62–BOB
Quddusning yangi nomi
1 Quddus haqi, men sukut saqlamayman,
Sion haqi, men jim turmayman.
Uning zafari tong kabi nur sochmaguncha,
Uning najoti mashʼala kabi yonmaguncha,
Men aslo jim turmayman.
2 Ey Quddus xalqi, xalqlar sizning gʻalabangizni,
Har bir shoh shuhratingizni koʻradi.
Ular sizni yangi nom bilan ataydi,
Bu nomni Egamizning Oʻzi sizlarga beradi.
3 Sizlar Egamizning qoʻlida goʻzallik tillaqoshi,
Xudoyingizning qoʻlida shohlik toji boʻlasiz.
4 Endi sizni “Tark etilgan” deb aytmaslar,
Sizning yurtingizni “Tashlandiq” deb atamaslar.
Endi sizga “Undan mamnunman” degan nom beriladi,
Yurtingizni esa “Oilali” deb aytishadi.
Zotan, Egangiz sizdan mamnun boʻladi,
Yurtingiz ham oilali boʻladi.
5 Yigit qiz bilan turmush qurganday,
Oʻgʻillaringiz yurtingizga bogʻlanib,
Unga egalik qiladi.
Kuyov kelin bilan qanday shod boʻlsa,
Xudoyingiz siz bilan shunday sevinadi.
6 Ey Quddus, devorlaringga soqchilar qoʻydim,
Ular kechayu kunduz ibodatni bas qilmaydi.
Ey Egamizga ibodat qiladiganlar!
Sizlar ham hech jim turmang.
7 Quddusni barqaror qilgunga qadar,
Uni yer yuzining faxri qilmagunga qadar,
Egamizga hech tinchlik bermanglar.
8 Egamiz oʻng qoʻlini koʻtarib,
Oʻz qudrati bilan ont ichdi:
“Hech qachon dushmanlaringizga
Doningizni yemish qilib bermayman.
Mehnatingiz singgan sharobni
Begonalar ichmaydi.
9 Ha, don yiqqanlarning oʻzi don yeydi–da,
Men, Egasiga hamdu sano aytadi.
Uzumni yigʻib–terganlar
Sharobni muqaddas hovlimda ichadi.”
10 Ey Quddus aholisi, darvozalardan chiqing!
Qaytayotgan xalqqa yoʻlni tayyorlang!
Tuproq yigʻib yoʻl qiling,
Toshlarni terib tashlang,
Xalqlar uchun bayroq tiking!
11 Mana, Egamiz yerning toʻrt chetiga eʼlon qilmoqda:
“Goʻzal Quddusga shunday deb ayting:
«Qara, najotkoring kelmoqda,
Ana, Uning Oʻzi taqdirlaydi,
Mukofotini Oʻzi bilan olib kelmoqda.»”
12 Ey Quddus, sening xalqingni “Muqaddas” deb aytadilar,
“Egamiz qutqargan xalq” deb aytadilar.
Seni “Egamiz izlab topgan, tark etilmagan shahar” deb ataydilar.
62–БОБ
Қуддуснинг янги номи
1 Қуддус ҳақи, мен сукут сақламайман,
Сион ҳақи, мен жим турмайман.
Унинг зафари тонг каби нур сочмагунча,
Унинг нажоти машъала каби ёнмагунча,
Мен асло жим турмайман.
2 Эй Қуддус халқи, халқлар сизнинг ғалабангизни,
Ҳар бир шоҳ шуҳратингизни кўради.
Улар сизни янги ном билан атайди,
Бу номни Эгамизнинг Ўзи сизларга беради.
3 Сизлар Эгамизнинг қўлида гўзаллик тиллақоши,
Худойингизнинг қўлида шоҳлик тожи бўласиз.
4 Энди сизни “Тарк этилган” деб айтмаслар,
Сизнинг юртингизни “Ташландиқ” деб атамаслар.
Энди сизга “Ундан мамнунман” деган ном берилади,
Юртингизни эса “Оилали” деб айтишади.
Зотан, Эгангиз сиздан мамнун бўлади,
Юртингиз ҳам оилали бўлади.
5 Йигит қиз билан турмуш қургандай,
Ўғилларингиз юртингизга боғланиб,
Унга эгалик қилади.
Куёв келин билан қандай шод бўлса,
Худойингиз сиз билан шундай севинади.
6 Эй Қуддус, деворларингга соқчилар қўйдим,
Улар кечаю кундуз ибодатни бас қилмайди.
Эй Эгамизга ибодат қиладиганлар!
Сизлар ҳам ҳеч жим турманг.
7 Қуддусни барқарор қилгунга қадар,
Уни ер юзининг фахри қилмагунга қадар,
Эгамизга ҳеч тинчлик берманглар.
8 Эгамиз ўнг қўлини кўтариб,
Ўз қудрати билан онт ичди:
“Ҳеч қачон душманларингизга
Донингизни емиш қилиб бермайман.
Меҳнатингиз сингган шаробни
Бегоналар ичмайди.
9 Ҳа, дон йиққанларнинг ўзи дон ейди–да,
Мен, Эгасига ҳамду сано айтади.
Узумни йиғиб–терганлар
Шаробни муқаддас ҳовлимда ичади.”
10 Эй Қуддус аҳолиси, дарвозалардан чиқинг!
Қайтаётган халққа йўлни тайёрланг!
Тупроқ йиғиб йўл қилинг,
Тошларни териб ташланг,
Халқлар учун байроқ тикинг!
11 Мана, Эгамиз ернинг тўрт четига эълон қилмоқда:
“Гўзал Қуддусга шундай деб айтинг:
«Қара, нажоткоринг келмоқда,
Ана, Унинг Ўзи тақдирлайди,
Мукофотини Ўзи билан олиб келмоқда.»”
12 Эй Қуддус, сенинг халқингни “Муқаддас” деб айтадилар,
“Эгамиз қутқарган халқ” деб айтадилар.
Сени “Эгамиз излаб топган, тарк этилмаган шаҳар” деб атайдилар.
