савдо–сотиқ қилиб, пул ишлаб келамиз”, дейсизлар. 14 Эртага нима бўлишини сизлар қаердан биласизлар?! Умрингиз бир лаҳза кўзга кўриниб, кейин ғойиб бўладиган тутунга ўхшайди–ку! 15 Бунинг ўрнига сизлар: “Эгамиз хоҳласа, соғ–саломат бўлсак, уни ёки буни қиламиз”, деб айтишингиз керак. 16 Сизлар эса аксини қилиб, мағрурланиб, мақтаняпсизлар. Бу каби мақтаниш ёмондир. 17 Демак, қилишингиз керак бўлган яхши ишни била туриб, қилмасангиз гуноҳ бўлади.
