9–BOB
Ishayo boʻlajak shoh haqida bashorat qiladi
1 Kulfat qamragan bu yurtda endi azob boʻlmaydi. Oldin Zabulun va Naftali yurti sharmanda boʻlgan edi. Ammo kelajakda dengiz boʻyidagi yerlar, Iordanning narigi tomonidagi oʻlka va gʻayriyahudiylar Jalilasi ulugʻlanadi.
2 Zulmatda yurgan xalq yorqin ziyoni koʻrdi,
Oʻlim soya solgan yurt aholisi ustiga nur sochildi.
3 Bu xalqni Sen koʻpaytirgansan,
Ularga koʻp shodlik ato qilgansan.
Hosil vaqtidagi mamnunlik kabi,
Oʻljalarin boʻlishib olgan paytdagi kabi,
Ular huzuringda quvonchga toʻlgan.
4 Bu xalqning ogʻir boʻyinturugʻini,
Yelkasidagi tayogʻini
Sen sindirib tashlagansan.
Zolimlarning kaltagini
Midiyon xalqi kabi,
Magʻlub qilgansan .
5 Jangda kiyilgan etiklar,
Qonga belangan hamma kiyim
Olovga tashlanib, yoqilajak.
6 Mana biz uchun bola tugʻildi,
Oʻgʻil bizga berildi.
Hukmronlik Uning zimmasidadir,
Nomi Ajoyib Maslahatchi , qudratli Xudo,
Abadiy Ota, Tinchlik Shahzodasidir.
7 Dovudning taxtida
Uning hukmronligi ortib boradi.
Tinchlik to abad hukm suradi.
Hozirdan boshlab, to abad
U adolat va haqiqat ila
Shohligini mustahkamlab, barqaror qiladi.
Sarvari Olam jon kuydirib,
Buni bajo aylaydi.
Xudoning Isroilga boʻlgan gʻazabi
8 Yoqub nasliga qarshi Rabbiy bir soʻz yubordi,
Uning soʻzi Isroil xalqiga yetib keldi.
9 Efrayimda , Samariyada yashaydiganlar,
Jamiki xalq bundan xabardor boʻldi.
Ular dimogʻdorlik, kiborlik ila aytmoqda:
10 “Gʻishtin imoratlar vayron boʻlsa,
Yoʻnilgan toshlar bilan quramiz.
Shikamora–anjir daraxtlari kesilgan boʻlsa,
Ularning oʻrniga sadr daraxtlarini ekamiz.”
11 Ana, Oram shohi Ratanga qarshi
Egam uning dushmanlarini qoʻzgʻatdi,
Gʻanimlarini daʼvat qildi.
12 Sharqdan Oramlar, gʻarbdan Filistlar
Ogʻizlarin katta ochib, Isroilni yutib yubordi.
Ammo shunday boʻlsa ham,
Egam tushmas gʻazabidan,
Uning qoʻli hamon
Isroilga qarshi koʻtarilgan.
13 Bu xalq Sarvari Olamga yuz burmadi,
Jazo bergan Zotga ular qaytmadi.
14 Shunda Egam bir kunda
Isroilning boshini va quyrugʻini,
Xurmosini va qamishini kesib oldi .
15 Oqsoqollar, amaldorlar boshdir,
Soxta paygʻambarlar quyruqdir.
16 Ular bu xalqni yoʻldan adashtirgan,
Ularga ergashganlar boshi berk koʻchaga kirib qolgan.
17 Hammasi shakkok, qabihlik qilar,
Barcha ogʻizlardan ahmoqona soʻz chiqar.
Rabbiy yoshlardan mamnun boʻlmadi,
Yetim va bevalarga shafqat koʻrsatmadi.
Ammo shunday boʻlsa ham,
Egam tushmas gʻazabidan,
Uning qoʻli hamon
Isroilga qarshi koʻtarilgan.
18 Fosiqlik olovga oʻxshab yonar,
Yeb bitirar butazoru tikanzorlarni.
Oʻrmondagi changalzorlarni yondirib,
Balandlarga tutunini oʻrlatadi.
19 Sarvari Olamning qahridan
Yurt yonib bitar,
Xalq olovga yonilgʻi boʻlar.
Odamlar oʻz yaqiniga shafqat qilmas,
20 Ular oʻng tarafga hamla qiladilar,
Ammo och qoladilar.
Yutaman deb chap tomonga hujum qiladilar,
Ammo toʻymaydilar.
Oʻz qoʻlining goʻshtini yeydi insonlar.
21 Manashe qabilasi yeydi Efrayim qabilasini,
Efrayim esa Manasheni,
Ikkovi birlashib Yahudoga hujum qiladi.
Ammo shunday boʻlsa ham,
Egam tushmas gʻazabidan,
Uning qoʻli hamon
Isroilga qarshi koʻtarilgan.
9–БОБ
Ишаё бўлажак шоҳ ҳақида башорат қилади
1 Кулфат қамраган бу юртда энди азоб бўлмайди. Олдин Забулун ва Нафтали юрти шарманда бўлган эди. Аммо келажакда денгиз бўйидаги ерлар, Иорданнинг нариги томонидаги ўлка ва ғайрияҳудийлар Жалиласи улуғланади.
2 Зулматда юрган халқ ёрқин зиёни кўрди,
Ўлим соя солган юрт аҳолиси устига нур сочилди.
3 Бу халқни Сен кўпайтиргансан,
Уларга кўп шодлик ато қилгансан.
Ҳосил вақтидаги мамнунлик каби,
Ўлжаларин бўлишиб олган пайтдаги каби,
Улар ҳузурингда қувончга тўлган.
4 Бу халқнинг оғир бўйинтуруғини,
Елкасидаги таёғини
Сен синдириб ташлагансан.
Золимларнинг калтагини
Мидиён халқи каби,
Мағлуб қилгансан .
5 Жангда кийилган этиклар,
Қонга беланган ҳамма кийим
Оловга ташланиб, ёқилажак.
6 Мана биз учун бола туғилди,
Ўғил бизга берилди.
Ҳукмронлик Унинг зиммасидадир,
Номи Ажойиб Маслаҳатчи , қудратли Худо,
Абадий Ота, Тинчлик Шаҳзодасидир.
7 Довуднинг тахтида
Унинг ҳукмронлиги ортиб боради.
Тинчлик то абад ҳукм суради.
Ҳозирдан бошлаб, то абад
У адолат ва ҳақиқат ила
Шоҳлигини мустаҳкамлаб, барқарор қилади.
Сарвари Олам жон куйдириб,
Буни бажо айлайди.
Худонинг Исроилга бўлган ғазаби
8 Ёқуб наслига қарши Раббий бир сўз юборди,
Унинг сўзи Исроил халқига етиб келди.
9 Эфрайимда , Самарияда яшайдиганлар,
Жамики халқ бундан хабардор бўлди.
Улар димоғдорлик, киборлик ила айтмоқда:
10 “Ғиштин иморатлар вайрон бўлса,
Йўнилган тошлар билан қурамиз.
Шикамора–анжир дарахтлари кесилган бўлса,
Уларнинг ўрнига садр дарахтларини экамиз.”
11 Ана, Орам шоҳи Ратанга қарши
Эгам унинг душманларини қўзғатди,
Ғанимларини даъват қилди.
12 Шарқдан Орамлар, ғарбдан Филистлар
Оғизларин катта очиб, Исроилни ютиб юборди.
Аммо шундай бўлса ҳам,
Эгам тушмас ғазабидан,
Унинг қўли ҳамон
Исроилга қарши кўтарилган.
13 Бу халқ Сарвари Оламга юз бурмади,
Жазо берган Зотга улар қайтмади.
14 Шунда Эгам бир кунда
Исроилнинг бошини ва қуйруғини,
Хурмосини ва қамишини кесиб олди .
15 Оқсоқоллар, амалдорлар бошдир,
Сохта пайғамбарлар қуйруқдир.
16 Улар бу халқни йўлдан адаштирган,
Уларга эргашганлар боши берк кўчага кириб қолган.
17 Ҳаммаси шаккок, қабиҳлик қилар,
Барча оғизлардан аҳмоқона сўз чиқар.
Раббий ёшлардан мамнун бўлмади,
Етим ва беваларга шафқат кўрсатмади.
Аммо шундай бўлса ҳам,
Эгам тушмас ғазабидан,
Унинг қўли ҳамон
Исроилга қарши кўтарилган.
18 Фосиқлик оловга ўхшаб ёнар,
Еб битирар бутазору тиканзорларни.
Ўрмондаги чангалзорларни ёндириб,
Баландларга тутунини ўрлатади.
19 Сарвари Оламнинг қаҳридан
Юрт ёниб битар,
Халқ оловга ёнилғи бўлар.
Одамлар ўз яқинига шафқат қилмас,
20 Улар ўнг тарафга ҳамла қиладилар,
Аммо оч қоладилар.
Ютаман деб чап томонга ҳужум қиладилар,
Аммо тўймайдилар.
Ўз қўлининг гўштини ейди инсонлар.
21 Манаше қабиласи ейди Эфрайим қабиласини,
Эфрайим эса Манашени,
Иккови бирлашиб Яҳудога ҳужум қилади.
Аммо шундай бўлса ҳам,
Эгам тушмас ғазабидан,
Унинг қўли ҳамон
Исроилга қарши кўтарилган.
